دوایین زانیاری سەبارەت بە رەوشی تەندروستیی رەنج عومەر لە نەخۆشخانەیەكی نیپاڵ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دوایین زانیاری سەبارەت بە رەوشی تەندروستیی رەنج عومەر لە نەخۆشخانەیەكی نیپاڵ

”كۆتایی ئەم هەفتەیه‌ رەنج عومەر دەگەڕێتەوه‌ هەرێمی كوردستان“

دوای ئەوەی لە چەند رۆژی رابردوودا، ره‌نج عومه‌ر، شاخەوانی كورد، كاتێك ئاڵای كوردستانی بردە سەر لووتكە چیای ئێڤێرێست و هەڵیكرد، بەهۆی سەرماوە باری تەندروستی تێك چوو و بۆ چەند رۆژێك لە نەخۆشخانەیەكی وڵاتی نیپاڵ كەوتە ژێر چاودێریی پزیشكان.

رێژین ئه‌حمه‌د، هاوژینی ره‌نج عومه‌رى بۆ (باسنیوز) ئاشكرای كرد: "باری تەندروستیی ره‌نج بەرەو باشبوونە، بەڵام هێشتا لە نەخۆشخانەیەكی نیپاڵدا ماوەتەوە و پزیشكەكان بەردەوام چاودێریی دەكەن".

هاوژینی ئەو شاخەوانە كوردە دەشڵێت: “بۆ ئێمە شانازییە كە رەنج وەك یەكەم كورد له‌ هه‌رێمى كوردستان گەیشتووەتە سەر لووتكە چیای ئێڤێرێست و ئاڵای كوردستانی لەسەر بەرز كردووەتەوە، هەموو كەس ناتوانێ ئەمە بكات”.

گوتیشی: "تا ئێستا وێنە و گرتە ڤیدیۆیەكانی رەنج لەسەر چیای ئێڤێرێست بڵاو نەبوونەتەوە، چونكە دۆخی تەندروستیی ئەو تێكچووبوو، بۆیە نەیویست تاوەكوو چاك دەبێتەوە وێنە و گرتە ڤیدیۆكانی بڵاو ببنەوە”.

رێژین ئه‌حمه‌د، ئاماژەی بۆ ئەوەش كرد: “چاوەڕوانین كۆتایی ئەم هەفتەیە رەنج بگەڕێتەوە بۆ هەرێمی كوردستان، لە كاتی گەیشتنەوەی بە دهۆك، ئەوكات زانیاریی زیاتر دەدركێنین و وێنە و گرتە ڤیدیۆكانی كاتی هەڵكردنی ئاڵای كوردستان لەسەر لووتكە چیای ئێڤێرێست دەدەینە راگەیاندنەكان".