لەبارەی کرێی کارەبای مۆلیدە ئەهلییەکان روونکردنەوە دەدرێ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لەبارەی کرێی کارەبای مۆلیدە ئەهلییەکان روونکردنەوە دەدرێ

 

لێپرسراوی لێژنەی مۆلیدە ئەهلییەكان لە پارێزگای هەولێر، لەبارەی دەنگۆیەکی نرخی کرێی مۆلیدە بۆ ئەو مانگە ڕوونکردنەوە دەدات.

هەندێک زانیاری بڵاوکراوەتەوە، گوایە پارەی مۆلیدە بۆ ئەو مانگە بۆ هەر ئەمپێرێک زیاتر لە 25 هەزار دەبێ.

لەبارەی ئەو بابەتە، ئەندازیار قارەمان مەولوود، لێپرسراوی لێژنەی مۆلیدە ئەهلییەكان لە پارێزگای هەولێر، بە (باسنیوز)ی ڕاگەیاند: "ئەو زانیاری و دەنگۆیە هەڵەیە، ئەگەر نرخی گازوایل بەم شێوەیە بێت و کارەبای نیشتمانی ئەوها بێت، نرخی ئەمپێرێک کارەبای مۆلیدە نێوان 18 بۆ 20 هەزار دینار دەبێت، بەڵام جارێ نرخ دانەندراوە".

جەختی کردەوە، بەپێی ماوەی پێدانی کاتژمێرەکان و نرخی گازوایل نرخ دیاری دەکرێت.

لە مانگی ڕابردوودا، نرخی یەک ئەمپێری مۆلیدە لە هەولێر لەنێوان 9 هەزار و 500 دینار بۆ 12 هەزار دینار بوو، بۆ مانگی چواریش، نرخی یەک ئەمپێر لەنێوان 10 هەزار بۆ 12 هەزار و 500 دینار بووە.

قارەمان مەولوود گوتیشی: "لەبەر گەرما مۆلیدەکان ناچار بوونە کارەبای زیاتر بدەن، چونکە کارەبای نیشتمانیش کەم بووە، گازوایلیش زۆر گرانە، بۆیه نرخەکە زیاد بووه".

ئەوەشی خستەڕوو، بەراورد بە ساڵی ڕابردوو، نرخی گازوایل دوو بەرامبەر زیادی کردووە و پێی وایه، ئەوەش هۆکارێکی سەرەکیی گرانبوونی کرێی مۆلیدەیه.

پێشتر، ئومێد خۆشناو، پارێزگاری هەولێر بە (باسنیوز)ی راگەیاند: ”لە وەرزی هاویندا لە هەولێر ژمارەی پێدانی كاتژمێرەكانی كارەبای مۆلیدە زیاد دەكات، ئەم مانگە پێشبینی دەكرێت نرخی ئەمپێری مۆلیدە بەرز ببێتەوە، هۆكارەكەش ئەوەیە، كە کەشی هەولێر گەرمە و بەبێ کارەبا نابێت، بۆیە ناچارین لەم چەند مانگەی هاویندا لە رێگەی مۆلیدە ئەهلییەکان کارەبا بۆ دانیشتوان دابین بکەین، بەمەش سەعاتەكانی کارەبای مۆلیدەکان زیاتر دەبێت و نرخیش زیاد دەبێت.“

ئومێد خۆشناو، گوتیشی: ”پێدانی کاتژمێرەکانی کارەبا لە پارێزگایەكەوە بۆ یەكێكی دیكە جیاوازە و نرخەكانیش جیاوازن، پاشان بابەتەکە دێتەوە بەردەستی پارێزگارەکان، واتە هیچ شارێک ناتوانێت لە خۆیەوە بڕیار بدات. لێژنەی مۆلیدە ئەهلییەکانی هەولێر بۆی نییە زوڵم لە خەڵک بکات.“