سوپای عێراق كارەبا لەسەر دوو گوندی سەرگەڕان دەبڕێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

سوپای عێراق كارەبا لەسەر دوو گوندی سەرگەڕان دەبڕێت

لە دوو گوندی سنووری ناحیەی سەرگەڕانی سەر بە قەزای دووبز، لەسەر داوای عەرەبی هاوردە، هێزەكانی سوپای عێراق كارەبای چەند بیرێكی ئاویان بڕی، بەرپرسێكیش دەڵێ ئەمە بە ئامانجی تەعریب دەكرێت و دەیانەوێت كورد لە گوندەكانی خۆیان بڕۆن.

جەواد محەمەد بەرپرسی ناوچەی دووبزی پارتی بە (باسنیوز)ی ڕاگەیاند، لەسەر داوای عەرەبە هاوردەكان، هێزەكانی سوپای عێراق كارەبایان لەسەر بیری گوندەكانی گابەلەگە و پەلكانەی سەر بە ناحییەی سەرگەڕان بڕی بۆ ئەوەی جوتیاران نەتوانن ئاوی ئەو بیرانە بۆ ئاودێری بەكار بهێنن.

هەروەها ئاماژەی بەوە دا كە بۆ كارەبای بیری ئاودێری گوندە عەرەبنشینەكانی سەر بە قەزای دووبز لە هێڵی 33وە كارەبایان پێدەدرێت كە كارەبای ئەو هێڵە فوولە، كەچی هێزەكان لەو دوو گوندەی كوردان كارەبا لەسەر بیرەكان دەكوژێننەوە.

گوتیشی ئەوەی كە دەگوزەرێ تەعریبە و ئامانج لێی ئەوەیە كە دانیشتوانی ئەو گوندانە گوندەكانیان چۆڵ بكەن و عەرەبی هاوردە لێی نیشتەجێ ببن.

ئێوارەی دوێنێ پێنجشەممە هێزەكانی سوپای عێراق، دوای بڕینی كارەبا و تێكدانی وایەرەكانی كارەبا لەسەر بیرەكانی ئاوی گوندەكانی گابەلەكە و پەلكانە، بە هەمەری سەربازی بەسەر بۆڕی و مڕەشەی جوتیاران كەوتن و شكاندیان بۆ ئەوەی رێگری بكەن لە كاری كشتوكاڵی جوتیاران.

ماوەیەكە لەسەر سكاڵای عەرەبە هاوردەكان لە چەند گوندێكی سەر بە ناحییەی سەرگەڕان هێزە سەپێندراوەكان رێگە نادەن جوتیارانی كورد كاری كشتوكاڵی بكەن.