لە هەشتەمین ساڵیادی کەوتنیدا.. مووسڵ رادەست كرا یان داگیر كرا؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لە هەشتەمین ساڵیادی کەوتنیدا.. مووسڵ رادەست كرا یان داگیر كرا؟

بابەکر زێباری، سوپاسالاری پێشووی عێراق: زەمینە بۆ داڕمانی سوپا خۆش کرا

هەشت ساڵ بەسەر کەوتنی مووسڵدا تێدەپەڕێت، کە لە ماوەی شەو و ڕۆژێکدا ئەو شارە گەورەیە بەتەواوی كەوتە دەست ژمارەیەک چەکداری داعش. چاودێرانی سیاسی و بەرپرسانی سەربازییش نایشارنەوە کە لەپشت کەوتنی مووسڵ و دەرکەوتنی داعش لە عێراقدا، دەستی گەورەی ناوخۆیی و هەژموونی ئیقلیمی هەبووە کە رۆژ بە رۆژ ئەجێنداکانیان روونتر دەردەکەون، بەتایبەتی لە گۆڕینی دیمۆگرافیای ناوچە سوننییەکان و دروستبوون و بەهێزکردنی هێزێکی وەکوو حەشدی شەعبی.

کەوتنی مووسڵ

شەوی 9ی حوزەیرانی ساڵی 2014، نزیكه‌ی‌ 75 هه‌زار سەربازی سوپا و پۆلیسی فیدڕاڵیی عێراق، کە لە 4 فیرقه‌ی‌ سه‌ربازیدا‌، به‌ ته‌واوی‌ پارێزگای مووسڵدا‌ بڵاو کرابوونەوە‌، کە زۆربەیان لەناو سەنتەری شارەکەدا بوون و چەک و تانکی پێشکەوتووی شەڕیان پێبوو، بەڵام لە ماوەیەکی کەمدا، هەموو ئەوانە لە شاردا نەمان و شارەكە و چەكی قورس و سووكیان كەوتە دەست بە 150 بۆ 200 چەکداری رێكخراوی دەوڵەتی خەلافەی ئیسلامی (داعش!)

کەوتنی مووسڵ دوای ئەوە هات، کە ژمارەیەک چەکداری داعش، لە سووریاوە دزەیان کردبووە ناو عێراق، دەستیان بەسەر چەند گەڕەکێکی سەنتەری شارەکەدا گرت.

چەکدارانی داعش بەرلەوەی بێنە ناو مووسڵ، تەواوی پارێزگای رەققە لە سووریا و بەشێکی پارێزگای دێرزووریان لە رۆژئاوای کوردستان بەدەستەوە بوو، جگە لەوەی لە بیابانەکانی ئەنباریش هەبوون و چەندین جاریش گرتەی ڤیدیۆیی کوشتنی شوفێران و خەڵکانی دیکەیان بڵاو دەکردەوە.

هەر ئەو چەکدارانەش لە شەو و رۆژێکدا تەواوی شاری مووسڵیان كەوتە دەست، کە بەدوای ئەوەشەوە، ژمارەی چەکدارانی داعش بۆ چەند هەزار چەکدارێک بەرز بووەوە، تا ئێستا پرسیاری سەرەكی ئەوەیە: ئەو شارە رادەست كرا یان داگیر كرا؟

زانیاریی کەوتنی مووسڵ

لە كۆتاییەكانی مانگی ئایاری ئەو ساڵەدا، هێزە ئەمنییەكانی عێراق، حەوت ئەندامی رێكخراوی دەوڵەتی ئیسلامیی عێراق و شام ناسراو بە (داعش)یان لە مووسڵ دەستگیر كرد، ئەو دەستگیرکراوانە دانیان بەوەدا نا كە داعش بەرنامەی دەستبەسەرداگرتنی شاری مووسڵی هەیە.

