"هەرگیز لە ژیانما كەسی بێقیمەتی وەكوو تۆم نەبینیوە..." ئەمە كۆنترین قسەی سەركۆنەئامێزی تۆماركراوە لە مێژووی دێرینی كورد و كوردستاندا كە هەمبەر بە خیانەتكارێكی نەتەوەیی و نیشتمانی گوترابێت.
ئەو دێڕەی سەرەوە، ساڵی 550ی پێش زایین، لە سەروبەندی رووخانی دەوڵەتی مادی باوانی كورددا، شا ئاستیاگی دوایین پاشای ئیمپراتۆرییەتی ماد، بە هارپاكی سوپاسالاری مادی گوتووە دەمێ كە ئاستیاگ دەزانێ هارپاك خیانەتی لە مادەكان كردووە و بەرەكانی شەڕی چۆڵ كردووە و بەشێكی زۆری سوپای دەوڵەتی مادی خستووەتە خزمەت كۆرشی حەخامەنشیی باوكفارسەوە، تا تەختی ماد بڕووخێنێت.
من لێرەدا، لەگەڵ ئەوپەڕی رێزم بۆ خوێنەری هێژا، هەمان ئەو دێڕەی كە شا ئاستیاگ دوو هەزار و 474 ساڵ لەمەوبەر بە هارپاكی خۆفرۆش و خاكفرۆش و نەتەوە و نیشتمافرۆشی گوت، بەو پەرلەمانتارە كوردانەی ئەنجوومەنی نوێنەرانی عێراق دەڵێمەوە، كە لە هەموو پرس و باس و كێشە و مشتومڕێكدا، لە بەرەی دەسەڵاتدارانی مەزهەبگەرا و میلیشاگەرای بەغدا دوەستن و دژی كورد و كوردستان و مافە دەستوورییەكانی خەڵكی كوردستان و حكوومەتی و قەوارەی كوردستان دەدوێن. بەڵێ پێویستە هەموومان بەو پەرلەمانتارە كوردە خۆفرۆشانە بڵێین: "هەرگیز لە ژیانمانا كەسانی بێقیمەتی وەكوو ئێوەمان نەدیوە."
ئەو پەرلەمانتارە كوردزمانانەی بەغدا، كە بەردەوام پاساو بۆ تاوان و غەدر و ستەمەكانی دەسەڵاتدارانی عێراق دەهێننەوە و لە هەموو كێشەیەكدا هەرێمی كوردستان و حكوومەتەكەی خەتابار دەكەن، ئەو پەرلەمانتارە كوردانەی بە دەنگی خەڵكی كوردستان گەیشتوونەتە پەرلەمانی عێراق و كەوتوون بەسەر ناز و نیعەمەت و مووچە و ئیمتیازاتەكانیاندا، بەرامبەر پارە و پرۆژە و بەرتیل، هەرچی كاری بەد و بێویژدانی و بێقیمەتی هەیە دژ بە میلەتەكەیان دەیكەن.
مەبەستم تەنیا پەرلەمانتارە كوردە خۆفرۆشەكانی ئەم خولەی پەرلەمانی عێراق نیە، بەڵكوو مەبەستم لەوانەی ئێستا و خولی پێشوو و خولەكانی پێشووتریشە. گەلۆ لە ئێوە دەپرسم: "قەت لە ژیانتانا، لە مێژووی هیچ دەوڵەتێكی فیدراڵییدا، بینیوتانە پەرلەمانتاری هەرێمێكی فیدراڵ، هێندە بێقیمەت و پووچ بێت، دژی هەرێمەكەی خۆی و ماف و شایستەی خەڵكی هەرێمەكەی خۆی و حكوومەتی هەرێمەكەی خۆی بجووڵێ و هەموو قسە و هەڵوێست و دەستهەڵبڕینێكی، لە بەرژەوەندیی دەسەڵاتدارانی ناوەندەكە و لە زەرەری خەڵكی هەرێمەكەی خۆی بێت؟"
ئاخر ئەو پەرلەمانتارە كوردە خۆفرۆش و جاشانەی بەغدا، كە ئێستا بەردەوام پاساو بۆ نەناردنی مووچەی مووچەخۆرانی كوردستان لە بەغداوە، دەهێننەوە و كوردستان خەتابار دەكەن، ئەوانەی هەر رۆژە و بە درۆیەك پەرێزی دەسەڵاتدارانی میلیشاگەری بەغدا پاك دەكەنەوە و ئەزموونی هەرێمی كوردستان لەبەرچاوی خەڵك رەش دەكەن، خۆیان زۆر باش دەزانن كە دەسەڵاتدارانی بەغدا بە ئەنقەسد و بۆ لاوازكردنی كورد و كوردستان و حكوومەت و ئەزموونەكەی، مووچە و بودجەی كوردستانیان بڕیوە.
