ئەگەر بەوردی لە سەرژمێریی ئەمجارەی عێراق بەگشتی و ناوچە دابڕێنراوەکانی كوردستان بەتایبەتی بڕوانین، دەبینین خاڵی ئەرێنی و نەرێنیی خۆی هەیە، ئێمەی کورد بۆ ڕووبەڕووبوونەوەی ئامانج و مەبەستی خراپی دەسەلاتدارانی بەغدل، دەبێ خۆمان ئامادە بکەین و پێشوازییش لە نییەتی باش و کارکردنی زیاتر بۆ چەسپاندنی مافە ڕەواكانی کورد و بەشداریی كارای جەماوەری لە پرۆسەكە بكەین و خۆمانی بۆ ئامادە بکەین.
سەرەتا بێ جیاوازی روو لە سەركردایەتیی كورد بە سەرجەم حزبەكانەوە دەكەین و دەپرسین: ئایا ئەم پرۆسەیه خزمەت بە دۆزی کورد دەکات؟ یان هۆكارێكی دیكەیە بۆ تەعریب و زیاتر لاوازکردن و لەقاڵبدانی کورد لە ناوچە دابڕێنراوەکان؟
ئایا سەرکردایەتیی کورد و حزبە کوردستانیەكانی خۆیان ئامادە کردووە بۆ هەر پلان و پیلانێک بە ناوی سەرژمێری، كە لەلایەن نەیارانەوە دژی نەتەوەی کورد داڕێژرابێت؟
ئێستا ڕۆژهەڵاتی ناوەڕاست بە عێراقیشەوە بەرەو گۆڕانکاریی دیموگرافی و سیاسی و گۆڕینی پارسەنگی هێز دەڕوات، لەو گۆڕانكارییە چاوەڕوانكراوە، پێویستە کورد کارەکتەرێكی كارا بێت و جێدەستی بەسەر بڕیار و نەخشەڕێژیی گۆڕانكارییەكەدا هەبێت. ئەم روانگەیە وامان لێ دەکات، ئێمەی کورد زۆر بە هەستیاری و وردی و بە چڕی هەنگاو بنێین. ئەوەی ئێستا دەبێت بەوریاییەوە مامەڵەی لەگەڵدا بکرێت، پرۆسەی سەرژمێرییە کە نابێت هیچ سازشێك لەسەر یەك بستی خاکی کوردستان بكرێت.
ئێمەی كورد بەم هەموو ئەزموونەی لەگەڵ حكوومەتە یەك لەدوای یەكەكانی عێراق هەمانە، گومانەكانمان لەجێی خۆیدان، كە پێمان وایە سەرژمێری لە عێراق و بەتایبەت لە هەرێمی كوردستان، كە ناوچەیەكی زۆری لێ دابڕێنراوە و خراوەتە ناو مادەی ١٤٠ی دەستووری و بە ئەنقەستیش حكوومەتی عێراق دوای چەندین ساڵ هیچ هەنگاوی بۆ یەكلاییكردنەوەی ئەم مادە دەستوورییە نەناوە، گومانمان لە جێی خۆیەتی، كە پێمان وابێ ئەم سەرژمێرییە وەك شمشێرێكی دووسەرە وایە، ئەگەر وریا نەبین، سەرەنجام زەرەر و زیانی سەرژمێری زۆر زیاتر دەبن لەوەی ڕژێمی گۆڕ بەگۆڕی بەعس بەسەر كوردستانیدا هێنا.
دەبێ كوردانی ئەسڵی كەركووك و شنگال و خانەقین و مەخموور و دیالە و دەشتی نەینەوا هەموان بچنەوە شار و شارۆچكە و ناوچە رەسنەكانی خۆیان و لەوێ خۆیان تۆمار بكەن لە سەرژمێرییدا، بەڵام گرنگە سەركردایەتیی سیاسیی كوردستانیش مەرجەكانی خۆی فەرز بكات لە رێوشوێنی سەرژمێرییەكەدا.
1
2
3
4
5
6
7
8
