ئێوە تەنیا خیانەت مەكەن، بەرگری بۆ خەڵكی تر واز لێ بێنن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
هەرمن ئەحمەد 29/06/2022

ئێوە تەنیا خیانەت مەكەن، بەرگری بۆ خەڵكی تر واز لێ بێنن

لە سەروبەندی هێرشە تیرۆریستی و تێكدەرەكانی چەند رۆژی رابردوو بۆ سەر كێڵگەی غازی كۆرمۆر، هەندێ میدیای كوردی! هەم خەڵكی كوردستانیان دەترساند، هەم بێئومێدیان دەكردن، هەم بە مەبەستێكی گڵاوی دوژمنكارانە، ئەم پرسیارەیان كرد: ”ئەگەر سوپای عێراق هێرش بكاتە سەر خاكێ هەرێمی كوردستان، ئامادەیت بەرگری بكەیت؟“ هەر لەو میدیایانەوە، قسە و لێدوانی هەندێك بەناو (نووسەر و شاعیر!)م بینی، نووسیبوویان: ”ئێمە ئامادە نین بە فیشەكێكیش بەرگری لە هەرێمی كوردستان بكەین!“ سەرەتا من بەو برادەرانە دەڵێم: ”ئێوە تەنیا خیانەت مەكەن، ئیدی بەرگری واز لێ بێنن بۆ پێشمەرگە و خەڵكی دڵسۆزی كوردستان، چونكە بەرگریكردن لە كوردستان هەرگیز كاری خەڵكی وەكوو ئێوە نەبووە.“

ئنجا ده‌پرسم: سووده‌كانی ئەو جۆرە میدیا كوردییەی بەم شێوەیە كار دەكەن، بۆ بینه‌ر و خوێنه‌ری كورد و بۆ كوردستان چیین؟ بەڕاستی هەندێك میدیای كوردستان، دەستیان داوەتە شێوازێكی زۆر ناپیشەیی و زەرەرمەند لە كاركردن. ئاخر نووسینی هه‌واڵی دروستكراو! و گوتاری هه‌ندێك له‌ میدیاكاره‌كان له‌و چه‌كانه‌ زۆر مه‌ترسیدارتره‌ كه‌ دوژمنانی خاك و گەلی كوردستان، لەدژمان بەكاری دەهێنن، ئەگه‌ر گوزه‌رێك به‌ناو هەواڵ و بابەتەكانی ئەو میدیایانە و پەیجەكانیان لە سۆشیال میدیا بكه‌یت، به‌ نیو سەعات دونیای تۆ و من و نه‌وه‌كانمان ره‌شبین ده‌كات، ترس و تۆقین و خه‌م ئه‌خاته‌ دڵی تاك به‌ تاكی هه‌رێمی كوردستان، سووكایەتی بە (بەرگریكردن لە نیشتمان) دەكات.

دیسان دەپرسم: ئه‌م شێوازە لە میدیا و ئەم جۆره‌ گوتارانه‌ له‌پای چی و بۆ بەرژەوەندیی كێ؟ من وه‌ك خۆم باش له‌وه‌ تێگه‌یشتووم، ئه‌وانه‌ بۆچی و لەپێناو چی وا ده‌كه‌ن و بە چ ئەجیندایە كار دەكەن! لێ كه‌سانێك هه‌ن جارێ له‌ نیه‌تی ناپاكیان تێنه‌گه‌یشتوون. كرۆكی كاری راگه‌یاندن، گەیاندنی زانیاری و هەواڵ و را و بۆچوون و شرۆڤەیە لەسەر رووداوەكان، بەڵام ئەوەی ئەو جۆرە میدیا گوماناوییە دەیكەن، جگە لە پرۆژەیەك بۆ دژایەتیی كوردستان و خەڵكی كوردستان و جیبەجێكردنی ئەجیندای دوژمنان و نەیاران، هیچی تر نیە، خۆش ئەوەیە هێشتاش ئەوان ناویان لە خۆیان ناوە (سەربەخۆ و ئەهلی و بێلایەن!)

