ئەندامیكی سەركردایەتی پارتی لە كەركووك: تەعریب لە كەركووك بە بەرنامە دەكرێ و لە كاتی خۆیدا هەموویان دەدەینە دادگا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەندامیكی سەركردایەتی پارتی لە كەركووك: تەعریب لە كەركووك بە بەرنامە دەكرێ و لە كاتی خۆیدا هەموویان دەدەینە دادگا

"ژمارەیەكی زۆر عەرەب بۆ ڕێگریكردن لە دروێنەكردنی گەنمی جووتیارانی كورد هێنراونەتە سنووری سەرگەڕان"

ئەندامێكی سەركردایەتیی پارتی لە كەركووك رایدەگەیەنێ، لە پارێزگای كەركووك پرۆسەی تەعریب لە هەموو سێكتەرەكان بە چڕی و بە بەرنامە بەڕێوە دەچێت.

لوقمان حوسێن، ئەندامی ئەنجومەنی سەركردایەتی كەركووك گەرمیانی پارتی و بەڕێوەبەری شەرعی ناحیەی سەرگەڕانی سەر بە قەزای دووبز، لە چاوپێكەوتنێكی (باسنیوز)دا ڕایدەگەیەنێت، ژمارەیەكی زۆرعەرەب بە مەبەستی ڕێگریكردن لە دروێنەكردنی گەنمی جووتیارانی كورد هێنراونەتە سنووری ناحیەی سەرگەڕانی سەر بە قەزای دووبز، دەشڵێت: "لە سنووری پارێزگای كەركووك لە هەموو سێكتەرەكان پرۆسەی تەعریب بە چڕی و بە بەرنامە بەڕێوە دەچێت".

ڕێگە نادرێت لە ڕاگەیاندنی دامودەزگا حكوومییەكانی كەركووك زمانی كوردی بەكار بهێنرێت.

لە دەستپێكدا لەبارەی ئەو پرۆسەی تەعریبە چڕەی، كە پارێزگای كەركووكی گرتووەتەوە و بەتایبەت ئێستا كە تەعریب پەلی هاوێشتووەتە هەموو جومگەكان، لوقمان حوسێن، گوتی: “پرۆسەی تەعریبكردنەوەی كەركووك بەگشتی و بە چڕی بەڕێوە دەچێت و پارێزگاری سەپێندراوی كەركووك بە هاوكاریی دامودەزگا حكوومییەكان، بە بەرنامە لە هەموو بوارێكدا تەعریب دەكەن لە بابەتی كشتوكاڵ و داگیركردنی زەویی جووتیارانی كورد و لە پرۆسەی پەروەردەدا كەن، ئێستا وای لێهاتووە ڕێگە نادەن لە ڕاگەیاندنی هەموو دامودەزگا حكوومییەكانی كەركووك زمانی كوردی بەكار بهێنرێت و ئەو پرۆسەیە لە هەموو سێكتەرەكاندا دەكرێت و بە هەزاران خێزانی تەعریبیان هێناوەتە ناو كەركووكەوە و فۆرمی خۆراك و نفووسیان دەگوزانەوە بۆ كەركووك، عەرەبی هاوردە هەن بەبێ هیچ بەڵگەنامەیەك دێن لە كەركووك نیشتەجێ دەبن و كارئاسانییان بۆ دەكرێت”.

هاوكات، لەبارەی ئەو عەرەبانەی كە دێن لە كەركووك نیشتەجێ دەبن و وەزیفەكانیشیان دەگوازنەوە بۆ كەركووك، ئەو بەرپرسە گوتی: “ئێستاش گواستنەوەی ئەو كەسانە بەردەوامە، بەتایبەت بەشێكی بەرچاو لەوانەی وەزیفەكانیان دەگوزانەوە بۆ كۆمپانیای نەوتی باكوور و دامودەزگاكانی ترە، هەروەها پۆلیس هەیە لە دیوانییە و بەغدا شوێنەكانی تریش گواستراوەتەوە بۆ كەركووك”.

سەبارەت بە داگیركردنی زەویوزاری جووتیارانی كورد، لوقمان حوسێن، گوتیشی: “یەك ملیۆن و 200 هەزار دۆنم زەویی كورد لە پارێزگای كەركووك لەلایەن عەرەبە هاوردەكانەوە داگیر كراون و لەناو دادگاش بە هەموو شێوەیەك كار بۆ ئەوە دەكەن، كە جووتیارانی كورد لەسەر زەویوزاری خۆیان ڕێگە نەدەن كار بكەن، ئەو كێشەیەش بەردەوامە و یەك ڕێگاش بۆ ڕێگریكردن لەو كردەوانە بەگشتی هەیە، ئەویش ئەوەیە كە بەرنامەی ئاساییكردنەوەی دۆخی كەركووكمان هەیە، كە بریتییە لەوەی حەشد و سوپا لەناو شارەكان دەربچن و پێشمەرگە بگەڕێتەوە و گەڕانەوەی بارەگای پارتی و پارتی گەلی توركمانی و لەهەمانكاتدا گۆڕانكاریی ئیداری لە كەركووك بكرێت و ڕاكان جبووری لەو پۆستە لابدرێت، چونكە كورد بە هەموو شێوەیەك زۆینەیە”.

