“دڵنیا بن مامۆستا عه‌لی باپیر ژنی پێنجەم بێنێ نه‌ك ئێمه خه‌ڵكی دیكه دەیانتاسێنێت”
“گۆڕان تا ئێستا هه‌ڵوێستی دژی كۆمه‌ڵ نه‌بووه، هێرشه‌كانیان بەردەوام بن قسه‌ی جدییمان ده‌بێت”
ئەندامێكی جڤاتی نیشتمانیی بزووتنەوەی گۆڕان، وه‌ڵامی كۆمه‌ڵی دادگه‌ری ده‌داته‌وه و ئاماژه به‌وه ده‌كات كه كۆمه‌ڵی دادگەری، بزووتنه‌وه‌ی گۆڕانی له هه‌ستیارترین كاتدا جێ هێشت و گۆڕان تا ئێستا هه‌ڵوێستی دژی كۆمه‌ڵ نه‌بووه، به‌ڵام له‌گه‌ڵ به‌رده‌وامیی هێرشه‌كانیان قسه‌ی جدییمان ده‌بێت.
عه‌بدوڵا قادر فەقێ برایم، ئه‌ندامی جڤاتی نیشتمانیی گۆڕان، بۆ (باسنیوز) گوتی: "ئه‌و به‌یاننامه‌یەی كۆمەڵ ده‌ریانكردووه بابه‌تێكی سیاسییه، ئێمه نازانین ئەگه‌ر ئه‌و پیاوه‌ی كه مامۆستای هۆشیاری كوشتووه، سزاكه‌ی وه‌رگرتبێت و بەردەوام بێ لە وەرگرتنی، دواتر لەپای سەرکەوتنی لە خوێندندا خه‌ڵات بكرێت، چ گرفتێكه؟ له روانگه‌ی مرۆڤایه‌تییه‌وه ئه‌و بكوژه له زیندانه و ئێستاش باجی تاوانه‌كه‌ی ده‌دات، به‌ڵام هه‌رچییه‌ك بێت ئه‌گه‌ر بكوژیش بێت هه‌ر مرۆڤه و مافی هه‌یه بخوێنێت، كه له‌و شوێنه سه‌ركه‌وتنی هێناوه و ده‌بێت پاداشت بكرێت، نه‌ك له‌به‌ر تاوانه‌كه، له‌به‌رئه‌وه‌ی كه له بوارێك سه‌ركه‌وتوو بووه، مانای وایە وه‌زاره‌ته‌كه له كار و چالاكیی ئه‌و وه‌زیره‌دا چالاكه، بۆیه كراوه‌ته قامچی سیاسی و بەئامانج گیراوە”.
گوتیشی: "ئه‌وان به‌ناوی ئیسلامییه‌وه ئه‌میره‌كه‌یان ژنی چواره‌می هێناوه و خۆشیان دەڵێن شه‌رعیان جێبه‌جێ كردووه، به‌ڵام دڵنیا بن له ژنی 5ەمدا، كه پێچەوانەی ئیسلامه، ئه‌وكاته ئه‌گه‌ر ئێمه‌ش باسیان نه‌كه‌ین، خه‌ڵكی دیكه هه‌یه ئه‌و باسه بكات، تا برینیان بكولێته‌وه و بیانتاسێنێت”.
ئەو ئه‌ندامەی جڤاتی نیشتمانیی گۆڕان راشیگه‌یاند: “له به‌رژه‌وه‌ندیی كۆمه‌ڵ و مامۆستا عه‌لی باپیردا نییه له‌و دۆخه‌كه دژایه‌تیی گۆڕان بكه‌ن، هه‌رچه‌نده دوو سێ جار شتیان كردووه، كاتێك ئێمه له شه‌قام بووین و كاك نه‌وشیروان له شه‌قام بوو، ئێستاش گۆڕان له شه‌قام نه‌ماوه و ئۆپۆزسیۆنیش نه‌ماوه، ئه‌وانیش چی ده‌كه‌ن، ده‌بێت ئه‌و شتانه بوروژێنن، كه گۆڕان ئاوا و ئاوایه، گۆڕان هه‌ڵوێستی دیاره و تا كۆتایی له‌سه‌ر هه‌ڵوێستی خۆی به‌رده‌وامه، ئێمه له هیچ كاتێك كۆمه‌ڵمان جێنه‌هێشتووه، بەڵام كۆمه‌ڵ ئێمه‌ی به‌جێهێشتووه و ئه‌و بۆشاییە‌ی دروست بووه، كۆمه‌ڵ لێی به‌رپرسیاره نه‌ك ئێمه”.
1
2
3
4
5
6
7
8
