بەهۆی كەمیی باران 40 بیری ئاو لە دهۆك مەترسی وشكبوونیان لێ دەكرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بەهۆی كەمیی باران 40 بیری ئاو لە دهۆك مەترسی وشكبوونیان لێ دەكرێت

بەڕێوەبەری ئاوی دەوروبەری پارێزگای دهۆك رایدەگەیەنێ، نەبارینی بارانی پێویست، مەترسی لەسەر وشكبوونی 40 بیری ئاو دروست كردووە. دەشڵێ: ”تا ئێستا دوو بیری ئاو وشك بوونە و زیاتر مەترسی لەسەر وشكبوونی بیرە ئاوەكانی قەزاكانی بەردەڕەش و شێخان هه‌یه‌".

خه‌ڵات ئه‌مین، بەڕێوەبەری ئاوی دەوروبەری پارێزگای دهۆك بۆ (باسنیوز) ئاشكرای كرد: ”بە پشتیوانیی حكوومەتی هەرێمی كوردستان پلانمان داناوە، كە ئاو لە تەواوی ناوچەكانی سنووری پارێزگای دهۆك دابین بكەین، بەتایبەتی ئەگەر سەرچاوەی ئاوی گوندێك، یان كۆمەڵگا و ئاوەدانییەك وشك ببێ، ئەوا جێگرەوەی بۆ بەكار دێنین، ئەویش بە لێدانی بیری ئاو، بۆ ئەمەش پێشنیارمان كردووە، گوژمەی سێ ملیار دینار بۆ بەرەنگاربوونەوەی وشكەساڵی و دابینكردنی ئاوی خواردنەوە بۆ هاووڵاتییان تەرخان بكرێ، كاتێ كە سەرچاوەی ئاوەكانیان وشك ببێ“.

ئاماژه‌ی بۆ ئەوەش كرد: "لە قەزاكانی به‌رده‌ڕەش و شێخان مەترسیی وشكبوونی بیرە ئاوەكان زیاترە، ئێستا مەترسی لەسەر وشكبوونی نزیكەی 40 سەرچاوەی ئاودا هەیە، بۆ ئەم مەبەستە، لەگەڵ ئیدارەی پارێزگای دهۆك پلانی باش دانراوە، بۆ دابینكردنی ئاوی خواردنەوە بۆ هاووڵاتییان“.

بەڕێوەبەری ئاوی دەوروبەری پارێزگای دهۆك گوتیشی: ”دەستپێوەگرتن بە ئاوی خواردنەوە زۆر گرنگە و پێویست هاووڵاتییان هاوكارمان بن و زێدەڕۆیی لە بەكارهێنانی ئاودا نەكەن، چونكە ئەمساڵ باران وەك پێویست نەباریوە و ئاوی كانی و سەرچاوەكان زۆر كەم بووە، ئێمە پلانمان هەیە لەو شوێنانەی ئاو كەم دەبێت، بەتایبەت لە بیرە ئیرتیوازییەكان، بۆڕیی ژێر زەوی زیاد بكەین، هەر شتێك پێویست بێ بۆ دابینكردنی ئاو ئێمە دەیكەین“.

ماجد سه‌ید ساڵح، جێگرى پارێزگاری دهۆك بۆ (باسنیوز) ئاشكرای كرد: "سەبارەت بە دابینكردنی ئاوی خواردنەوەدا ئێمە لەگەڵ بەڕێوەبەرایەتیی ئاوی قەزای ئاكرێ و بەڕێوەبەرایەتیی ئاوی دەوروبەری دهۆك، كە چوار قەزا لەخۆ دەگرێت، لەگەڵ بەڕێوەبەرایەتیی ئاوی دهۆك پلانمان داناوە، بۆ ئەوەی چەندی بیرێك لەو ناوچانە لێ بدەین، كە ئاویان وشك بووە، چونكە بەهۆی نەبارینی باران، 40 ‌تا 50 بیری ئاو رووبەڕووی مەترسیی وشكبوون بوونەتەوە و جێگرەوەمان بۆ دەستنیشان كردوون، كە بۆ هەر بیرێكی وشكبوو بیرێكی نوێ هەڵبكۆڵین“.

ئاماژەی بۆ ئەوەش كرد: "بەهۆی ئەو ئاستەنگانەی لە دەرەنجامی نەبارینی باران و كەمبوونەوەی ئاوی ژێر زەوی لە پرۆژەكانی ئاودا دروست دەبن، ئامادەییمان كردووە بۆ زیادكردنی بۆڕی و دابینكردنی غەتاس، بۆ ئەوەی ئاو بەردەوام هەبێ و گرفت دروست نەبێ“.

 ماجد سه‌ید ساڵح، ئاشكراشی كرد: "پلان بۆ تێكڕای پرۆژە ستراتیژییەكانی ئاو  داندراوە، وەك پرۆژەی خراب دیمێ و پرۆژه‌ى ئاوی فه‌یدیێ و پرۆژه‌ی جه‌م به‌ره‌كات و پرۆژه‌ی ئاوی ئامێدى و جێگرەوەشیان بۆ دەستنیشان كراوە، كە لە ئەگەری وشكبوونیاندا ئاو بۆ هاووڵاتییان دابین بكرێت“.