دوو ملیار دیناری پارەی گەنمی جووتیاران دابەش دەكرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دوو ملیار دیناری پارەی گەنمی جووتیاران دابەش دەكرێت

وەزارەتی بازرگانی ئاشكرای كرد، كۆتایی هەفتە دوو ملیار دیناری پارەی گەنمی ئەمساڵی جووتیارانی هەرێمی كوردستان خەرج دەكرێت.

نەوزاد شێخ كامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان، بە (باسنیوز)ی ڕاگەیاند: "بڕی دوو ملیار دیناری پارەی ئەمساڵی گەنمی جووتیاران نێردراوە و بڕیارە كۆتایی ئەم هەفتەیە، یان سەرەتای هەفتەی داهاتوو دەست بە دابەشكردنی بكرێت، ئێمە دواتر بەفەرمی جووتیاران لە كاتی دابەشكردنی پارەكە ئاگادار دەكەینەوە''.

ئاماژەی بەوەش دا: ''ئەگەر ڕێكارەكانی دابەشكردنی تەواو بێت، بەتایبەت ئەو ڕێكارانەی پەیوەندییان بە بەغدا و لقی هەولێری بانكی ناوەندیی عێراقەوە هەیە، ئەوە پارەكە دابەش دەكرێت''.

گوتیشی: "ئەو دوو ملیار دینارە، پارەی ئەو جووتیارانەیە كە لە هەفتەی ڕابردووەوە گەنمی خۆیان ڕادەستی سایلۆكان كردووە''.

ئەمساڵ بۆ هەر تۆنێكی گەنمی جووتیاران، 850 هەزار دینار دەدرێت و بەراورد بە ساڵی ڕابردوو پارەكەی زۆر زیادی كراوە.

بەڕێوەبەری گشتیی بازرگانی ئاشكرایشی كرد: ''لە ڕۆژی 28ی ئایاردا، لە هەرێمی كوردستان دەست كراوە بە وەرگرتنی گەنمی جووتیاران و تاوەكوو ئێستا زیاتر لە 13 هەزار تۆن گەنم وەرگیراوە و پڕۆسەكەش بەردەوامە''.

نەوزاد شێخ كامیل گوتیشی: "وەكوو ساڵانی پێشوو نابێت چوار مانگ، یان ساڵێك پاش ڕادەستكردنی گەنم، پارە بدرێتە جووتیاران، بەڵكوو پاش 10 ڕۆژ ڕاستەوخۆ پارەكە دەدرێتە ئەو جووتیارەی گەنمەكەی داوەتە سایلۆ''.

هەر لەم بارەیەوە، کامەران وریا، بەڕێوەبەری سایلۆی سلێمانی، ڕایگەیاند: "پڕۆسەی وەرگرتنی گەنمی جووتیاران دەستی پێ كردووە و ماوەی 40 ڕۆژ دەخایەنێت و پێشبینی دەكەین بۆ ئەمساڵ نزیكەی 200 هەزار تەۆن وەربگرین''.

ئاماژەی  بەوەش دا ئەوانەی گەنمیان ڕادەست كردووە، كۆتایی ئەم هەفتەیە، یان سەرەتای هەفتەی داهاتوو پارەكانی خۆیان وەردەگرن.