رۆژی ٢٠\١٢\٢٠١٤ ئەو كاتی سەرۆك مەسعود بارزانی لە پۆستی سەرۆكی هەرێمی كوردستاندا بوو، نووسینگەی سەرۆكایەتیی هەرێم، لە راگەیەندراوێكدا روونی كردەوە: ”بە گشت لایەك ڕادەگەیەنین كە بەڕێز مەسعود بارزانی سەرۆكی هەرێمی كوردستان، پێش كەوتنی موسڵ، سەرۆك وەزیرانی پێشووی عێراقی لە مەترسیی دروستبوونی داعش و هەڕەشە و جموجوڵەكانیان لە ڕۆژئاوای پارێزگای نەینەوا و شاری موسڵ ئاگادار كردووەتەوە، پێیشی ڕاگەیاندووە كە هەرێمی كوردستان ئامادەیە لەڕێی ئۆپەراسیۆنێكی هاوبەشەوە یارمەتیی هێزەكانی عێراق بدات تا ڕێگە لە گەشە و بەهێزبوونی تیرۆریستان لەو ناوچەیەدا بگیرێت. بەڵام نووری مالیكی سەرۆك وەزیرانی پێشووی عێراق ئەم ئاگاداركردنەوە و پێشنیارەی سەرۆك بارزانیی بە هەند وەرنەگرت و گوێی لێ نەگرت. بەڕێز سەید عەمار حەكیم و دكتۆر ڕۆژ نوری شاوێس جێگری سەرۆك وەزیرانی عێراق و باڵوێزی ئەوكاتی ئەمەریكا لە عێراق، شاهیدی ئەوەن كە سەرۆك بارزانی لەڕێی ئەوانەوە سەرۆك وەزیرانی عێراقی لەو مەترسییە ئاگادار كردووەتەوە.“

نووسینگەی سەرۆكایەتیی هەرێمی كوردستان، لەو راگەیەندراوەدا روونیشی كردەوە: ”نووری مالیكی سەرۆك وەزیرانی پێشووی عێراق، لە كەوتنی مووسڵ و شكستی سوپای عێراق بەرپرسیارە و ناتوانێ شكست و بەرپرسیارێتیی خۆی دابپۆشێت. لەو ماوەیە هەرچی نەهامەتی و ناسەقامگیری و قەیران كە بەسەر خەڵكی عێراقدا هاتووە و هەروەها شكستە سیاسی و سەربازی و ئابوورییەكانی عێراق، سەرۆك وەزیرانی پێشووی عێراق و دەورووبەرەكەی لێی بەرپرسیارن.“

هاوکات ڕۆژنامەی (ئەندیپێندنت)ی بەریتانی، دوای کەوتنی مووسڵ لە لێكوڵێنەوەیەكیدا، پێوەند بە ھاتنی داعش بۆ عێراق، حکوومەتی ئەوکاتی عێراقی بە سەرۆکایەتیی نووری مالیكی، بە تۆمەتبار و بەرپرسیار لە دۆسیەی کەوتنی مووسڵ دانا، بەو پێیەی، مالیکی چاوپۆشیی كردووە لە پێشڕەوییەكانی داعش و ئەو ڕاپۆرت و زانیارییە ھەواڵگرییانەی کە لەوبارەیەوە لەلایەن دەزگا هەواڵگرییەکانی عێراق و سوپاوە پێی دراوە.

ڕاپۆرتەكە ئاماژەی بەوەش کردووە، نووری مالكی، جگە لەوەی فەرماندەی گشتیی ھێزە چەكدارەكان و وەزیری بەرگری و ناوخۆ و ھەواڵگری و زانیاری بووە بەوەكالەت، لەلایەن جەنەڕاڵ ئەحمد زركانی كە ئەوكات بەڕێوەبەری ھەواڵگری بووە، تەواوی پلانی ھێرشەكەی داعشی پێڕاگەیانراوە، کە لە شەش بنكەی مەشقی چەکدارانی داعشەوە ئامادەکاریی بۆ دەکرێت، هاوکات زانیاریی تەواوی داوەتێ کە داعش خەریكی پیلان و ئامادەكارییە بۆ ھێرشێكی بەربڵاو.

(ئەندیپێندنت) ئاشکراشی کردووە، کە ھەواڵگریی ھێزەكانی پێشمەرگە و ئاژانسی پاراستنی كوردستان لە كەناڵی راستەوخۆی ھەواڵگری و ھاوكات لە رێگەی سوپاسالاری ئەوكاتەی عێراق، جەنەڕاڵ بابەكر زێباری، زانیاریی ستراتیژیی سەربازیی گرنگی ھێزەكانی داعشی بە 48 سەعات پێش ھێرشەكە گەیاندووەتە نووسینگەی تایبەتی سەرۆك وەزیرانی ئەوکاتی عێراق، بەڵام مالیکی ھیچ وەڵامێكی نەبووە.

