سالم شەبەک: چوار هەزار و 500 خێزانی کوردانی شەبەک لە هەرێمی کوردستان ئاوارەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

سالم شەبەک: چوار هەزار و 500 خێزانی کوردانی شەبەک لە هەرێمی کوردستان ئاوارەن

"لە بەشێک لە ناوچەکانی دەشتی نەینەوا پرۆسەی تەعریب بەڕێوە دەچێت"

نوێنەرێکی پێشووی کوردانی شەبەک لە پەرلەمانی عێراق ڕایدەگەیەنێت، چوار هەزار و 500 خێزانی کوردانی شەبەک لە هەرێمی کوردستان ئاوارەن و نەگەڕاونەتەوە زێدی خۆیان کە دەشتی نەینەوایە و دەشڵێت، دۆسیەی ئەمنیی دەشتیی نەینەوا بە دەستی حەشدی شەعبیەوەیە.

لەم بارەیەوە، ئەمڕۆ شەممە 6ی 8ی 2022، سالم شەبەک، نوێنەری پێشووی کوردانی شەبەک لە پەرلەمانی عێراق، بە (باسنیوز)ی ڕاگەیاند: ''نزیکەی چوار هەزار و 500 خێزانی کوردانی شەبەک ئاوارەن لە ناوچە جیاجیاکانی هەرێمی کوردستان، بەتایبەت لە شێخان و دهۆک و بەردەڕەش و کەڵەک و سلێمانی و چەند شوێنێکی تر و بەشی بەرچاوی کوردانی شەبەک بەهۆی دۆخی ئەمنیی ئارامی هەرێمی کوردستانەوە هاتوون بۆ هەرێمی کوردستان و ئێستا وای لێ هاتووە ئەوانەی کە لە ناوچەکانی خۆمانن، لێیان دابڕاوین''.

گوتیشی: ''شوێنی کوردانی شەبەک لە دەشتی نەینەوا، بەتایبەت لە سنووری بەعشیقەیە و ئەوانەی کە لە هەرێمی کوردستانن بەهۆی کۆمەڵێک هۆکار ناگەڕێنەوە زێدی خۆیان، بەتایبەت بەهۆی دۆخیی ئەمنییەوە و ئەوان لە هەرێمی کوردستان ئارام و ئاسوودەن''.

دەربارەی ئەوەی لە دوای ڕوداوەکانی 16ی ئۆکتۆبەری 2017ەوە لە دەشتی نەینەوا لەلایەن حەشدی شەعبییەوە هەندێک پێشێلکاری لەدژی خەڵک دەکرێت، سالم شەبەک، گوتی: بەڵێ حەشدی شەعبی لە ناوچەکەن و ناوچەکە لەڕووی ئەمنییەوە بە دەستی ئەوانە و لە بەشێک لە ناوچەکە پرۆسەی تەعریب بەڕێوە دەچێت''.