كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

سەرۆك بارزانی ئاشكرای دەكا، كێ دەستی لە جیابوونەوەی عەلی باپیر لە بزووتنەوەی ئیسلامی هەبوو؟

عەلی باپیر لە نامەیەكدا خۆی بە دۆستی پارتی دەناسێنێ و داوایەك لە سەرۆك بارزانی دەكا

نامەیەكی عەلی باپیر بۆ سەرۆك بارزانی بڵاو دەبێتەوە و تێیدا ئاشكرا دەبێت كە وێڕای ئەوەی لەگەڵ سەركردە ئیسلامییەكانی دیكەدا لە یەك گرووپن، بەڵام عەلی باپیر لە پشتەوەی ئەوانەوە داوا دەكات تەنیا مامەڵە لەگەڵ خۆی بكرێت و دواتر سەرۆك بارزانییش ئاشكرای دەكات كە یەكێتی و ئێران دەستیان لە جیابوونەوەی عەلی باپیر لە بزووتنەوە هەبووە و پارتییش بێلایەنیی هەڵبژاردووە لەو كیشەیەدا.

سەرۆك بارزانی، لە لاپەڕە 667 - 670ی بەرگی پێنجەمی كتێبی (بارزانی و بزووتنەوەی ڕزگاریخوازی كورد.. راپەڕین، دەرفەت و ئاستەنگەكان) كە تایبەتە بە گێڕانەوەی ڕووداوەكانی نێوان ساڵانی 1991 - 2002، بەڵگەنامەی ژمارە 37ی بڵاو كردووەتەوە كە نامەیەكی عەلی باپیر، سەرۆكی ئێستای كۆمەڵە و ئەوكات ئەندامی مەكتەبی سیاسیی بزووتنەوە بووە.

لەو نامەیەدا كە ڕۆژی 14ی 7ی 1998 نووسراوە، عەلی باپیر نووسیویەتی: ”پاش سەلام و ڕێزی زۆر، لە خوای دادگەر و میهرەبان داواكارم هەمیشە شاد و ساغ و سەلامەت بن. بە پێویستی دەزانم لەم بارودۆخەدا ئەم چەند خاڵەتان بۆ بنووسم هەتا دەرفەتی گەڕانەوە و یەكتردیتن دەڕەخسێ“.

خاڵەكان بەپێی ئەوەی لە دەقی نامەكەی عەلی باپیردا هاتووە، بەم شێوەیە نووسراون:

1- وەك پێشتر عەرزمان كردبوون، مامۆستا مەلا عوسمان و م. عەلی برای، ئەوەی بڕیاریان دابوو ئیمزایان كردبوو، بەبێ ئاگاداری و بە ناڕەزامەندیی زۆربەی خەڵكی بزووتنەوەی ئیسلامی، سەرەنجام بە كردار ئەنجامیان دا و خۆیان فڕێ دایە نێو ئیدارەی (ینك)ەوە.

2- هەڵوێستی بەندە و هاوەڵانیشم كە زۆرینەی موتڵەقی بزووتنەوەین، وەك جاران نەگۆڕ (ثابت)ە و خەڵكی نێو بزووتنەوەش ئاگادارن و بەردەوامیش خەریكی ئاگاداركردنەوەیانین و شتی تریش بە تەئكید بەڕێوەیە.

3- هۆی سەرەكیی مانەوەم لێرە، تێگەیاندن و هۆشیاركردنەوەی خەڵكێكی ناحاڵییە و كاركردنە بۆ بەستنی كۆنگرە، چونكە مامۆستا مەلا عوسمان و ئەوان هەرچەندە كاتی خۆی گفتیان دابوو، بەڵام ئێستا وەزع بە زیانی خۆیان دەبینن و دەیانەوێ پەرچی تێ بخەن.

4- مامۆستا و دەوروبەری لە (رەدفیعل)ی ناڕازیبوونی ئێمە بە چوونە نێو ئیدارەی (ینك) و لە ڕقی ئەوەی كە لەگەڵ ئێوەدا دۆستایەتیمان هەیە و ناهێڵین بزووتنەوە ببێتە پاشكۆی (ینك)، جاروبار قسە دەپڕژێنن، خۆشتان شارەزان و هیچ ئیعتیبارێك بۆ قسە و قالیان دانانێین.

5- ئێمە لێرە بەردەوام سەرگەرمی بەرچاوڕوونكردنەوەی خەڵكی خۆمانین، ئەو ڕاستییانەیان بۆ تەئكید دەكەینەوە كە لەگەڵ (پارتی)دا چ جۆرە دۆستایەتی و پەیوەندییەكی قووڵ و لەمێژینەمان هەیە و چۆن بە كەڵكی یەكتر هاتووین، بە تایبەت لەو شەڕانەدا كە (ینك) بەسەر بزووتنەوە و پارتیدا سەپاندوونی.

6- دەمانەوێ جەنابتان دڵنیا بن كە ئەم وەزعەی ئێستای بزووتنەوە، زادەی قەناعەت و ئیرادەی شەرعیی بزووتنەوە نییە و زۆریش كەمتەمەن دەبێ، ئێمەش بەردەوام سەرگەرمی كۆتایی پێهێنانی ئەو بارە ناهەموار و ناشەرعییەین.
دیارە ئەوان بۆ پینەكردنی ئەو هەڵوێستە هەڵەیەی خۆیان، زەخت و فشاری ئێرانیان كردووەتە بیانوو، كە ئەو مەسەلەیە وەك من ئاگادارم هەتا ڕادەدەیەكی زۆر موبالەغەی تێدایە.

7- زۆریش سوپاستان دەكەین كە لەم قۆناغەدا هاوكاریتان كردووین، هیواداریشین هاوكارییەكەتان چاكتر و فراوانتریش بێ و لە ئاستی پێداویستیی ئەم قۆناغە گرنگ و ناسكەی بزووتنەوەدا بێت، هیوادارین كە لەمەودوا لە ڕێگای ئێمەوە نەبێ (تەعامول) لەگەڵ بزووتنەوەی ئیسلامیدا نەكرێ.
هەڵگری نامەش بەڕێز مامۆستا حەسەن بابەكر (تەفاسیل)ی تری لەلایە، عەرزتان دەكات.
خواش یار بێ، هەوڵدەدەم هەرچی زووتر بگەڕێمەوە لاتان، ئەگەر بە پێویستشتان زانی زوو بگەڕێمەوە، هەر بەهۆی هەڵگری نامەوە ئاگادارم بكەنەوە.

هەر لە كتێبەكەیدا، سەرۆك بارزانی لە لاپەڕە 459دا كاتێك باسی سەردانێكی خۆی بۆ توركیا دەكات، ئاشكرای كردووە كە زانیارییان هەیە، ”ئێران و یەكێتی هەردووكیان“ دەستیان لە جیابوونەوەی عەلی باپیر لە بزووتنەوەی ئیسلامی هەبووە، بەڵام ”ئێمە وەك پارتی بڕیارمان دا بێلایەن بین.“

 

دەقی نامەكەی عەلی باپیر هەروەك لە كتێبەكەی سەرۆك بارزانیدا بڵاو كراوەتەوە: - 

No description available.

No description available.