ئاخر كە تۆ میدیاكارێك بوویت و لە خیتاب و هەواڵەكانتدا لایەنگری دەوڵەت و هێزگەلی داگیركەری كوردستان بوویت، ئیتر بێلایەنی چیت؟ كە تۆ بە نووسین و ڤیدیۆ و لێدوان، سەر بە نەیارانی كوردستان بوویت، ئیتر بانگەشەی سەربەخۆیی چیم بۆ دەكەیت؟ چۆن دەبێ تۆ میدیایەكی كوردستان بیت و بانگەشەی سەربەخۆیی و ئازادی بكەیت، كەچی لە كارەكانتدا دژی ئازادی و سەربەخۆیی كوردستان بیت؟
من و زۆربەی خەڵكی كوردستانیش، لە ناوەڕۆك و مەبەستی پشت مانشێتەكانیان تێگەیشتووین، ئەوان بەئاشكرا دژایەتیی هەرێمی كوردستان و خەڵكەكەی و مافەكانی دەكەن، كەچی هێشتا ئەوان بە خەڵكی تر دەڵێن: ”بە دوژمنمان مەزانن!“

ڕاسته‌ لە هەرێمی كوردستاندا، لە زۆر رووەوە هه‌ڵه‌ و كه‌موكورتی و كێشە و گرفت و قەیران هەن، زۆر ئاساییە لە میدیاكانەوە بەردەوام باسی ئەم كەموكوڕییانە بكرێت و رەخنەی لێ بگیرێت تا بنبڕ دەبن، بەڵام كاتێ سەرۆك وەزیرانێكی وەكوو مەسرور بارزانی دێت و دەڵێ من چاكسازی دەكەم، هەنگاوی بۆ دەنێت، بڕیاری گرنگی بۆ دەردەكات، رێژەی گەندەڵی كەم دەكاتەوە، من تێناگەم تۆی (میدیاكاری سەربەخۆ و بێلایەن!) بۆچی دژی چاكسازی دەوەستیتەوە؟ بۆچی نابیتە هاوكارێكی باش بۆ پرۆسەی چاكسازی؟ ئەگەر كێشەت ئەوەیە كە مەسرور بارزانی چاكسازی دەكات و ئەویش سەرۆك وەزیرانێكی پارتییە، بۆیە دژی چاكسازییەكەیت، باشە مافی خۆتە، بەڵام لای من و خەڵك مەڵێ: ”بێلایەن و سەربەخۆم!“

ئەگەر تۆ دژی ریفراندۆمی سەربەخۆیی كوردستانیت، تەنیا لەبەر ئەوەی رابەرێكی وەكوو سەرۆك مەسعود بارزانی سەرپەرشتیی پرۆسەكە دەكات؟ ئەمە هیچ كاری میدیا و رۆژنامەوان نیە، تەنانەت هەڵوێستێكی سیاسییش نیە، بەڵكوو نەخۆشییەكی دەروونی و فۆبیایە، بۆیە لەبری ئەوەی رەخنە لە پرۆسەكە بگرێت، وا باشترە سەرەتا بچیتە لای پزیشكی دەروونی و چارەسەری خۆت بكەیت!

ناونیشانی یه‌كێك له‌ وتاره‌كانی (د. محەمەد‌ قیرات)م خوێنده‌وە، زۆر سه‌رنجڕاكێش بوو، ده‌ڵێت: ” فساد الاعلام یفسد الامة“ واتە (گه‌ندڵبوونی راگه‌یاندن، نه‌ته‌وه‌یه‌ك گه‌نده‌ڵ ده‌كات) جا ژینگه‌ی هه‌رێمی كوردستان وا هه‌ڵكه‌وتووه، زۆر زوو به ‌ده‌وروبه‌ریان كاریگه‌ر ده‌بن. مه‌به‌ستمه‌ بڵێم، ئه‌وانه‌ی ئه‌و ده‌زگا میدیایانه‌ به‌ڕێوه‌ ده‌به‌ن، له‌ هه‌موو كه‌س گه‌نده‌ڵترن، چونكه‌ جێبه‌جێكاری ئه‌جێندای ده‌ره‌كیین و دژی وڵاتی خۆیانن، ملكه‌چی فه‌رمانه‌كانی سپۆنسه‌ره‌كانیانن، هه‌ر بۆیه‌ خەڵك هەمووی گەیشتوونەتە ئەو قەناعەتەی كە میدیای سه‌ربه‌خۆ له‌ هه‌رێمی كوردستاندا نییە.
ئه‌و فه‌زایه‌ی ئەو بەشە لە راگه‌یاندنی كوردی دروستی كردووه،‌ دووره‌ له‌ هه‌موو بنه‌ما و پرەنسیپه‌كانی پیشه‌ی میدیاكاری راستەقینە. ‌

