لەسەر داوای دەوڵەت باخچەلی، سەرۆكی مەهەپە، شاندی دەم پارتی دوو جار سەردانی ئیمیڕاڵیان كرد و چاویان بە عەبدوڵا ئۆجەلان كەوت، بەرپرسانی حكوومی و خودی دەوڵەت باخچەلی، چاوەڕێ بوو كە ئۆجەلان داوا بكات پەكەكە چەك دابنێت، بەڵام لەسەر زاری شاندی دەم پارتی، ئۆجەلان گوتبووی، بەردەوامە لە كاركردن و پێویستی بە كاتی زیاترە.
میدیاكانی توركیا باسیان لەوە كرد، لە ناوەڕاستی مانگی شوبات، شاندی دەم پارتی بۆ جاری سێیەم دەچێتەوە ئیمیڕاڵی و رەنگە لەوكاتەدا ئۆجەلان، بەفەرمی داوا لە پەكەكە بكات چەك دابنێت و ئیدی توركیا بەجێ بهێڵن.
بەڵام عومەر چەلیك، وتەبێژی ئاكەپە، لە كۆنگرەیەكی رۆژنامەوانییدا گوتی: ”شاندی دەم پارتی بۆ جاری سێیەم ناچنەوە ئیمیڕالی و ئیدی دەرگای ئیمیڕالی داخرا“
ئەم گوتەیەی چەلیك، هەموو ئەو كەسانەی بێئومێد كرد كە پێشبینییان كردبوو ئەمجارەیان پرسی چارەسەری كورد بگاتە ئەنجام و هەروەها، ئیدی پەكەكە چەك دادەنێت و توركیا جێ دەهێڵێت.
ئەگەر بە وردی بۆچوون و گوتەكانی ئۆجەلان شی بكەینەوە، كە شاندی دەم پارتی بڵاویان كردەوە، ئەوەی ئۆجەلان داوای دەكات، بەر لەوەی زیندانیش بكرێت داوای كردووە، بۆ نموونە باس لەوە دەكات توركیا بەرەو دیموكراتی بچێت و پرسی كورد لەناو پەرلەمانی توركیا گفتوگۆی لەسەر بكرێت و یاسای بۆ دەربچێت، بۆیە ئەگەر گوتەكەی چەلیك راست بێت و دەرگای ئیمیڕاڵی دابخرێت، بەو مانایە دێت كە ئومێدیان بە ئۆجەلان نەماوە کاریگەریی بەسەر پەکەکەوە مابێت.
ئاكەپە و مەهەپە، ئامادەكاریي تەواویان كردووە تا دەستووری توركیا هەموار بكرێتەوە، لەو رێگەیەوە دەیانەوێت رێگە بۆ رەجەب تەییب ئەردۆغان خۆش بكەن، تا دوو خولی تر بتوانێت خۆی بۆ هەڵبژاردنی سەرۆكایەتیی بەربژێر بكات، چونكە بەگوێرەی دەستووری توركیا، هەر كەسێك بۆی هەیە دوو جار خۆی بەربژێر بكات. بەڵام دەنگی ئاكەپە و مەهەپە، بەشی ئەوە ناكات لەناو پەرلەمانی توركیا دەستوور هەموار بكەنەوە، پێویستیان بە ٥٠ پەرلەمانتاری ر هەیە تا بە (بەڵێ) دەنگ بۆ هەمواركردنەوەی دەستووری بدات، دەم پارتیش باشترین بژارە و پارتە، كە ئاكەپە و مەهەپە لە دەرگای بدەن و داوایان لێ بكەن پاڵپشتیان بن لەوەی دەستوور هەموار بكرێتەوە.
پێشبینییەكان بۆ ئەوە بوون، دەم پارتی پاڵپشتی هەمواری دەستوور بكات، لە بەرامبەردا ئاكەپە و مەهەپە، لە دەستووری تازەدا كورد وەكوو نەتەوە بناسێنن، هەروەها رێگە بدەن كورد بە ژمانی دایك بخوێنێت و ئۆجەلانیش ئازاد بكرێت، بەڵام ئازادكردنێكی سنووردار و بگوازرێتەوە بۆ خانوویەك و لەلایەن پۆلیسەوە چاودێری بكرێت.
مەرجێكی تری ئەردۆغان و باخچەلی ئەوەیە، پەكەكە چەك فڕێ بدات و بەیەكجاری توركیا بەجێبهێڵێت، ئەمەش دەبێتە سەركەوتنێكی گەورە بۆ ئاكەپە و رەنگە لە هەڵبژاردنی داهاتوو وەكوو كارتێكی گرنگ بۆ پروپاگندە بەكاری بهێنن.
رۆژنامەی (قەرار)ی توركی بڵاوی كردووەتەوە، ئۆجەلان بەو مەرجە داوا لە پەكەكە دەكات چەك فڕێ بدات، توركیاش دان بە یەپەگەدا بنێت لە سووریا، واتە پەكەكە بچێتە ناو یەپەگە و لەژێر ناوێكی تردا بن و توركیاش چاوپۆشییان لێ بكات.
ئۆجەلان، لە ٢٠١٣شدا پەیامێكی لە نەورۆزدا لەرێگەی سری سوورەیا ئۆندەر بڵاو کردەوە و لەوێ داوای كرد ئاشتی جێگەی شەڕ بگرێتەوە و هەروەها داوای كرد پەكەكە چەك فڕی بدات، بەڵام وەكوو ئەوەی شڕۆڤەكاران باسی دەكەن ئۆجەلان یان کاریگەریی لەەر پەکەکە نەماوە یان فێڵی کردووە، چونکە دوای ئەو شەڕی خەندەق لە باكووری كوردستان رووی دا و لەو رێگەیەوە هێزێكی زۆری پەكەكە چوونە رۆژئاوای كوردستان و لەوێ شوێنی خۆیان توند بكەن، بۆیە ئەگەر ئەمجارەش بڕیار بدات پەكەكە چەك فڕێ بدات، دەبێت توركیا دان بە رۆژئاوای كوردستاندا بنێت.
سیاسەتی قەیووم لە توركیا
بەردەوامە و تاوەكوو ئێستا زیاتر لە چوار شارەوانیی دەم پارتی قەیووم كراون، ئەگەر گوتەی چەلیكیش بچێتە بواری جێبەجێكردن، كەواتە شتێك نامێنێت بەناوی پرسی چارەسەری و ئیدی دەگەڕێنەوە بۆ خاڵی سفر.
بەڵام ئەگەر دەرگای ئیمیڕاڵی بۆ جاری سێیەم و چوارم بۆ شاندی دەم پارتی بكرێتەوە، رەنگە ئەنجامێكی باشی هەبێت، كە كاریگەریی لەسەر هەمواری دەستووری توركیاش دەبێت و رەنگە ئیدی دوای ١٠٠ ساڵ نكۆڵیكردن لە نەتەوەی كورد لە توركیا، بەفەرمی بیناسێنن و لە پاڵ نەتەوەی تورك، دان بەوەشدا بنێن لە توركیا نەتەوەی كوردیش هەیە.