یەكەم تووشبووی ئاوڵەی مەیموون لە وڵاتێكی عەرەبی تۆمار كرا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

یەكەم تووشبووی ئاوڵەی مەیموون لە وڵاتێكی عەرەبی تۆمار كرا

ئەمڕۆ سێشەممە یەكەم تووشبووی ئاوڵەی مەیموون لە وڵاتی ئیمارات تۆمار كرا.

وەزارەتی تەندروستیی ئیمارات بڵاوی كردەوە ئەمڕۆ یەكەم تووشبووی ئاوڵەی مەیموونیان تۆمار كردووە، كە ئافرەتێكی تەمەن 29 ساڵە و لە گەشتێكی رۆژئاوای ئەفریقیاوە گەڕابووەوە ئیمارات، ئێستا چارەسەری پزیشكی وەردەگرێت.

ئەمەش لە كاتێكدایە ڕۆژانە ئاوڵەی مەیموون لە وڵاتانی جیهاندا بڵاودەبێتەوە و جۆرێك لە مەترسی بۆ سەر جیهان دروست كردووە و دوێنێ دووشەممەش سەرۆكی ڕێكخراوی تەندروستیی جیهانی رای گەیاند كە جیهان لەم قۆناغەدا بەدەست هەرسێ تەنگژەی بڵاوبوونەوەی ئاوڵەی مەیموون، پەتای كۆرۆنا و شەڕی رووسیا بۆ سەر ئۆكرایناوە دەناڵێنێت.

تیدروس ئەدهانۆم گیبریسوس سەرۆكی ڕێكخراوی تەندروستیی جیهانی، هۆشداری دابوو لەوەی جیهان ڕووبەڕووی تەنگژەی گەورە بووەتەوە و لە یەك كاتدا لەژێر هەڕەشەی كۆرۆنا، شەر لە ئۆكراینا و ئاوڵەی مەیمووندایە.

ئەم هۆشدارییەی ئەدهانۆم لەمیانی كۆنگرەیەك هات لە جنێڤ، كە میوانداری پسپۆرانی تەندروستی سەر بە ڕێكخراوی نەتەوە یەكگرتووەكانی كردبوو، بۆ لێكۆڵینەوە لە بڵاوبوونەوەی ئاوڵەی مەیموون لە 15 وڵاتی دەرەوەی كیشوەری ئەفریقیا.

رۆژی یەكشەممەی رابردووش، وەزارەتی تەندروستی لە حكوومەتی بەلجیكا بڕیاری دا دەبێت تووشبووانی ئاوڵەی مەیموون بەلایەنی كەمەوە بۆ ماوەی 21 ڕۆژ لەناو ماڵی خۆیاندا كەرەنتینە بكرێن.

بەربڵاوبوونەوەی خێرای ئاوڵەی مەیموون ترسی گەیاندووەتە وڵاتانی ئەورووپا و رۆژئاوا، هەندێك پێشبینی دەكەن ئەم ئاوڵەیە مەترسییەكی نوێ بێت، كە لە زۆر ڕووەوە ترسناكترە لە پەتای كۆرۆنا، بەتایبەتی لە ڕووی ڕێژەی مردنی تووشبووانەوە.

وەك لە راپۆرتە سەرەتاییە پزیشكییەكان ڕوون كراوەتەوە، یەكێك لە هۆكارە سەرەكییەكانی تووشبوون و بڵاوبوونەوەی ئاوڵەی مەیموون، پەیوەندی و جووتبوونی هاوڕەگەزخوازانە، ئێستاش كە ئەورووپا لە وەرزی ئاهەنگەكانی شانازی هاوڕەگەزخوازان نزیك دەبێتەوە و لە چەندین گەورە شاری رۆژئاوادا هاوڕەگەزخوازان تێكەڵ دەبن و ئاهەنگی بەرفرەوان دەگێڕن، مەترسی دەكرێت بڵاوبوونەوەی ئاوڵەكە خێراتر بێت.