كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

ئەردۆغان لەڕێگەی هەدەپەوە گورزێكی گەورە لە ئۆپۆزسیۆن دەدات

هەدەپە دەنگ بە بەربژێرێك نادات وەكوو تیرۆریست سەیری كورد بكات

لە ئەنكەرا، پارتی دەسەڵات و ئۆپۆزسیۆنی تورکیا گفتوگۆكانیان چڕ كردووەتەوە لەبارەی هەڵبژاردن، لە لایەكی تریشەوە دەزگاكانی ڕاپرسی لە توركیا هەفتانە ئەنجامی ڕاپرسی بڵاو دەكەنەوە و ئەنجامەكانیش دەریدەخەن كە هەڵبژاردنی سەرۆكایەتی دەكەوێتە گەڕی دووەم، بەو مەرجەی پارتی دیموكرانی گەلان (هەدەپە)، كاندیدی بۆ هەڵبژاردنی سەرۆكایەتی نەبێت.

دەزگای ڕاپرسیی (مەترۆپۆل) ئەنجامی ڕاپرسییەكی بڵاو كردووەتەوە، ئەگەر ئۆپۆزسیۆن سێ كەسایەتی بكاتە بەربژێر و ڕكابەریی ڕەجەب تەییب ئەردۆغان بكەن، ئەنجامەكەی بەم شێوەیەیە:

ئەگەر ئۆپۆزسیۆن مەنسوور یاڤاش بەربژێر بكات:

مەنسوور یاڤاش، 41.6%

رەجەب تەییب ئەردۆغان 35.4%

 سەلاحەدین دەمیرتاش  15.7%

ئەگەر ئۆپۆزسیۆن مەڕاڵ ئاكشەنەر بەربژێر بكات:

رەجەب تەییب ئەردۆغان 38.3%

مەڕاڵ ئاكشەنەر 35%

سەلاحەدین دەمیرتاش 17.3%

ئەگەر ئۆپۆزسیۆن ئەكرەم ئیمامئۆغڵو بەربژێر بكات:

رەجەب تەییب ئەردۆغان 38.1%

ئەكرەم ئیمامئۆغڵو 33.9%

سەلاحەدین دەمیرتاش 15.8%

ئەگەر كەمال كلیچدارئۆغڵو بەربژێر بكات:

رەجەب تەییب ئەردۆغان 40%

كەمال كلیچدارئۆغڵو 30.7%

سەلاحەدین دەمیرتاش 16.8%

موراد سابونجو، نووسەری دیاری ماڵپەری (T24)ی توركی دەڵێت، بەگوێرەی ئەو ڕاپرسییە بێت، هەڵبژاردن دەكەوێتە گەڕی دووەم و دەنگدەری هەدەپە، واتە ئەوانەی دەنگیان بە دەمیرتاش داوە، یەكلایی دەكەنەوە كە كێ دەبێتە سەركۆماری توركیا، چونكە لە گەڕی دووەمدا هەدەپە دەنگ بە كام كاندید بدات، ئەو كاندیدە شانسی بردنەوەی هەیە.

سەرەڕای ئەوەی لە توركیا، قەیرانی دارایی هەیە، هەروەها هاووڵاتییان هاواریان لێ هەستاوە لەبەر برسیەتی و گرانیی نرخی كارەبا و خۆراك و گازی سروشتیی، كەچی ئەردۆغان توانیویەتی پارێزگاری لەوە بكات كە دەنگەكانی لە نێوان 35% بۆ 40%ە، ئەمەش تاوەكوو ئێستا بۆ ئەو سەركەوتنە.

ئەگەر بێت و ئۆپۆزسیۆنی توركیا، یاڤاش بەربژێر بكەن، ئەوكات هەدەپە دەمیرتاش دەكاتە بەربژێر، چونكە بە هیچ شێوەیەك دەنگدەری كورد دەنگ بە یاڤاش نادات، پێشتریش ئەحمەد تورك، سیاسەتوانی بەناوبانگی كورد گوتبووی ”كورد دەنگ بە یاڤاش نادات''.

ئەگەر بێت و ئاكشەنەر سەرۆكی پارتی باش ببێتە بەربژێری ئۆپۆزسیۆن، دیسان هەدەپە دەمیرتاش دەكاتە بەربژێر، چونكە دەنگ بە ئاكشەنەرێك نادەن كە بەشكرا دەڵێت هەدەپە تیرۆریستە و جیاوازیی لەگەڵ پەكەكەدا نییە.

كەواتە هەڵوێستی هەدەپە لە گەڕی دووەمی هەڵبژاردن زۆر قورس دەبێت، ئەگەر بێت و یاڤاش، یان ئاكشەنەر، بەربژێری ئۆپۆزسیۆن بێت و لە گەڕی دووەمدا هەدەپە دەنگی پێ بدات، كەواتە سووكایەتی بە كورد و دۆزی كورد كردووە، چونكە ئەو دوو كەسایەتییە بڕوایان بە هیچ مافێكی كورد نییە، گەر دەنگیشیان پێ نەدات، كەواتە دەبێت ڕوو لە ئەردۆغان بكات، خۆ ئەگەر دەنگدەرەكانیان بایكۆتی هەڵبژاردنیش بكەن لە گەڕی دووەمدا، هەر لە بەرژەوەندیی ئەردۆغانە.

مستەفا باڵبای، نووسەری ڕۆژنامەی (جومهوریەت)ی توركی کە هاوکات بەرپرسێكی باڵای جەهەپەیە، دەڵێت، پلانی ئاكەپە لەبارەی كوردەوە داڕێژراوە، ئەویش نزیكبوونەوەیە لە كوردەكان، بەتایبەت سەرۆك عەشیرەت و ئەوانەی حیسابی تایبەتیان بۆ دەكرێت لە ناوچەكە.

باڵبای زانیاریی پێ گەیشتووە كە خودی ئەردۆغان داوای كردووە، لە كاتی پڕۆپاگەندەی هەڵبژاردندا، بۆ ئەوەی گورز لە هەدەپە بدەن، لەگەڵ توێژێكی گرنگ و حیساب بۆكراوی كورددا لە باكووری كوردستان قسە بكەن، بۆ ئەمەشیان پاڵپشتی (ئیمیڕاڵی) كە مەبەست عەبدوڵڵا ئۆجەلانە وەردەگرێت و ئەو بەكار دەهێنێت تا كوردەكان دەنگ بە ئەردۆغان بدەن.

سیناریۆیەكی تریش هەیە، ئەویش داخستنی هەدەپەیە لە ڕێگەی دادگای دەستووریی توركیاوە، بەمەش ڕێگە لە هەدەپە دەگیرێت بەشداریی هەڵبژاردن بكات، ئامانجی ئەو سیناریۆیەش پەرتكردنی دەنگەكانی هەدەپەیە.