دوای چارەگە سەدەیەك فرۆشتنی کتێبی کوردی، کتیبخانەی (میدیا) لە ئیستانبوڵ دادەخرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دوای چارەگە سەدەیەك فرۆشتنی کتێبی کوردی، کتیبخانەی (میدیا) لە ئیستانبوڵ دادەخرێت

ماوەی 25 ساڵە، سەلاحەدین بولوت لە شەقامی ئیستیقلال لە ئیستانبوڵ كتێبی كوردی دەفرۆشێت، بەڵام ئێستا كتێبخانەكەی كە ناوی (میدیا)یە دادەخات و لە پەیامێكیشدا دەڵێت: ”كتێبخانەی میدیا، ماڵی كوردە، خەزینەیەكی كولتوورییە، تكاتان لێ دەكەم خۆتان بكەنە خاوەنی“.

لە ساڵی 1996، بولوت ئەو كتێبخانەیەی لە شەقامی ئیستیقلال لە ئیستانبوڵ كردەوە، بە هەزاران كتێبی كوردی لێیە و یەكەم كەسە كە زیاتر لە 25 ساڵە تەنیا كتێبی كوردی دەفرۆشێت.

وەكوو ئەوەی خۆی قسەی بۆ ئاژانسی (دیوار)ی توركی كردووە، بەهۆی كرێی دوكانەكەی مانگانە لە سێ هەزار لیرەوە بووەتە 12 هەزار لیرە، بۆیە ناتوانێت كرێیەكە بدات و ناچارە كتێبخانەكە دابخات.

بەگوێرەی گوتەی خۆی، ئەگەر تا 1ی تەمووز هیچ ڕێگەچارەیەك نەدۆزرێتەوە بۆ كرێی دوكانەكەی بە یەكجاری دایدەخات.

ئەو دەڵێت: ”لە ساڵی 1990 هاتمە ئیستانبوڵ، چەندین كاری جۆراوجۆرم كردووە، بەڵام هەموو كاتێك بیرم لەوە كردووەتەوە، دەبێت ئەو خەونەم بێتە دی، كە دوكانێكی كتێبفرۆشتن لە ئیستانبوڵ بكەمەوە و تەنیا كتێبی كوردی تێدا بفرۆشم؟ لە ئیستانبوڵ هەر ڕۆژنامەیەك، یان كتێبێك و تەنانەت ئەگەر لە ڕۆژنامەیەكدا یەك لاپەڕە یان دوو لاپەڕەی بە زمانی كوردی تێدا نووسرابێت، وەكوو ڕۆژنامەیەكی كوردی وەرمگرتووە و لە دوكانەكەمدا فرۆشتوومە و هەڵمگرتووە. هەر كتێبێكیش كە لە توركیا قەدەغە كرابێت و كوردی بووبێت، چووم كتێبەكانم کڕیوە و هەڵمگرتوون. لە 1996 تا 1999، پۆلیس مانگانە دوو تا سێ جار هاتوون و هەڵیانكوتاوەتە سەر دوكانەكەم و پشكنیویانە، بزانن كتێبە كوردییە قەدەغەكراوەكان لای من هەن، چەند جارێكیش دەستبەسەر كراوم. هەندێك كتێب هەبوون نەمدەفرۆشتن، بەڵام وەكوو دیاری پێشكەشی خوێنەرانم كردووە و زۆرم خۆش دەوێن''.

كتێبخانەی (میدیا) وەكوو ماڵی كوردی هەر چوار پارچەی كوردستان بووە، وەكوو ئەوەی بولوت باسی دەكات، بۆ یەكەم جار ئەو وای كردووە كە نووسەرە كوردەكان كتێبەكانیان لەو كتێبخانەیە بفرۆشن و لەگەڵ خوێنەرەكانیاندا یەكتری ببینن و ئیمزا لەسەر كتێبەكان بكەن.

بولوت پێی وایە، ئەگەر خوێنەری كورد لە ئیستانبوڵ كتێبی كوردیی لێ بكڕن، ئەو دووچاری ئەوە نابێتەوە بە ناچاری كتێبخانەكە دابخات، بەڵام وەكوو ئەوەی باسی دەكات، ئەو قوتابی و خوێنەرە كوردانەش ناحەقیان نییە كە لە كتێبخانەی میدیا كتێبی كوردی ناكڕن، چونكە پێشتر كتێبی كورد قەدەغە بووە و بۆ نووسینی تێزەكانیان نەیانتوانیوە سوود لە كتێبخانەی میدیا ببینن.

بولوت داوا لە كوردپەروەران و سەرمایەدارانی كورد دەكات، خۆیان بكەنە خاوەنی ئەو كتێبخانەیە و لە داخستن ڕزگاری بكەن، چونكە خەزینەیەكی گەورەی كولتووری كوردە و بەداخستنی زیانێكی گەورە بەر كتێبی كوردی دەكەوێت لە توركیا.