كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×
ئاسۆ عەبدوللەتیف 29/05/2023

ئەگەر خۆتان بە عێراقەوە دەبەستنەوە، ئەمە ئەجینداكەیەتی

تۆماس هۆبز (١٥٨٨-١٦٧٩) بیریاری سیاسیی ئینگلیز، لە سەدەی حەڤدەیەمی زایینییدا، خواست بۆ گرێبەستی کۆمەڵایەتی دەخاتە ڕوو، بە شێوەیەک ئەو گرێبەستە پاسەوانی ئارامی و هێوریی کۆمەڵایەتی و خودی پایەگاکانی سیستم بێت لە پێشدا، دواتر ماف و ئازادییەکان بە گرنگ تەماشا دەکات بۆ حوکمڕانی وەک تیۆری گونجاندن و بەڕێوەبەری، هەموو ئەوانە لەپێناو خودی فەزیلەتی تاکدایە بۆ دوورخستنەوەی توندوتیژی و هاریکاریی یەک و ترس لە ستەمکاری و تێکچوونەوەی سیستم.

ئێستا حەشدی شەعبی کە یاسای بۆ دەرکراوە لە ٢٠١٦ و بودجەی خەیاڵیی حکوومەت و بیرە نەوتەکانیشیان لەژێر دەستە و کاریان بە کەس نەماوە، خەریکی هەڵوەشاندنەوەی تەواوی گرێبەستەکانی پێکەوەژیان و ئارامیین لە عێراقدا، وەک دەوڵەتی قووڵ و دۆخی دوای کودەتا بە خواستی خۆیان کاراکتەرە سیاسییەکانی عێراق و مەندووبان و دادوەران بەکار دێنن بەزۆری چەک و ئیمتیاز، ماوەیەکی تر شتێک نامێنێ بە ناوی هەڵبژاردن و کورسی و دیموکراسییەت ئەگەر ئەو دیدگا و هەناسەیە بەردەوام بێت.

هەر وەزیر و مەندووب و سەرۆک وەزیرێک ملکەچانە دەبێت تەقیە و تەحیە بکات و تەسلیمی ئەو ئیرادە ئینقیلابییە بێت و لەبەردەم فەتوا و بڕیار و هەژموونەکانی هەیئەتی حەشدی شەعبی و کاراکتەرە سەربازییەکانیان چۆک دابدات، ئەمە مۆدێلێکی مەترسیداری فاشیزمی مەزهەبییە لەسەر کۆی نەتەوە و پێکهاتە و ئیتنیک و دیموکراسییەت و ئازادییەکان و خودی فیدڕاڵیزم.

بۆیە ئەگەر خۆبەستنەوەتان بە عێراقەوە دەوێ، ئەمە خەون و پلان و ئەجێنداکەیەتی و بەوردی سەیری بکەن:

- کۆنترۆڵکردنی خاڵ بە خاڵی پڕۆژەیاسای بودجە بە ناوی پاراستنی سامانی وڵات.
- بە ناوی پارێزگاری لە دەستوور و سەروەریی عێراق و هێزیی سوپایی! یاسای ئیجبارکردنی گەنجان بۆ پرۆسەی سەربازیی زۆرەملێ (تجنید) دەبێ کاری پێ بکرێ.
- کۆنترۆڵکردنی خاڵە گومرگی و دەروازە سنوورییەکان بە ناوی پاراستنی ئاسایشی نیشتمانی و مافی دراوسێیەتی (حسن الجوار) تەوێڵە و ئەحمەدئاوا بۆ قلیانکێشانی عەرەب.
- گەڕانەوەی داهاتە نانەوتی و باجە زۆرە ناوخۆییەکان و کۆنتڕۆڵکردنی فڕۆکەخانە و بەندەرەكان و دەریچە بازرگانیەکان بە ناوی سیاسەتی مەدەنیی فڕۆکەوانی و میناپارێزی.
- هەموارکردنەوەی دەستووری ٢٠٠٥ بەدڵی فەقیهو مەرجەع و ئەقتابەکانی شیعە.
- زیندووکردنەوەی بڕیارەکەی دادگای باڵای فیدڕاڵی عێراق بۆ یاساکانی نەوت و غازی هەرێمی كوردستان.
- بەسەربازگەکردن و دۆخی بە پۆلیسیکردنەوەی عێراق.
- کۆتایی بە هەر خەونێک بۆ گەڕانەوەی سەڵتەنەتی سوننی و کوردستانێکی بەهێز و ڕاگەیاندنی دەوڵەتی شیعەمەزهەبی وەلائی.
- هەناردەی نەوت و دامەزراندنی پاڵاوتگە یاسایی و نایاساییەکان، هەر دەبێ لە ڕێگەی خۆیانەوە بێت.

بەڵام، کوردی ڕەسەن و خاوەن دۆز، هەرگیز دەستبەرداری بەهاکانی ڕاپەڕین نابێت، کاتێک گرووپێکی فاشی و تۆتالیتێر خەریکی گێڕانەوەی چیرۆکی بێمتمانەکردن و بێئینتیماکردنی خەڵکن و لەخۆڕا دژی بەهاکانی شۆڕش و راپەڕین و دەستکەوتەکان و سیستم دەوەستنەوە، گوایە لەبەر شکۆی خەڵک و فەزیلەتی تاک و خۆشگوزەرانیی هاووڵاتیان و پاشەکەوت و مووچە دەستکاریی بڕگەکانی بودجەیان کردووە! دەبێ گوتاری سیاسیی خۆیان پاک بکەنەوە لە جەهل و نیفاق و ئەوە بزانن ڕاپەڕین درێژەی هەیە بۆ لۆبیکردنی دەوڵەتسازی و هەستانەوەی زیاتری هەرێمی كوردستان و سووربوون لەسەر ماف و ئازادییەکان.