ئاشکرایە، رۆژهەڵاتى ناوەڕاست بە کۆمەڵێک گۆڕانكاریی گەورە لە نەخشەى ناوچەکەدا گوزەر دەکات، لەو نێوەدا هەنگاوەکانى سەرکردایەتیی هەرێمى کوردستان، بەتایبەتیش مەسرور بارزانى، سەرۆکى حکوومەتى هەرێمی کوردستان، چ لەسەر ئاستى ناوچەکە و نێودەوڵەتی لە دۆخێکى هەستیارى ئێستادا، بەتایبەت کە ئاستى پەیوەندییەکانی کوردستان و عێراق لە قۆناغێکى ئاڵۆزدایە، وەک فریادڕەسێک، بە ئەنجامدانى چەندین دیدار و کۆبوونەوە لەسەر ئاستى وڵاتانى عەرەبى و تورکیا و لە ئێستاشدا بەرەو بەشداریکردن لە 54ەمین کۆنفرانسى ئابوورى وبارزگانى و سیاسیی داڤۆس لە سویسڕا، ئاماژەن بە سەنگ و پێگەى بەهێزى هەرێمى کوردستان و گەلى کورد لەسەر ئاستى نێودەوڵەتیدا.
هاتنە سەر دەسەڵاتى دۆناڵد ترەمپ لەلایەک و لایەکى دیکەش رەوشى شڵەژاوى سووریا و ناوچەکە و گۆڕانکارییە خێراکان و پرسى کورد لەسەر ئاستى هەرێمى کوردستان و رۆژئاواى کوردستان و باکووورى کوردستان، ئنجا دۆزینەوەى چارەسەر و پارێزگاریکردن لە پرسى کورد لەلایەن سەرۆک بارزانییەوە و پارێزگاریکردنى لە پێگە و سەنگى کوردستان لە رووى ئابوورى و نێودەوڵەتیی و جووڵە دیپلۆماسییەکانى مەسرور بارزانى، سەرۆکى حکوومەتى هەرێمی کوردستان، ئاماژەیەکى روون بە داهاتوویەکى گەش بۆ کوردستان دەكەن.
یەکەم، سەردان و بانگهێشت و دیدار و کۆبوونەوەى فەرمیی مەسرور بارزانى، سەرۆکوەزیرانى کوردستان لەگەڵ سەرکۆمارى تورکیا رەجەب تەیب ئەردوغان و هاکان فیدان وەزیرى دەرەوەى تورکیا.
دووم، دیدار و کۆبوونەوەى مەسرور بارزانى، سەرۆکى حکوومەتى هەرێمی کوردستان لەگەڵ شا، جێنشینن و سەرۆک وەزیران و بەرپرسە باڵاکانی بەحرەین.
سێیەم، سەردانى ئیمارات و دیدار و کۆبوونەوەى مەسرور بارزانى، سەرۆکى حکوومەتى کوردستان، لەگەڵ شێخ محەمەد بن زاید ئال نەهیان، سەرۆکى دەوڵەتى ئیمارات.
چوارەم، سەردان و دیدار و کۆبوونەوەى فەرمیی مەسرور بارزانى، سەرۆکوەزیرانى کوردستان لەگەڵ شا عەبدوڵای شای ئوردن.
پێنجەم، بانگهێشتى فەرمى بۆ 54هەمین کۆڕبەندى ئابووریی جیهانى لە داڤۆس لە سویسڕا و سازدانى چەندین دیدار و کۆبوونەوەى فەرمى و گرنگ لەگەڵ سەرۆک و سەرکردە و وەزیرانى وڵاتانى ناوچەکە و جیهان.
ئەمانەی سەرەوە هەموویان، ئاماژەیەکى روونن بۆ سەنگ و پێگەى هەرێمى کوردستان لە ئاستی هەرێمی و نێودەوڵەتیشدا كە ئەم ئاستەش لە سایەی سەركردایەتییەكی بەتوانا و لێهاتوو و خاوەن بڕیار و خۆڕاگرەوە وەدی هاتووە.
ئامانج و لەو دیدار و کۆبوونەوانە، تاوتوێکردنى هەموو ئەو پێشهات و گۆڕانکارییانەى ناوچەکە و عێراقن، کە هەرێمى کوردستان وەک ئەکتەرێکى کاریگەرى نادەوڵەتى رۆڵى گرنگ و بەرچاوی لە سەقامگیرى و مامەڵەکردن لەگەڵ رووداو و هاوکێشەکانى ناوچەکە و جیهان بینیوە و دەبینێت، بەتایبەتیش كۆڕبەندی ئابوورىی داڤۆس، کۆڕبەندێکە کە دەیان سەرکردە و گەورە بەرپرسانى وڵاتانى جیهان و بازرگانان و وەبەرهێنەران تێیدا بەشدار دەبن، هەرێمى کوردستانیش هاوشێوەى وڵاتانى جیهان لەم کۆڕبەندەدا بەشدارە.
گومانی تێدا نییە كە مەسرور بارزانى، سەرۆکى حکوومەتى هەرێمی کوردستان، بە هەنگاو و چالاکییە دیپلۆماسییەکانى بەردەوام خزمەتى پرسى گەلى كوردی کردووە، لە هەمان كاتیشدا لە نێو هاوکێشە نێودەوڵەتییەكاندا پێگە و قەوارەی هەرێمی كوردستانی پاراستووە، بۆیە، ئەم جووڵە دیپلۆماسییانەى مەسرور بارزانى، دەبێتە هۆى ئەوەى کوردستان و دۆزەکەى سەقامگیرتر بێت.
بەدڵنیاییەوە ، پێشهات و گۆڕانکارییەکانى ناوچەکە زۆر خێرا دەبن، بۆیە، چالاكییە دیپلۆماسییەکانى مەسرور بارزانى، سەرۆكی حكوومەتی هەرێمی کوردستان، پەیوەندییە دیپلۆماسییەکانى لەسەر ئاستى ناوچەیی و نێودەوڵەتی، نەک هەر کوردستان لە تەنگژە و ئاڵنگارییەکان دەپارێزێت کە ڕووبەڕووى دۆزى کورد دەبێتەوە، بەڵكوو بەرەو داهاتوویەکى گەشتریش هەرێمەكەمان ئاراستە دەكات.