لە سنووری ئیدارەی گەرمیانیش لەسەر فەرمانەكەی مەسرور بارزانی سەرۆكی حكوومەتی هەرێمی كوردستان دەست بەسەر چەكی بێ مۆڵەتدا دەگیرێت و هەڵمەتی دەستبەسەرداگرتنی چەك لە شارو شارۆچكەكان دەستی پێكردووە.

بەپێی ڕاگەیاندنراوێكی ئیدارەی گەرمیان كە وێنەیەكی دەست (باسنیوز) كەوتووە و تێیدا هاتووە، بەفەرمانی سەرۆکی حکوومەتی هەرێمی كوردستان و لەسەر ڕاسپاردەی وەزارەتی ناوخۆ، بۆ رێگری لە دیاردەی چەک هەڵگرتن، ئێوارەی ڕۆژی پێنجشەممە 30ی 6ی 2022 سەرپەرشتیاری ئیدارەی گەرمیان لەگەڵ دەزگا ئەمنییەکان کۆبووەوە و لەو بارەوە چەند بڕیارێک دران.

ئەوەش خراوەتە ڕوو، لە کۆبووەنەکەدا، جەلال شێخ نوری سەرپەرشتیاری ئیدارەی گەرمیان رایگەیاند، بۆ جێبەجێکردنی بڕیاری تایبەت بەرێگری لە دیاردەی چەکهەڵگرتن، لە قەزا و ناحییەکانی سنووری ئیدارەی گەرمیاندا ڕێکاری پێویست دەگرینەبەر، بۆ ئەو مەبەستەش دەزگا ئەمنیەکان ئەرکەکانیان رادەپەڕێنن. هەر لە کۆبوونەوەکەدا رێکارەکانی جێبەجێکردنی بڕیارەکە بۆ دەستبەسەرداگرتنی چەکی بێ مۆڵەت و مامەڵەکردن بە چەکەوە تاوتوێکران و بۆ ئەو مەبەستە ئەم بڕیارانەی لای خوارەوە دران.

1. پێکهێنانی لیژنەیەکی باڵا بەسەرپەرشتی سەرپەرشتیاری ئیدارەی گەرمیان و ئەندامێتی بەڕێوەبەرایەتی ئاسایش و پۆلیس و پۆلیسی بەرگری و فریاکەوتن و هاتوچۆی گەرمیان و نوێنەری هێزەکانی پێشمەرگە لە سنوورەکە.
2. داخستنی سەرجەم ئەو دوکان و شوێنانەی چەکی بێ مۆڵەت و مۆڵەتدار دەفرۆشن.
3. دانانی مەفرەزەی هاوبەشی دەزگا ئەمنییە پەیوەندیدارەکان لە بازگەکانی سنووری ئیدارەی گەرمیان بۆ دەستبەسەرداگرتنی چەک بێ مۆڵەت.
4. ڕێگە نادرێت بە هیچ کەسێک بە هەڵگرتنی چەک جگە لەو هێزە نیزامیانەی لە ئەرکی فەرمیدان.
5. بنکەی پۆلیسی زانکۆی گەرمیان رادەسپێردرێت بۆ گرتنەبەری هەمان ڕێکار بەمەبەستی ڕێگری لە هەڵگرتنی چەک بۆ ناو حەرەمی زانکۆ.
6. سەرپێچیکاران ڕووبەڕووی یاسا دەکرێنەوە.