گوتیشی: “دەبێ لیژنە دابنرێت بۆ هەڵوەشاندنەوەی ئەو بڕیارانەی سەبارەت بە تەعریب، كە لەم چەند ساڵەدا دەكرێت، چونكە تەعریبەكە زۆر فراوانە، ئێستا بۆ نموونە، تەنیا لە حەویجە و ڕیاز و عەباسی 250 بەڕێوەبەر و یاریدەدەری بەڕێوەبەری قوتابخانە، كە عەرەبن گواستراونەتەوە بۆ ناو كەركووك، تەنانەت لە فەرمانبەرانی ئەوقاف و بەڕێوەبەرایەتییەكانی دیكەیش خەڵك دەگوازرێنەوە بۆ ناو كەركووك، ئەم بابەتانە بەوردی لەبەردەستمانە”.

“موختاری عەرەبی هاوردەی كاتی بەعس دانراوەتەوە”

لەبارەی بەوەی هێشتا بەتەواوەتی وەرزی دروێنە نەهاتووە و جووتیارانی كوردی سنووری گوندی پەڵكانەی سەر بە ناحیەی سەرگەڕان دەڕاسەیان برد و لە ترسی عەرەبی هاوردە ویستیان زوو دەست بە دروێنەكردنی گەنمەكانیان بكەن، لوقمان حوسێن، كە لەدوای خیانەتی 16ی ئۆكتۆبەرەوە كەسێكی دیكە بەوەكالەت لە شوێنەكەی وەك بەڕێوەبەری ناحیەی سەرگەڕان داندراوە و خۆیشی تاوەكوو ئێستا بەڕێوەبەری شەرعیی ناحیەكەیە، گوتی: “ئەوەش بە بەرنامەیە، ئێستا بە بڕیاری ڕاكان جبووری، بۆ نموونە كەسێكی عەرەبی هاوردەیان كردووەتە موختاری گوندی پەڵكانەی سەر بە ناحیەی سەرگەڕان، كە موختاری پێش ڕووخانی رژێمی بەعس بووە و بە نووسراوی ئەو موختارە و بە هەمائاهەنگی لەگەڵ هێزە ئەمنییەكان ژمارەیەكی زۆر عەرەبیان هێناوەتەوە بۆ ناوچەكە، بۆ ڕێگریكردن لە دروێنەكردنی گەنم و جۆی جووتیارانی كورد، هەروەها دادگاكانیش ئێستا بە سیاسی كراون و بە نووسراوی ڕاكان جبووری كار دەكەن، بۆیە ڕێگریی لە جووتیاران كراوە گەنمەكانیان دروێنە بكەن، واتا ئەمە پرسەیەكی زۆر ئاڵۆزە و بە بەرنامە دەكرێت و دەبێ رەوشی كەركووك ئاسایی بكرێتەوە و ئەوانەیشی كە ئەو بەرنامانانەی تەعریب بەڕێوە دەبەن لای ئێمە دەستنیشان كراون و هەموویان لە كاتی خۆیدا دەدەینە دادگا”.

“هێزە سەپێندراوەكان نامۆن و خەڵك هاوكاریان نییە”

لەكۆتاییدا، لەبارەی خراپیی دۆخی ئەمنیی پارێزگای كەركووكەوە، ئەو ئەندامەی سەركردایەتیی كەركووك- گەرمیانی پارتی، ئاماژەی بۆ ئەوە كرد: “ئەو دەزگا ئەمنییانەی لە پارێزگای كەركووكدان، ئێستا نامۆن و خەڵكی پارێزگاكە نیین و خەڵك هاوكاریان نیین، بۆ نموونە، پۆلیسی فیدڕاڵی و سوپا بریتیین لە یەك پێكهاتە و زیاتر خەڵكی باشووری عێراقن، هەروەها ئەوانەی ئێستا حەشدن، بەتایبەتی حەشدی عەشایەری، ئەوانە خۆیان داعشن و گوندە عەرەبنشینەكان ئاسانكارییان بۆ دەكەن و كاتێكیش كێشەیان بۆ دروست دەبێ، ئەوكاتە ناسنامەی حەشدی عەشایەرییان هەیە، بۆیە پێویستە لێكۆڵینەوەی وردی ئەمنیی بكرێت، ئەویش بە گەڕانەوەی پێشمەرگە دەبێت”.