ڕاپۆرتەكە لەبارەی گرنگی نەدان بە زانیارییە هەواڵگرییەکان، ئاماژەی بەوەش داوە، نووری مالیكی پێی باشتر بووە شارەكە داعش داگیری بكات، نەك ڕێكخستنەكانی حزبی بەعس و رێكخراوی نەقشبەندییەكان، کە ئەوکات بەهێز بوون.

ڕاپۆرتەكە ئەوەشی ئاشکرا کردووە، لە کۆبوونەوەیەکدا، کە تایبەت بووە بە هاتنی داعش، بە ئامادەبوونی ھەموو سەركردە سەربازییە پلەدارەكان، کە لە ڕێگەی تەلەفۆنیشەوە (عەلی غێدان و عەبوود قەمبەر و مەھدی غەراوى) بەشدار بوون، بابەکر زێباری، سوپاسالاری پێشووی عێراق بە مالیكیی ڕاگەیاندووە كە ھێزەكانی پێشمەرگەی كوردستان دەتوانن ھاوكار و پاڵپشت بن لە پاراستنی مووسڵ و نەھێڵن داگیر بكرێت، بەڵام مالیکی لە وەڵامدا گوتوویەتی: ”پێویستمان بە پێشمەرگە نییە، با كوردستان بپارێزن، پاراستنی عێراقیش لە ئەستۆی منە.“

هەر پێوەند بەو پرسە، ستراون ستیڤنسۆن، ئەندامی پێشووی پەرلەمانی ئەورووپا و سەرۆكی پێشووی شاندی پەرلەمانی ئەورووپا بۆ پێوەندییەكان ڵەگەڵ عێراقدا، دوای كەوتنی مووسڵ، لە دیمانەیەكی گۆڤاری گوڵاندا: ”نووری مالیكی كە بۆ ماوەی هەشت ساڵی حوكمڕانیی كرد، گەندەڵترین سەرۆك وەزیران بوو لە جیهانی عەرەبیدا و باس لەوە دەكرێت 500 ملیار دۆلاری لە داهاتی خەڵك و لە پارەی نەوت دزیبێت، هەروەها بە هۆی هەڵمەتە كۆمەڵكوژییەكانیەوە دژی پێكهاتەی سوننە بووە هۆی هەڵگیرسانی شەڕی ناوخۆیی كە دەرگای بە رووی داعشدا كردەوە. لە هەمان كاتدا ئێران كۆنتڕۆڵی مالیكییان كردبوو، عێراقیشیان كردبۆوە رێڕەوی گەیاندنی كەلوپەلی سەربازی و هێزی سەربازی بۆ سووریا بۆ پشتیوانیكردن لە رژێمەكەی بەشار ئەسەد، ئەمە بووە هۆی دروستكردنی داعش و بووە سەرچاوەی ئۆكسجین بۆ داعش بۆ ئەوەی بەردەوام بێت و دەست بەسەر شاری مووسڵ و رومادیییشدا بگرێت لە ناو عێراقدا، ئاخر ساڵانی پڕ لە گەندەڵكاریی حوكمڕانییەكەی مالیكی سوپای وڵاتەكەی وێران كرد.“

داعش چی لە مووسڵ دەست کەوت؟

چەکدارانی داعش جگە لە دەستبەسەرداگرتنی شارەکە، لە کاتی کەوتنی مووسڵدا، پارەیەکی یەگجار زۆریان لەنێو بانکەکاندا دەست کەوت، کە بە دوو ملیار دۆلار مەزەندە دەکرێت، جگە لەوەش، بوونە خاوەنی 2700 ئۆتۆمبێلی هەمەر و هامڤی و سەدان ئۆتۆمبێلی دیکە و هەزاران پارچە چەکی سووک و مامناوەند و قورس و دەیان تانک و زرێپۆش، کە دواتر بەو چەکانەوە هێرشیان کردە سەر شنگال و داگیریان کرد، جێی باسە هەموو ئەو ئۆتۆمبێل و چەكە قورس و سووكانە لەلایەن سوپا و پۆلیسی فیدراڵییەوە بۆیان بەجێ هێڵرا.