ئەو جاشپەرلەمانتارە كوردانەی بەغدا، خۆیان لە هەموو كەس باشتر دەزانن كە لیستی مووچەی هەرێمی كوردستان چەند هەزار جار خاوێنترە لە لیستی مووچەی مووچەخۆرانی تری عێراق و حەشدی شەعبی. باش دەزانن لە باشوور و ناوەڕاستی عێراق بە سەدان ملیار دۆلار بە گەندەڵی حەپەلووش كراوە، ئەو پەرلەمانتارە كوردە خۆفرۆشانەی بەغدا، جاران دەیانزانی و ئێستاش دەزانن، دەسەڵاتدارانی بەغدا دەیانەوێ سەری كورد و كوردستان شۆڕ كەن، كوردستان لاواز بكەن، مرۆڤی كورد نانبڕاو و سووك و ریسوا بكەن، كەچی ئەو جاشانە هەر سوورن لەسەر پاساوهێنانەوە بۆ تەیف سامی و میلیشاكان و ئاغاكانیان.
ئەو جاشپەرلەمانتارانە كاتی خۆشی زۆر لە ئێمە باشتر دەیانزانی كە ئەگەر نەوت و داهاتی ناوخۆیی كوردستان رادەستی بەغدا بكرێت و مووچەمان لە بەغداوە بێت، ئیتر چ سووكایەتییەكمان پێدەكرێت و چۆن هەوڵ دەدەن هەموو مووچەخۆرانی كوردستان موحتاجی دەستی نامەرد بكەن. ئەو خۆفرۆشانە باش رەوشی بەسرە و زیقار و بەغدا و مووسڵ و شارەكانی تری باشوور و ناوەڕاستی عێراقیان دیوە كە دەسەڵاتدارانی بەغدا چۆن هەموو پارەكانیان دەدزن و هی خزمەتێكی ئەو شارانەش ناكەن، كەچی هەر سوورن لەسەر ئەوەی عێراقمان لێ بكەنە سویسرا و كوردستانیش وەك دۆزەخ! ئەوان دەزانن پارەی مووچەخۆرانی كوردستان دەنێردرێ بۆ حەماس و حزبوڵا و حووسیەكان، كەچی تا ئێستا سوورن لەسەر خەتاباركردنی حكوومكەتی هەرێمی كوردستان و پاك پیشاندانی دەسەڵاتدارانی بەغدا.
ئنجا دوو هەزار و 474 ساڵ لەمەوبەر، ئەو رۆژەی شا ئەستیاگی دوایین پاشای ماد زانیی هارپاكی سوپاسالاری خائین، دەسەڵاتی مادی رووخاند و دەوڵەتی مادی رادەست بە دەوڵەتی حەخامەنشیی فارسیی كۆرش كرد، بە هارپاكی گوت: "هەرگیز كەسی بێقیمەتی وەكوو تۆم نەدیوە، ئاخر كە هەر نیازی خیانەتت هەبوو، بۆچی تەختی دەسەڵاتی مادت رادەست حەخامەنشیەكان كرد؟ بۆچی رادەستی كەسێكی مادت نەكرد تا هەر لە دەست مادەكاندا بمێنێتەوە؟" بەڕاستی ئەگەر بە پێوەرەكەی شا ئەستیاگ بێت، ئەو جاشپەرلەمانتارە كوردانەی ئەمڕۆی بەغدا، بێقیمەتن.
سەرنج: ئەم تابلۆیەی خوارەوە، كە لەلایەن نیگاركیشێكی ئەورووپی بە خەیاڵ و سوودوەرگرتن لە سەرچاوە میژووییەكە كێشراوە، لە هەندێ سەرچاوەدا وەها ئاماژەی پێ كراوە كە هی ئەو ساتەوەختەیە كە ئەستیاگی پاشای ماد دەستگیر دەكرێ و ئەو قسەیە بە هارپاك دەڵێت.