خەونەكەی میدیای مەلا بەختیار دەچێتە گۆڕەوە!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
سەربەست محەمەد 23/05/2022

خەونەكەی میدیای مەلا بەختیار دەچێتە گۆڕەوە!

لەم بارودۆخە هەستیارەی كوردستاندا، كە خەریكە هێدی هێدی تەمی ململانێی نێوخۆیی و ناكۆكییەكانی نێوان یەكێتی و پارتی و لایەنەكان، دەڕەوێ، بابایەك بە ناوی (سەرتیپ جەوھەر)ەوە كە زمانحاڵی خیانەتكارانی ١٦ی ئۆكتۆبەره، لە سایتی (چاودێر)ی مەلا بەختیار، ئەندامی ئەنجوومەنی باڵای سیاسی و بەرژەوەندییەکانی یەکێتیی نیشتمانیی کوردستان، باس لە خەونێكی تۆز لێنیشتووی كۆنی ناوەڕاستی حەفتاكانی سەدەی رابردوو دەكات، خەونی لێكترازانی پارتی، كە وا بۆ نیو سەدە دەچێت خەڵكانی زۆر لەو سەرتیپە لێهاتووتر و خەتەرتر و داهیەتر، ئیشیان بۆ كرد، خۆشبەختانە ئەوان لە حەسرەت وەدیهێنانی بەشێكی بچووك لەو خەونە، سەریان نایەوە، بەڵام چركەیەك لەو خەونەیان نەهاتە دی.

جارێ من زۆرم پێ سەیرە، سیاسەتوانێكی وەكوو مەلا بەختیار كە لە هەموو سەركردەكانی ئێستای یەكێتی زیاتر شارەزای پارتی و مێژووەكەیەتی و زۆر بەوردی ئاگای لە ململانێی نێوخۆیی كوردستانە هەم لە شاخ و هەم لە شار، ئەمە جیا لەوەی ئێستا بەپێی پۆستەكەی بە حساب دەبێ لە خەمی (بەرژوەندییە باڵاكانی یەكێتی)یدا بێت، رێگە بدات لەم كات و ساتە زۆر هەستیارەدا، وتارێكی ئاوها بێئاست و ژاراوی لە میدیاكەی ئەوەوە بڵاو بێتەوە، نازانم بەرژەوەندیی یەكێتی لە بڵاوكردنەوەی وتاری نووسەرێكی كینە لەدڵ و بەدخەیاڵ و بێئاگا لەو مێژووە، لەم كاتەدا، چ خزمەتێك بە بەرژەوەندییەكانی یەكێتی دەكات؟

مەلا بەختیار خاوەنی ئەو سایتەی ئەو وتارەی تێدا بڵاو كراوەتەوە، بە لێدوانی خۆی و بەپێی ئەو بەڵگانەی پێشكەشی كردن، ماوەیەك بەر لە ئێستا ژەهرخوارد كراوە و رووون و راشكاو لە پرێسكۆنفراسەكانیدا، ئاماژەی بە خەڵكانی ناو حزبەكەی كرد و تۆمەتباری كردن بە ژەهرخواردكردنی، بە جۆرێكیش لە جۆرەكان، باس لەوە كرا كە خەڵكانێكی نێو گرووپی خیانەتی ١٦ی ئۆكتۆبەر، دەستیان هەبووە لەو تاوانەدا، سوپاس بۆ خوا مەلابەختیار زوو گەیشتە چارەسەر و لە ژیاندا مایەوە، بەڵام من نازانم، بۆچی ئێستا میدیاكەی بۆ نووسەرێك فەراهام كردووە كە عەرزوحاڵنووسی گرووپی خیانەتی ١٦ی ئۆكتۆبەرە؟ ئایا مەلا بەختیار هێندە دەستوپێ سپیە لە نووسیندا، تا پەنا بۆ كەسانی وەكوو سەرتیپ ببات؟

شتێكی سەیرتر، هەر لەنێو حزبەكەی مەلا بەختیار و سەرتیپیشدا، چەندین كوتلە و بەرە و باڵ و دەنووك هەن، ناكۆكیی نێوخۆیی دەیان جار گەیشتووەتە لوتكە و جا ئینیشقاق و ژەهرخواردكرنی یەكتری و سەنگەر و هۆتێل و گرد و گردۆڵكە لەیەك گرتن، لەو زۆنەی حزبەكەی (مەلابەختیار و سەرتیپ) حوكمی دەكات، خەڵك و رۆژنامەنووس و میدیاكار لە شەوانی ئەنگوستەچاودا تیرۆر دەكرێن، خەڵكانی بێتاوان دەكوژرێن و تاوانباران ناگیرێن، چالاكوانانی پارچەكانی تری كوردستان تەسلیم دەكرێنەوە یان تیرۆر دەكرێن، سەرانە لە بازرگانان دەسەندرێ، زەویی گرانبەهای حكوومەت داگیر دەكرێ، قاچاخچێتییەكی زۆر لە مەرزەكان دەكرێ، داهاتی نێوخۆیی شارەكان و دەروازە سنوورییەكان دەدزرێ، پارەی بانك دیار نامێنێ، شار و شارۆچكەكان غەرقی زبڵ و خاشاك دەبن، دەست لە كاروباری دادگا وەردەدرێ و دەیان جۆر تاوان و گەندەڵی و ناكۆكیی تر لەئارادان، كەچی ئەم سەرتیپە قەڵەم كولە، هیچ یەكێك لەوانە نابینێت و قسەیان لەبارەوە ناكات، دێت و لە میدیای مەلا بەختیارەوە باس لە خەونی پووچەڵی لێكترازانی پارتی دەكات! ئەم بابەتانە پڕ بە توانای سنگ و گەروو، قاقای پێكەنینی دەوێ.

ئەگەر مەلا بەختیار ئاگادار بێت و بە ئەنقەسد ئەم بابەتەی لەم كاتەدا، بڵاو كردبێتەوە، ئەوە هەزار و یەك گومان دێتە پێش كە لێرەدا نامەوێ سەری خوێنەری پێوە بئێشێنم، چونكە تەقریبەن گومانەكان مەعلوومن، بەڵام ئەگەر مەلا بەختیار بڵێت: ”ئاگاداری بڵاوكردنەوەی ئەو بابەتەی سەرتیپ نیم!“ یان بڵێ: ”من پیاوێكی ئازادیخواز و دیموكراسخوازم و هەر كەس ئازادە لە میدیاكانی منەوە، چۆن دەنووسێت و چی بڵاو دەكاتەوە!“ من بۆ هەردوو وەڵام دەڵێم: ”بۆ حەلاوی باس كە.“