له‌ زۆربه‌ی وڵاتانی دونیادا پرەنسیپ و یاسا و رێسا هه‌یه،‌ بۆ نموونه‌ له‌ هه‌ندێك وڵاتی ئه‌ورووپا هه‌ر هه‌واڵێك كه‌ مه‌ترسیی بۆ سەر ئاسایشی نه‌ته‌وه‌یی هه‌بێت، بڵاوكردنەوەی قه‌ده‌غه‌یه‌. هه‌ر ڕووداوێكی تیرۆریستی كه ‌ڕوو بدات، راگه‌یاندنه‌كانیان پیشه‌ییانه‌ مامه‌ڵه‌ له‌گه‌ڵ رووداوه‌كە دەكەن و بەرژەوەندیی وڵاتی خۆیان دەخەنە پێش هەر مەبەست و ئامانجێكی تر، نموونه‌یه‌كی دیكەی پره‌نسیپه‌كانی كاری ڕاگه‌یاندن و پیشه‌ی میدیاكاره‌كانی ڕۆژئاوا ئه‌وه‌یه‌، ڕۆژانه‌ رووداوی سه‌یر و خۆكوژی و دزین له‌و ئه‌ورووپایه‌ ڕوو ده‌دەن، رۆژانه‌ گوێمان له‌ ده‌نگی ئۆتۆمبێلە‌كانی پۆلیس و ئه‌مبۆڵانس ئه‌بێت، بەڵام كه‌م ده‌بیستین ئه‌و هه‌واڵه‌نه‌ بڵاو بكرێنه‌وه،‌ چونكه‌ پێیان وایه‌ زۆر باسكردن و بڵاوكردنه‌وه‌ی ئه‌و هه‌واڵانه كۆمەڵگە نائارام ده‌كات.

به‌پێچه‌وانه‌وە لە وڵاتی ئێمه‌، زۆربەی میدیا گوماناوییەكان! كار بۆ ئه‌وه‌ ده‌كه‌ن، زۆرترین هه‌واڵە ناخۆشه‌كان بگه‌یەنن، بەبێ ئەوەی هه‌واڵه‌ خۆشه‌كان و چاكسازی و ئاوه‌دانكردنه‌وه‌ باس بكه‌ن، چونكه‌ پێیان وایه‌ گه‌ر لایەنه‌ باشه‌كانی كاری حكوومه‌ت باس بكه‌ن، ئه‌وا ده‌بێت به‌ ده‌سكه‌وتێك بۆ كابینه‌ حكوومییەكەی مه‌سرور بارزانی.

دیسان ده‌پرسم: بۆچی دەبێ هەندێ میدیاكاری كورد، ئازار به‌وه‌ نه‌چێژن كە ئێران و میلیشاكان هه‌ولێری پایتەختی كوردستان مووشەكباران و درۆنباران دەكەن؟ نەك هەر پێیان ناخۆش نیە بەڵكوو جۆرێك لە خۆشحاڵی دەردەبڕن و پاساوی نابەجێ و بێبنەما بۆ ئەو كارانەی مووشەكهاوێژان دەهێننەوە! بۆچی هەندێ میدیاكاری كورد پێیان خۆش بێت به‌غدا بودجه‌ی هه‌رێمی كوردستان دەبڕێت؟ بۆچی هێنده‌ به ‌كه‌یفه‌وه ‌ده‌نووسن: ”دۆخه‌كه‌ ئاڵۆزه‌! كۆتاییهێنان به‌ نه‌وتی هه‌رێمی كوردستان ده‌ستی پێكرد! كاتژمێری سفر بۆ هێرشكردنە سەر هەرێمی كوردستان دانرا“ ئەگه‌ر هێنده بێگانه‌په‌رستن و دڵخۆشن بە جاشێتی و ملكەچی و تەسلیمبوون، فەرموون دەرگا كراوەیە بڕۆن لە بەغدا و بەسڕە بژین و لەنزیكەوە خزمەتی ئاغاكانتان بكەن.

زۆرم پێخۆشە ئەو میدیاكارانەی دژی هەڕیمی كوردستانن و لە بەرژەوەندیی دەسەڵاتدارانی بەغدا قسە دەكەن و هەواڵ بڵاو دەكەنەوە، گوێ له‌ قسه‌كانی كاكه‌ حه‌مه‌ی هه‌نگوینفرۆش بگرن، كە كه‌سایه‌تیی دیاری شاری سلێمانیە و لەم رۆژانەدا بە لێدوانێكی زۆر جوان بۆ (باسنیوز) هەموومانی دڵخۆش كرد و دڵی دڵڕەشانیشی تەقاند، گوێی لێ بگرن بزانن‌ چه‌ند جوان وه‌سفی جیاوازییە گەورەكانی نێوان هه‌رێمی كوردستان و شارەكانی باشوور و ناوەڕاستی عێراق ده‌كات، جا بزانن چۆنیش باسی ئه‌و میدیایانه‌ ده‌كات كه‌ هانی خه‌ڵكی كوردستان ده‌ده‌ن نیشتمانیان لا پیرۆز نه‌بێت.
بەكورتی كاكە حەمەی هەنگوینفرۆش، هەنگوینی كرد بە زاری نیشتمانپەروەراندا و تاڵاوێكی رەشیشی دەرخواردی میدیا خۆفرۆشەكان دا.