ئەڵمانیا.. پێشبینی دەكرێت گازی سروشتی نرخەكەی سێ بەرامبەر زیاد بكات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەڵمانیا.. پێشبینی دەكرێت گازی سروشتی نرخەكەی سێ بەرامبەر زیاد بكات

 

نرخی گازی سروشتی لە ئەڵمانیا تا دێت گران دەبێت، بەگوێرەی پێشبینی سەرۆكی ئاژانسی (ئاغ)ی فیدڕاڵی ئەڵمانی، رەنگە نرخی گازی سروشتی سێ بەرامبەر زیاد بكات.

موللەر، سەرۆكی ئاژانسی (ئاغ)ی فیدڕاڵی ئەڵمانی، دەڵێت ئەگەر هەر خێزانێك لە ساڵێكدا 1500 یۆڕۆیان بە گازی سروشتی دابێت، بۆ ئەمساڵ دەبێت 4500 یۆڕۆ بدەن.

موللەر قسەی بۆ ئاژانسی (DW)ی ئەڵمانی كردووە و دەڵێت: ”ئەوانەی لە ئەڵمانیا گازی سروشتی بەكاردەهێنن، دەبێت خۆیان ئامادە بكەن كە ئەو گازە سروشتییەی بۆ گەرم كردنەوە بەكاری دەهێنن، رەنگە چەند جارێك ببرێت و نەمێنێت. هەروەها ئەوەش راستی تێدایە كە ئەگەر لە ساڵێكدا 1500 یۆڕۆیان بە گازی سروشتی داوە، بۆ ئەمساڵ دەبێت 4500 یۆرۆ بدەن، چونكە لە بۆرسەی وزەی جیهانیدا، نرخی گازی سروشتی حەوت بەرامبەر زیادی كردووە“.

موللەر، دوو پێشنیار دەداتە هاووڵاتیان بۆ ئەمساڵ، یەكەمیان ئەوەیە كە رۆژانە بڕێك پارە هەڵبگرن و لە شوێنێكدا دایبنێن وەكوو دەخیلەیەك بۆ كڕینی گازی سروشتی بەكاری بهێنن، تا كاریگەری گرانی نرخەكەی زۆر نەبێت لەسەریان.

پێشنیاری دووەمیش ئەوەیە، وەستایەكی باش بهێننە ماڵەكانیان و گازی سروشتی ماڵەكانیان چاك بكەنەوە بەو شێوەیەی كە كەمتر پارەی گازی سروشتیان بۆ بێتەوە، چونكە زۆربەی كۆمبییەكانی ماڵان لە ئەڵمانیا بە باشی كار ناكەن و مانگانە پارەیەكی زۆری گازی سروشتی بۆ هاووڵاتی دێتەوە، بۆیە پێویستیان بە چاككردنەوە هەیە.

خراپترین سیناریۆ بۆ بەشێكی وڵاتانی ئەورووپی ئەوەیە، كە لەمساڵدا هیچ گازێكی سروشتی نەدەنە هاووڵاتیانیان، بەڵام ئەو ئەگەرە لاوازە، چونكە هەریەك لە وڵاتانی ئەڵمانیا، بەلجیكا، هۆڵەندا و نەرویژ، تاوەكوو ئێستاش لە بەندەرەكانیانەوە كازی سروشتی هاوردە دەكەن و كۆگای دەكەن.

كۆگاكانی ئەڵمانیا 62% گازی سروشتی تێدایە، ئەمەش دوای ئەوەی رووسیا ناردنی گازی سروشتی بۆ ئەڵمانیا سنووردار كرد، بۆیە قەیرانی گازی سروشتی لەمساڵدا لە ئەڵمانیا سەر هەڵدەدات و تاوەكوو ئێستا حكوومەت پلانێكی گرنگ و بڕواپێهێنەری بۆ رووبەڕووبوونەوەی ئەو بێگازی و قەیرانە پێ نییە.

دوای ئەوەی جەنگی رووسیا و ئۆكڕانیا دەستپێكرد، رووسیا گازی سروشتی بۆ ئەورووپا كەم كردەوە، كە زۆربەی وڵاتانی ئەورووپی پشت بە گازی رووسیا دەبەستن بۆ گەرم كردنەوە و كارگە گەورەكانیان، ئەورووپاش تاوەكوو ئێستا بەدیلیان بۆ گازی سروشتی رووسیا نەدۆزیوەتەوە.

وەكوو ئەوەی لە میدیاكانەوە باس دەكرێت، وڵاتانی ئەورووپی 55%ی گازی سروشتیان لە رووسیاوە دابین دەكرێت و ئەگەر ئەو گازەیان لەسەر ببڕێت، دووچاری قەیرانێكی سەخت دەبنەوە.