لێکەوتەکانی کەوتنی مووسڵ

کەوتنی مووسڵ، زنجیرەیەك رووداوی دیکەی بەدوادا هات، لەوانە گرتنی شاری تکریت، سەنتەری پارێزگای سەڵاحەدین و بەشێکی سنووری پارێزگاکانی کەرکووک و دیالە، کە لەلایەن چەکدارانی داعشەوە، سەرەڕای هەوڵەکانی هاوپەیمانان، بەڵام نەتوانرا پێشڕەوییەکانی داعش رابگیرێت، تاوەکوو داعش ئاراستەی هێرشەکانی بەرەو هەرێمی کوردستان گۆڕی و لەلایەن هێزی پێشمەرگەی کوردستانەوە، هەروەکوو سەرۆک بارزانی گوتی: ”ئەفسانەی داعش شکێنرا.“

پرسیارەکانی دوای کەوتنی مووسڵ

دوای کەوتنی مووسڵ، نەک هەر شارەزایانی سەربازی و سیاسی گومانەکانی خۆیان لە سیناریۆی دەرکەوتنی داعش لە عێراق نەشاردووەتەوە، بەڵکوو بەرپرسانی شارەکەش، لەوانە ئەسیل نوجەیفی، پارێزگاری ئەوکاتی مووسڵ، پەنجەی تۆمەتی لەسەر بەرپرسانی ئەوکاتی حکوومەتی عێراق داناوە، کە ئێستاش نایانەوێ دوای ئەو شکستە گەورەی لە هەڵبژاردنی پێشوەختەی عێراق رووبەڕوویان بووەوە، دەست لە جومگە سەرەکییەکانی دەسەڵات لە عێراق هەڵگرن و گەورەترین لەمپەری بەردەم پێکهێنانی حکوومەتی نوێی عێراقن.

پارێزگاری نەینەوا، هەر ئەوکات دوای کەوتنی مووسڵ، داوای لە لیژنەی پەرلەمانی تایبەت بە لێكۆڵینەوە لە هۆكارەكانی كەوتنی مووسڵ كرد، بەڵام لەلایەن لیژنەکانەوە، بەهۆی باڵادەستیی بەرپرسانی تۆمەتبارەوە تاوەکوو ئێستاش کە هەشت ساڵ بەسەر ئەو رووداوە گەورەیەدا تێپەڕیوە، نەتوانراوە بەتەواوی پەنجە لەسەر برینەکانی کەوتنی مووسڵ دابنرێت و سزای ئەو کەسانە بدرێ، کە دەستیان لە کەوتنی شارەکەدا هەیە.

ئەسیل نوجێفی، پارێزگاری ئەوکاتی نەینەوا، لە بەیاننامەیەكدا گوتی: "پرسیارگەلێك هەن لەبارەی هۆكارەكانی كەوتنی مووسڵ، پێویستە لیژنەی لیكۆڵینەوە، ئاراستەی عەبوود قەنبەر و عەلی غێدانیان بكات، لەوانەش كاتژمیر 1ی دوانیوەڕۆی 9ی حوزەیرانی 2014، غەڕاوی فەرمانێكی دەركردووە و بەسەر فەوج و لیواكانی پۆلیسی فیدراڵی دابەش كردووە، تێیدا داوای لێ كردوون لە ناوچەكانیان پاشەكشە بكەن و لە بارەگای فیرقەی 3ی پۆلیسی فیدراڵی كۆ ببنەوە، ئەمە بەرلەوەی هێرشی داعش لەو ناوچانە دەست پێبكرێت."

نوجێفی دەشڵێت: "سەرەڕای رەخنەگرتنی خالید حەمدانی، لەسەر كشانەوەی فەوجی پۆلیسی فیدڕاڵی لە ناوچەی زنجیل كە واڵاكردنی رێگایە لەبەردەم چەكدارانی داعش بۆ گەیشتن بە سەنتەری شار، بەڵام قەنبەر لەگەڵ غەڕاوی كۆك بوون لەسەر كێشانەوەی فەوجی پۆلیسی فیدڕاڵی لەو ناوچەیە."

