بۆچی والیی ئامەد لە كار لادرا؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بۆچی والیی ئامەد لە كار لادرا؟

 پارێزگاری ئامەد، لەناو ئەو 10 پارێزگارەی توركیایە كە هەفتەی رابردوو لە كارەكانیان دوور خراونەتەوە، بەپێی قسەی رۆژنامەوانە ناودارەكانی توركیاش بێت، هۆكاری دوورخستنەوەی پەیوەندیی بەو دیارییەوە هەیە كە ئومێد خۆشناو، پارێزگاری هەولێر ماوەیەك بەر لە ئێستا لە ئامەد پێشكەشی كردووە، ئەویش (ئەلبوومی هەولێر) بوو.

مونیر كەڕاڵئۆغڵو، پارێزگاری ئامەد، ماوەیەكی زۆرە نێوانی لەگەڵ سولەیمان سویلو، وەزیری ناوەخۆی توركیا باش نییە، بەڵام ئەو توانیبووی خۆشەویستیی خەڵكی ئامەد بۆ لای خۆی رابكێشێت و خزمەتیان بكات، بۆیە وەزیر نەیتوانیوە دووری بخاتەوە.

ئومێد خۆشناو، پارێزگاری هەولێر، ماوەیەك بەر لە ئێستا سەردانی ئامەدی كرد و لەلایەن پارێزگاری ئامەد پێشوازیی لێ كرا، ئامانج لەو سەردانە زیاتر برەودان بوو بە پەیوەندیی ئابووری و دیبلۆماسیی نێوان هەولێر و ئامەد. لەوێدا خۆشناو ئەلبوومێكی وێنەی شاری هەولێری پێشكەشی مونیر كرد و لەسەر ئەلبوومەكە ناوی (كوردستان)ی تێدا نووسرابوو، ئەمەش دەنگدانەوەی لە میدیای توركیا بەدوای خۆیدا هێنا و نەژادپەرستەكان لێی هاتنە دەنگ.

ئیسماعیل سایماز، رۆژنامەنووسی زۆر بەتوانا و بەناوبانگی توركیا، لە تازەترین وتاریدا لە رۆژنامەی (سۆزجو)، ئاشكرای دەكات، كە لادانی پارێزگاری ئامەد، پەیوەندی بەو ئەلبوومەوە هەبووە كە ئومێد خۆشناو پێشكەشی كردووە.

سایماز دەنووسێت: ”دەمانزانی كە نێوانی وەزیری ناوەخۆی توركیا و كەڕاڵئۆغڵو والیی ئامەد خۆش نییە، بەڵام لادانی لە پۆستەكەی مومكین نەبووە تا ئەو كاتەی ئومێد خۆشناو والیی هەولێر ئەلبوومی كوردستانی پێشكەش نەكردبوو، پاشان هاوكێشەكە گۆڕدرا. بەگوێرەی زانیارییەكانم، جیهان كایاڵپ، بەرپرسی لقی پارتی بزووتنەوەی ناسیۆنالیستی مەهەپە، ئەوبابەتەی بردووەتە سەركردایەتیی پارتەكەی و لە میدیای تایبەت بە خۆیان دژی ئەو دیارییە بوونە كە خۆشناو داویەتییە والی ئامەد“

سایماز، ئاماژە دەدات، كە پرسیاری لە بەرپرسێكی كورد كردووە لە ئامەد و پێی گوتووە كەراڵئۆغڵو كەسێكی چۆنە؟

بەم شێوەیە وەڵامی داوەتەوە: ”لە ئامەد خۆی خۆشەویست كردووە، زۆر دڵسۆز بووە بەرامبەر بە كورد و خەڵكەكەی، تاوەكوو ئێستا هیچ كەسێك شتێكی خراپی لەسەر نەگوتووە، خزمەتێكی گەورەی ئامەدی كردووە. لەسایەی ئەودا، بواری گشتوگوزاری ئامەد گەشاوەتەوە و گیانی بەبەر شارەكەدا كردووە.“

سایماز پرسیویەتی، ئایە لەبەر ئەو باشە و خۆشەویستییەی خەڵكە بۆی، دووریان خستووەتەوە؟

ئەو بەرپرسە گووتویەتی: ”نازانم، بەڵام بەرپرسانی ئاكەپە زۆر پێی سەغڵەت بوونە و گلەییان لێی هەبووە، بەڵام كەراڵئۆغڵو كەسێكی راستگۆیە.“

بە گوێرەی گوتەكانی سایماز بێت، مەهەپە هۆكارێكی سەرەكی بووە تا والیی ئامەد دوور بخرێتەوە، چونكە ئەوان بە وشەی كوردستان سەغڵەت دەبن و كاتێكیش خۆشناو ئەلبوومی كوردستانی پێشكەش بە كەراڵئۆغڵو كردووە، نیگەرانییەكانیان بە ئاكەپە راگەیاندووە، بۆیە كەراڵئۆغڵوش لە كارەكەی دوور خراوەتەوە، بەڵام ئەمە زیانی بۆ ئاكەپە دەبێت، چونكە ئامەدەییەكان كەڕاڵیان خۆشویستووە و بە دڵسۆزی كوردیان بینیوە، ئەگەرچی بۆ خۆشی بە ڕەگەز كورد نییە.