جرج لە بەشێك لە گەڕەكە كۆنەكانی شاری هەولێر زۆر بووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

جرج لە بەشێك لە گەڕەكە كۆنەكانی شاری هەولێر زۆر بووە

“لەنێو هەندێك مەزراكان هیچ رێگرییەك دانەنراوە و لەوێوە دێتە ناو ئاوەڕۆی ماڵان”

خەڵكی بەشێك لە گەڕەكەكانی هەولێر، بەهۆی زۆربوونی جرج و مشك هەراسان بوونە، كۆمپانیایەكی قەڵاچۆكردنی جرج و قرتێنەرەكانیش باس لەوە دەكات، كە بەهۆی گەرما و سیستەمی ئاوەڕۆوە، جرج لە بەشێك لە گەڕەكە كۆنەكانی شاری هەولێر زۆر بووە.

پێشڕەو سەلام، ماڵی لە گەڕەكی تەیراوەی هەولێرە، باس لەوە دەكات، كە جرج هەراسانی كردوونە، رۆژانە بە تەڵەی تایبەت، دانەیەك بۆ دوو دانە ڕاو دەكات، دەشڵێت: ”گشت ماڵەكان وەك من گرفتیان هەیە، لە وەرزی هاوین جرج زۆر دەبێت، لە زستانیش هەیە، بەڵام بەو ڕادەیە نییە“.

ئەو هاووڵاتییە، بۆ (باسنیوز)، ئاماژە بەوەش دەدات، كە چەندین جۆری ژەهریان بەكار هێناوە، بەڵام جرج هەر هەیە و بەردەوامە: ”پەیوەندیم بە كۆمپانیای تایبەت بە قڕكردنی ئەو جرجانەش كردووە، نرخیان خەیاڵییە، بەتایبەت لەوكاتەدا و بۆ كەسێكی كرێچی نرخەكە زۆرە“.

دڵزار عەزیز، سەرۆكی یەكێك لە تیمە گەڕۆكەكانی كۆمپانیایەكی قەڵاچۆكردنی قرتێنەر و مێرووه‌، وەك: جرج، مشك، سیسرك و مێروولەكانە، باس لەوە دەكات، كە كاری ئەوان لە 15ی مانگی نیسانەوە دەست پێدەكات، چونكە وەرزی گەرمایە و جرج و مێرووەكان زۆر دەبن و تا مانگی 11 بەردەوام دەبێت، رۆژانە دەیان ماڵ دەكەن، بۆ ئەوەی راوی جرج و قرتێنەر و ژەهرڕژێنیان بكەن.

ئاماژە بەوەش دەكات، كە گەڕەكە كۆنەكان زیاتر گرفتی جرجیان هەیە، وەك ئازادی، ئیسكان، بازاڕ و دەوروبەری گەڕەكی عەرەبان، هۆكارەكەش بۆ ناڕێكیی سیستەمی ئاوەڕۆ دەگەڕێتەوە و دەڵێت: ”زۆربەی ماڵەكان سیستەمی ئاوەڕۆیان شاراوەیە و تێكەڵی ئاوەڕۆی سەرەكی دەبێتەوە، ئەوە یەكێكە لە هۆكارەكان، بە تایبەت لەنێو مەزراكان هیچ رێگرییەك دانەنراوە، پڕۆژە هەیە رێگری بۆ دانرابێت، چونكە لە مەسەلەی بوونی جرجدا، یەكەم شت بۆ چارەسەری ئەوەیە، كە شوێنی هاتنی ئەو جرجە بزانی“.

سەرۆكی ئەو تیمە، ئەوەش دەخاتە ڕوو، كە كۆمپانیاكەی ئەوان چەندین تیمی هەیە، تەنیا ئەو تیمەی ئەو سەرۆكییەتی، رۆژانە لەنێوان 25 بۆ 35 جرج لەناو دەبەن، دەشڵێت: ”جرج نایەتە شوێنێكی پاك و خاوێن، حەزی لە شوێنی پیس و شێواوە، حەزی لە كۆگایە، لە شوێنێك نایلۆن و كاغەز كۆ بكاتەوە، حەزی لە پەرشوبڵاوی و شێواوییە“.

دڵزار جەخت لەوە دەكاتەوە، كە جرج گیانلەبەرێكی زۆر زیرەكە، بەتایبەتی لە كاتی ژەهراویكردنی، هەر خۆراكێكی بۆ دابنرێت، ئەگەر دەستی مرۆڤی پێ كەوتبێت نایخوات: ”ئەگەر ژەهر و هەر خواردنێكی بۆ دابنرێت نایخوات، چونكە دەزانێ بە دەستی مرۆڤ دانراوە، جاری وا هەیە سێ رۆژ برسی بێت، ئامادە نییە بیخوات، تەنیا لە كاتی ناچاریدا نەبێت، بۆیە هەر خواردن و تەڵەیەكی بۆ دابنرێت، پێویستە بە دەستەوانە بۆ دابنرێت“.