ئەسیل نوجێفی، ئەوکات داواشی کردووە کە پێویستە لیژنەی لێكۆڵینەوە پرسیار لەبارەی ئەو پەیوەندییە تەلەفۆنییە بكات، كە كاتژمێر 7ی شەوی 9ی حوزەیران قەنبەر و غێدان بە مالیكییان راگەیاند، كە لە بەری راستی مووسڵ تاوەكوو بارەگای فیرقەی دوو لە بەری چەپ پاشەكشە بە هێزەكان دەكرێت، ئایا مالیكی پرسیی: مادام فەوج و زرێپۆشی نوێتان لەلایە، بۆچی بەری راست رادەستی داعش دەكەن؟ ئایا مالیكی پرسیی لەبەرچی لە كاتژمێر یەكی دوای نیوەڕۆ 10 فەوجی پۆلیسی فیدڕاڵییان لە سەربازگەی غەزلانی كۆ كردەوە كە نزیكەی 500 مەترێك لە بارەگای فەرماندەی ئۆپەراسیۆنەكانەوە دوورە؟"

هاوکات عەلی غێدان، فەرماندەی هێزە زەوینیەكانی سوپای عێراق، کە یەكێكە لەو فەرماندە باڵا سەربازییانەی، كە لیژنەی لێكۆڵینەوە لە هۆیەكانی كەوتنی مووسڵ لێكۆڵینەوەی لەگەڵدا كردووە.

بەپێی دانپیانانەکەی، غێدان گوتوویەتی: ”ئێمە بە فەرمانی راستەوخۆی نوری مالیكی، سەرۆك وەزیرانی ئەوکاتی عێراق لە مووسڵ كشاینەوە."

بەپێی زانیارییەکانی (باسنیوز)، لە کاتی دەستبەکاربوونی لیژنەی ڤەكۆلین لە هۆیەکانی کەوتنی مووسڵ، کە لە پەرلەمانی عێراق تایبەت بەو پرسە پێکهێنراوە، جگە لە غێدان، چەندین سەركردەی سەربازی و ئیداریی دیكەی عێراق لێكۆڵینەوەیان لەگەڵدا كراوە، بەڵام نەتوانراوە لێكۆڵینەوە لەگەڵ نووری مالیكی، بە سیفەتی فەرماندەی گشتیی ئەوكاتی هێزە چەكدارەكانی عێراقدا بكرێت، تەنیا 24 پرسیاری ئاراستە کراوە و بە شێوەیەکی ئاسایی وەڵامی داونەتەوە.

هەندێک لەو پرسیارانە بەو شێوەیە بوون:

- بۆچی فەرماندە سەربازییەكانت لەدەرەوەی دەستوور دانان؟

-  بۆچی نەتهێشت پێشمەرگە بەهانای مووسڵەوە بچێت؟ 

- چۆن ئەم هەموو سوپایە نەیتوانی بەرگری لە مووسڵ بكات و هەڵاتن؟

بەڵام، وەڵامی نوری مالیکی، سەرۆک وەزیرانی ئەوکاتی عێراق، هەمووی لەو چوارچێوەیەدا بووە، کە شاری مووسڵ بەهۆی پیلانگێڕییەک لەناو سوپای عێراق کەوتووەتە دەستی داعش.

هۆکارەکە لەسەرووی سوپاوە بووە

لییەمبارەیەوە فەریقی روکن بابەکر زێباری، سوپاسالاری پێشووی عێراق، بۆ (باسنیوز) ڕایگەیاند، هۆکاری کەوتنی مووسڵ بە هیچ شێوەیەک لە سوپادا نەبووە، لە سەرووی سوپا و ئەو بارودۆخەدا بووە کە لە عێراق بەگشتی هەیە، بەتایبەتی گەندەڵی و نادادپەروەری.

زیباری گوتیشی: ”کێشەی سەرەکیی ئەو گرفت و کێشانە بوون، کە لەنێوان حکوومەتی ئەوکاتی عێراق و سوننەکاندا هەبوو، پێشتریش قاعیدەیان هێنا، بەڵام لەو هەوڵە سەرکەوتوو نەبوون، دواتر داعش دەرکەوت، ئەوکاتی داعش دەرکەوت خەڵکی مووسڵ بە گەنج و پیرەوە هەمووی چەکدار بوو، دوای دەستگرتن بەسەر چەند گەڕەکێک، ئەوە بوو خەڵکەکە هاوکاریی بارودۆخەکەیان کرد، واتا گرفتەکە لە حکوومەتەکەدا بوو و بارودۆخەکەش لەبار بوو، ئێستا ئەو دۆخە هەروەکوو خۆیەتی، تاوەکوو ئەو گرفتە لەنێوان سوننە و حکوومەت، کە زۆرینەی عەرەبی شیعەی دەسەڵاتدارە چارەسەر نەبێت، ئەوا داعشیش نەبێت قاعیدە و شتی دیکە دەهێنرێتەوە و سەرهەڵدەداتەوە.“

بابەکر زێباری، جەختی لەسەر ئەوە کردەوە، عێراق پێویستی بە سیستەمێکە، وەکوو هەرێمی کوردستان بێت و جیاوازی لەنێوان پێکهاتەکاندا نەکات.

