دەزگای مین: لە ماوەی سێ مانگدا ڕووبەری 156 هەزار و 615 مەتر دووجامان لە مین و تەمەنی پاك کردووتەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دەزگای مین: لە ماوەی سێ مانگدا ڕووبەری 156 هەزار و 615 مەتر دووجامان لە مین و تەمەنی پاك کردووتەوە

دەزگای گشتیی كاروباری مین لە هەرێمی كوردستان ڕادەگەیەنێت كە تەنیا لە ماوەی سێ مانگی ڕابردووی ئەمساڵدا بەشێکی زۆر لە ناوچەكانی هەرێمی كوردستانیان لە مین و تەمەنی پاك كردووەتەوە.

دەزگای گشتیی كاروباری مین ئاماژەیان بۆ ئەوە كردووە كە هەرێمی کوردستان یەکێکە لە ناوچە مەترسیدارەکان و بەهۆی مین و پاشماوەکانی جەنگەوە ڕووبەری (٧٧٦) کم٢ ڕووبەری خاکەکەی پیس کراوە بە مین و تەقەمەنی و پاشماوە جەنگییە نەتەقیووەکان کە لەلایەن دەزگای گشتیی کاروباری مینەوە بەسەر سێ هەزار و 500   ناوچەی مەترسیداردا دابەش کراوە، کە لەو ناوچانە زیاتر 13 هەزار و 521 هاووڵاتی بوونەتە قوربانی و ڕۆژانە بە بەردەوامی گوێمان لە هەواڵی نەخوازراوی ڕووداوی مین لە هەرێمی کوردستان دەبێت کە کاریگەریی لەسەر لایەنی کۆمەڵایەتی و ژێرخانی  ئابووری و ئاوەدانکردنەوە هەبووە.

لە ڕاگەیاندراوەكەدا باسیان لەوەش كردووە كە بۆ ئەو مەبەستە حکوومەتی هەرێمی کوردستان لە ساڵی ٢٠٠٧ دەزگای گشتیی کاروباری مینی دامەزراند، کە ڕۆژانە بە بەردەوامی تیمەکانی خەریکی پاککردنەوە و لەناوبردن و پووچەڵکردنەوەی مین و تەقەمەنین و مانگانە بە هەزاران مین و تەقەمەنی لە ناوچە مەترسیدارەکان و کێڵگەمینڕێژەکان هەڵدەگرنەوە و پووچەڵیان دەکەنەوە.

 باسیان لەوەش كردووە كە تەنها لە ماوەی سێ مانگی ڕابردووی  ئەمساڵدا (کانوونی دووەم/ شوبات/ئازار) چالاکییەکانی دەزگای گشتیی کاروباری مین بەم شێوەیە بووە:

  1. ژمارەی ئەو مین و تەقەمەنیانەی لەناو براون بریتی بووە لە دوو هەزار و 796 مین و تەقەمەنی و پارچەی تەقەمەنیی جەنگی کە هەریەکێک لەو مین و تەقەمەنیانە مەترسی بوون لەسەر گیانی چەندین هاووڵاتی.
  2.  کۆی ڕووبەری پاککراوە لەو سێ مانگەدا بریتی بووە لە 156 هەزار و 615 مەتر دووجا کە دوای پاککردنەوەی ڕادەستی خاوەنەکانیان کراوەتەوە بۆ نیشتەجێبوون و کشتوکاڵ و دەتواندرێت دووبارە وەبەرهێنانی تێدا بکرێـت.