ئۆكراینا نهێنیی هەوڵێكی تیرۆركردنی ڤلادیمێر پوتینی ئاشكرا كرد
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئۆكراینا نهێنیی هەوڵێكی تیرۆركردنی ڤلادیمێر پوتینی ئاشكرا كرد

 

سەرۆكی دەزگای هەواڵگریی سەربازیی ئۆكراینا ئاشكرای كرد، سەرۆكی ڕووسیا لە هەوڵێكی تیرۆركردن ڕزگاری بووە كە دوای دەست پێكردنی هێرشەكەی ڕووسیا بۆ سەر ئۆكراینا لە دژی دراوە.

جەنەڕاڵ كیریلۆ بۆدانۆڤ، سەرۆكی دەزگای هەواڵگریی سەربازیی ئۆكراینا بە (The Telegraph)ی بەریتانی راگەیاند، نزیكەی دوو مانگ لەمەوبەر و بە ماوەیەكی كەم دوای دەست پێكردنی هێرشەكەی ڕووسیا بۆ سەر ئۆكراینا، ڤلادیمێر پوتین، سەرۆكی ڕووسیا، لە هەوڵێكی تیرۆركردن ڕزگاری بووە.

ئەوەشی ئاشكرا كرد كە هەوڵەكە لە ڕێی هێرشكردنە سەر پوتینەوە ئەنجام دراوە، بەڵام لە لایەن هێزە ئەمنییەكانی ڕووسیاوە شكستی پێهێنێندراوە.

ئەو بەرپرسە ئۆكراینییە ئاماژەی بەوەش داوە كە بەرپرسانی ڕووسیا قەوقازییەكانیان بە بەرپرسیار لە هەوڵە شكستپێهێندراوەكە داناوە، بەڵام ئاشكرای نەكرد كە ئاخۆ هەوڵەكە لە لایەن ناوچەكانی باكووری قەوقازەوە دراوە كە لە حەفتاكاندا دوو شەڕی جیابوونەوەیان لە دژی یەكێتیی سۆڤیەت كردووە، یاخود باشووری قەوقاز كە لە نێویاندا جۆرجیاش هەیە.

ئەم دەنگوباسانە لە دوای ئەوە دێن كە ڕۆژی دووشەممەی رابردوو، مۆسكۆ دوو هاووڵاتیی ئۆكراینی بە ئەنجامدانی هێرشی تیرۆریستی لە دژی بەرپرسانی سەر بە ڕووسیا لە ناوچەكانی ژێر كۆنتڕۆڵی سووپای ڕووسیا لە باشووری ئۆكراینا تۆمەتبار كرد.

بەپێی زانیارییەكان، پوتین چەند جارێك ڕووبەڕووی هەوڵی تیرۆركردن بووەتەوە كە دیارترینیان لە ساڵی 2012 بووە.

میدیا جیهانییەكان باس لەوە دەكەن كە لە ترسی هەوڵە بەردەوامەكانی تیرۆركردن، ڤلادیمێر پوتین ناچار بووە پرۆتۆكۆلی خۆدابڕاندن پەیڕەو بكات كە ئەمەش وادەكات ئەگەری گەیشتنی نەیارەكانی و تیرۆركردنی یەكجار تەسك ببێتەوە. تەنانەت بەرپرسێكی ئەمریكی بە (The Telegraph)ی راگەیاندووە: “هەر كەسێك بیەوێ هەوڵی تیرۆركردنی پوتین بدات، دەبێت ئەوە بزانێت كە كردارێكی لەم شێوەیەك ئەوپەڕی ئاڵۆزە”.