هەڵەبجە.. یادى قوربانیانى بیناسووتاوەکەى سیروان بەرز ڕاگیرا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

هەڵەبجە.. یادى قوربانیانى بیناسووتاوەکەى سیروان بەرز ڕاگیرا

بەڕێوەبەرایەتیى گشتیى کاروبارى شەهیدان و ئەنفالکراوانى هەڵەبجە، لە 36مین ساڵڕۆژى بیناسووتاوەکەى سیرواندا ڕێوڕەسمێکی بەڕێوە برد و تێیدا یادى قوربانیانى ناو ئەو بینا سووتاوەیان بەرز ڕاگرت.

ئەمڕۆ شەممە 6/8/2022، غەیدان حەسەن، گوتەبێژى بەڕێوەبەرایەتیى گشتیى کاروبارى شەهیدان و ئەنفالکراوانى هەڵەبجە، لەم بارەیەوە بە (باسنیوز)ى ڕاگەیاند: "ئەمڕۆ 36 ساڵ بەسەر ڕووداوى بیناسووتاوەکەى سیرواندا تیپەڕ دەبێت و وەک بەڕێوەبەرایەتیى گشتیى کاروبارى شەهیدان و ئەنفالکراوانى هەڵەبجە بە هاوکاریى بەڕێوەبەرایەتیى ناحیەى سیروان، بۆ بەرزڕاگرتنى یادى قوربانیانى ئەو بینا سووتاوە ڕێوڕەسمێکمان ساز دا''.  

ڕوونیشى کردەوە: "لە ڕۆژى 6/8/1986 کۆمەڵێک خێزانى ڕاگوازراوى گوندەکانى هەورامان، بەهۆى شەڕ و پێکدانانى نێوان عێراق و ئێرانەوە بۆ خۆپاراستن لەو شەڕە دەچنە ناو بینایەک لە ناحیەى سیروان کە بینای قوتابخانەیەکى تەواو نەکرابوو، بەڵام  تۆپێک بەر ئەو بینایە دەکەوێت و بەهۆى ئەوەى نەوت و گاز و بەنزینى خێزانەکان لە بەردەرگاى بیناکە دەبێت، بیناکە گڕ دەگرێت و لە ئەنجامدا نزیکەى 200 کەس لەناو بیناکەدا شەهید و نزیکەى 100 کەسیش بریندار دەبن''.

گوتیشى: "ساڵانە وەک بەڕێوەبەرایەتیى گشتیى کاروبارى شەهیدان و ئەنفالکراوانى هەڵەبجە لەم ڕۆژەدا چالاکى بەڕێوە دەبەین و یادى قوربانیانى ئەو ڕووداوە بەرز ڕادەگرین، بۆیە ئەمساڵیش ئەم ڕێوڕەسمەمان ساز دا و تێیدا چەند چالاکییەک بەڕێوە چوو''.