رێباز بێركۆتی: پێویستە یەكێتی و پارتی بە یەك شێواز مامەڵە لەگەڵ بەغدا بكەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

رێباز بێركۆتی: پێویستە یەكێتی و پارتی بە یەك شێواز مامەڵە لەگەڵ بەغدا بكەن

“گرنگە هەوڵی دروستكردنی كۆدەنگی بۆ هەموو پرسە نیشتمانییەكان بدرێت“

بەرپرسێکی یەکێتیی نیشتمانیی کوردستان بە پێویستی دەزانێت، کە حزبەکەی لەگەڵ پارتیدا بە یەک فۆرم مامەڵە لەگەڵ حزبە کوردییەکانی پارچەکانی دیکەی کوردستاندا بکەن، لەبەرامبەردا، سەرکردەیەکی پارتی، پەکەکە بە هۆکار بۆ لێدان لە بەرژەوەندییە باڵاکانی کوردستان تۆمەتبار دەکات.

رێباز بێرکۆتی، سەرۆکی فراکسیۆنی یەکێتی لە ئەنجوومەنی پارێزگای هەولێر بە (باسنیوز)ی راگەیاند: “پێویستە یەکێتی و پارتی لە هەموو پرسە نیشتمانی و نەتەوەییەکان کۆدەنگیی دروست بکەن، بە یەك شێواز مامەڵە لەگەڵ سیاسەتی نێودەوڵەتی و بەغدا و حزبە ئۆپۆزسیۆنەکانی وڵاتان لەنێو هەرێمی کوردستاندا بکەن“.

هاوکات ئەو بەرپرسەی یەکێتیی نیشتمانی بە گرنگی دەزانێت، کە حزبەکی لەگەڵ پارتی، خاڵە هاوبەشەکانیان بەهێز بکەن، تا ئەم ئەزموونەی هەرێمی کوردستان پارێزراو بێت و ئارامیی لێ تێک نەچێت.

لای خۆیەوە، بڵند ئیسماعیل، ئەندامی سەرکردایەتی و بەرپرسی لقی ١٦ی پارتی، بە (باسنیو)ی راگەیاند: “یەكێك لەو لایەنانەی زۆرترین هەوڵ بۆ تێكدانی یەكڕیزیی كورد دەدات، پەکەکەیە، ئەو حزبە هەر هەنگاوێک بهاوێت، گومانی لێ دەکرێت، چونكە پەکەکە لە کوێ پارێزگاری لە خەڵکی باکوور دەکات؟ لە مەخموور، مەتین، قەندیل، شنگال، زاب و کارۆخ؟ ئامانج و مامەڵەی پەکەکە روونە، کە لێدانی بەرژەوەندییەکانی کوردە و لە کوێ دەستکەوت بۆ کوردستان هەبێ، هەوڵی تێکدانی دەدات، ئێستا بەو ئاراستەیە هەنگاو دەنێت، كە هەرێمی کوردستان لاواز بکات و ئەوان ببن بە بەدیلی دەستەڵات، هەر وەک چۆن وایان کرد، کە سۆزی کۆمەڵگەی نێودەوڵەتی بۆ رۆژئاوای کوردستان نەمێنێت“.

هاوکات ئەوەشی خستە روو، کە گرنگترین شت بۆ پەکەکە قازانجی مادییە لە رێی بازرگانیکردن بە تلیاک و چاندنی، هەروەها سیخوڕیکردن بۆ وڵاتان، ئەوەی لە کۆمەڵگەی نێودەوڵەتیدا خراپ و قەدەغەیە ئەوان دەیکەن،  گوتیشی: “پەکەکە بەو چەکانەی هەیەتی و بەو هێزەی ناوی لێناوە گەریلا، نەماندی گورزێك لە دوژمنانی کورد بدات و لە مەیدانی راستەقینەیدا بەکاری بێنێت، بەپێچەوانەوە، لە باشوور، رۆژئاوا و رۆژهەڵات، تەنیا بۆ لێدانی بەرژەوەندییە بەڵاکانی کورد بەکاری دێنێت”.