میدیای سەربەخۆ و نووسەری عەبقەری، لە كوێ بوون؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 31/07/2022

میدیای سەربەخۆ و نووسەری عەبقەری، لە كوێ بوون؟

دوێنێ و ئەمڕۆ، لە هەرێمی كوردستان، وێڕای گواستنەوەی رووداوەكانی خۆپیشاندانەكانی بەغدا، زوومی میدیاكانی هەولێر و دهۆك (دوێنێ لە فڕۆكەخانەی نێودەوڵەتیی هەولێر و ئەمڕۆ لە بارزان) لەسەر گواستنەوەی رێوڕەسمی شایستەی پێشوازیكردن و بەخاكسپاردنی روفاتی ١٠٠ رۆڵەی ئەنفالكراوی بارزانی بوو كە لە ساڵی ١٩٨٣دا، لەلایەن رژێمی بەعسەوە لەگەڵ حەوت هەزار و ٩٠٠ رۆڵەی تری بارزانی لە دڕندانەترین تاوانی جینۆسایددا ئەنفال كران و لە گۆڕە بەكۆمەڵەكانی بیابانەكانی باشووری عێراقدا، ژێرخاك نران.

لەم رووداوەی هەرێمی كوردستاندا، زۆربەی هەرە زۆری میدیاكانی زۆنی سەوز بەوانەی پەكەكەشەوە، كە هەرچەندە لە سلێمانیەوە بە زمانی كوردی پەخش دەكەن و خۆیان بە كورد و كوردستانی! دەزانن و هەندێكیشیان بەردەوام وەك حیكایەتی مێش بانگەشەی (بێلایەنی و سەربەخۆیی و ئەهلیبوون!)ی خۆیان دەكەن، دەتگوت لە گوێی گادا نوستوون، مێش میوانیان نەبوو! تەنانەت بە كورتەهەواڵێكیش باسیان لە هێنانەوە و بەخاكسپاردنی ١٠٠ رۆڵەی ئەنفالكراوی كورد نەكرد، سەیر ئەوەیە كە دێتە سەر گفتوگۆ و رەخنەیان لێ دەگریت، دەڵێن: ”تكایە گومانمان لێ مەكەن، ئێمە سەر بە نەیارانی كوردستان نین!“

من ئەگەر لە هەر بۆنەیەكدا بیری میدیاكارانی (سەربەخۆ و بێلایەن و ئەهلی!)ی زۆنی سەوز نەهێنمەوە، كە ئەوان بە ئەجیندای دەرەكی و بە پارەی دەرەكی بۆ دژایەتیی هەرێمی كوردستان و مافەكانی خەڵكی كوردستان خراونەتە گەڕ، دڵم دەتەقێت! ئاخر پێم بڵێن پاساوتان بۆ بڵاونەكردنەوەی هەواڵی هێنانەوە و بەخاكسپاردنی ١٠٠ رۆڵەی ئەنفالكراوی نەتەوەكەتان، چیە؟ ئایا ئێوە لە كوردستان ناژین و بێئاگان لەو هەواڵە؟ یان لەو خولە رۆژنامەوانیانەی كە لە ئەسفەهان بۆتان رێك دەخرێت، وەها فێر كراون كە ئەو جۆرە رووداوانە نابنە هەواڵ؟ یان بە فەرمانی دەرەكی ناتانەوێ بایەخ بە قوربانیی گەورە و سەروەرییەكانی كوردستانیان بدەن؟ یان دەترسن بڵاوكردنەوەی ئەو هەواڵە، زیانی بۆ (بێلایەنی و سەربەخۆیی و ئەهلیبوون)تان هەبێت و لە پیشەییبوون و پرۆفیشناڵیتان كەم بكاتەوە؟

باسی ئەو كەسانەش ناكەم كە خۆیان ناو ناوە (نووسەر و رۆشنبیر و شاعیر و ئەدیب و ئەم جۆرە شتانە) بەڵام بە مێشك و ئاوەزێكی تەسك و تەنگەبەر و قەتیسكراوی حزبی و شارچییانە بیر دەكەنەوە، ئاخر رێبوار سیوەیلی زۆر جوانی بۆ هاتووە كە لە پۆستێكی فەیسبووكدا نووسیویەتی: ”ئەمڕۆ نووسەرە عەبقەرییەکانی کورد، کەمترین قسەیان لەبارەی ئەنفالی بارزانییەکانەوە هەیە!
بارزانییەکانیش کوردی ڕەسەنن ڕۆحەکەم، لەو سجنی شارچێتییە وەرنە دەر چاوەکەم...
بڕووخێ شارچێتی و دەڤەرپەرستی...“

ئەگەر تۆ نووسەرێكی كوردیت و بەڕاستی رۆشنبیریت و دەست و مێشكیشیت كاران و دڵێكیش شك دەبەیت و رۆژانە لە بچووكترین رووداودا، لە سۆشیال میدیاوە وتار و قسەی زل و پەیامت هەیە؟ چۆن ئەو دیمەنە ویژدانهەژێن و مرۆییانەی دوێنێ و ئەمڕۆی كەسوكاری ئەنفالكراوە بارزانیەكانی نەتەوەكەت، تەزوویێك بە جەستەتدا ناهێنێت؟ چۆن ئەو هەموو حەشامات و گریان و لاوانەوەیەی ئەو دایكە پرچ سپی و جەرگسووتاوە بارزانییانە و ئەو پیاوە پیر و نوورانییانەی لە مۆنۆمێنتی ئەنفالكراوانی بارزان هۆن هۆن فرمێسكیان بۆ شەهیدانی ئەنفال دەڕشت، ئیلهامی دوو دێڕی نێو فەیسبووكیشت پێنابەخشێت؟

پرسیارم هەم بۆ میدیاكارانی (سەربەخۆ و بێلایەن!) و هەم بۆ (نووسەرە عەبقەرییەكان!) ئەمەیە: نازانم، ئەمەی ئێوە دەردی حزبایەتییە، یان شارچێتی و دەڤەرپەرستییە، یان تەسكبیرییە، یان رق و كینەیە، یان ترسە، یان خۆفرۆشییە، یان نەخۆشییە؟ وەڵامی من مەدەنەوە، خۆتان بیر لەو دۆخە دەروونیەی خۆتان بكەنەوە.