گۆڕینی دیموگرافیا و دروستکردنی حەشدی شەعبی

د.هاوار نێروەیی، چاودێری سیاسی و شارەزا لە گرووپەکانی حەشدی شەعبی، هەر پەیوەست بەو پرسە، بۆ (باسنیوز) ڕایگەیاند، ئامانجی گەورە لەپشت دەرکەوتنی داعش و کەوتنی مووسڵ لە عێراق هەبووە.

نێروەیی گوتیشی: “ئەگەری زۆری مەیدانی و سەربازی لەپشت دەرکەوتنی داعشەوە هەیە، لە سووریا و لە عێراقیش تەنانەت لەناوبردنی داعشیش کۆمەڵێک ئەگەرمان پێ دەدات، کە بۆ لەناو برا، کە ئەوەی دەبینرێ ئەوەیە، بەرژەوەندیی ئیقلیمی هەم لە سەرهەڵدانی داعش و هەمیش بۆ لەناوبردنی هەبووە، بەتایبەتی دەوڵەتە زلهێزە ئیقلیمییەکان، بەڵام یەکێک لەو وڵاتانەی کە زۆرترین بەرژەوەندیی لەو بارودۆخەدا هەبووە ئێران بووە، ئەوە بەو مانایە نا، کە ئێران داعشی دروست کردووە، بەڵام بەو مانایەی کە زۆرترین بەرژەوەندی لەوەدا بەر ئەو وڵاتە کەوتووە، کە یەکێک لەو بەرژەوەندییە گەورانە دروستکردنی هێزێکی وەکوو حەشدی شەعبییە.“

د.هاوار نێروەیی، ئاماژەی بەوەش دا، جگە لەوەی ئێران سوودی لە دروستبوونی حەشدی شەعبی بینیوە کە ئێستا دەسەڵاتی بەسەر هەموو عێراقدا هەیە و جومگە سەرەکییەکانی بەدەستەوەیە و تەنانەت ئەو هێزانەی لەپشتەوەی حەشدن. ڕێگە نادەن بەبێ ئەوان حکوومەتی نوێی عێراق پێکبهێنرێت، کە ئەوە بۆ هەشت مانگ دەچێ هەڵبژاردن کراوە، دەستکەوتێکی دیکە بۆ ئێران، گۆڕینی دیموگرافیای ئەو ناوچانەیە لە سوننەنشینەوە بۆ شیعەنشین، هەروەها ئاوارە سوننەکانیش هەمووی ڕوویان لە هەرێمی کوردستان کردووە، بەهۆی ئەو ڕێگرییانەی لێیان کراوە، کە نەچنە بەغدا و باشووری عێراق.

نێروەیی روونی كردەوە: ”گۆڕینی دیموگرافی لە رووی کۆمەڵایەتییەوە دواجار هەژموونی ئێرانە بەسەر ئەو ناوچانەدا، کە ئەگەر بەو شێوەیە بڕوات کە ئەوە رۆژ بە رۆژ ڕێژەی عەرەبی شیعە لەو ناوچانە بەرز دەبێتەوە، تا ئاستی ئەوەی کە رەنگە لە چەندین ساڵی دووری داهاتوودا پێچەوانە بێت، کە ئەگەر بێت و هیچ لەمپەرێک نەیەتە بەردەم ئەو بەشیعەکردنەی کە روو دەدات.“

ئەو چاودێرە سیاسییە روونیشی کردەوە، کە گۆڕانکارییەکە بۆ هەموو سنووری پارێزگاکەیە نەوەکوو تەنیا سەنتەرەکەی، گوتی: ”ئەگەر سەیر بکەین، ئێستا زۆر مەزاری شیعەكان هێنراونەتە ناو دەڤەری شنگال کە لە ئەسڵدا شوێنی کوردانی ئێزدییە، هەروەها بوونی چەکدارانی پەکەکە وەکوو بەشێک لە گرووپەکانی حەشدی شەعبی، ئەوانە هەموو بەیەکەوە، یەک ئامانج و پاکێج بوون بۆ دوای داعش، كە پلانیان بۆ دانراوە.“