كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

قائیمقامی شنگال: عێراق هێزی بۆ كۆنتڕۆڵكردنی سنوور ناردبووه‌، به‌ڵام هێشتا چه‌کدارانی په‌که‌که له‌ سوریاوه‌ دێنه‌ شنگال

 قایمقامی قه‌زای شنگال، باس له‌ ئاڵۆزییه‌کانی شنگال ده‌کات و ئاماژه‌ به‌وه‌ ده‌کات، که‌ هیچ گه‌ره‌نیتیه‌ک نییه‌ بۆ ئه‌وه‌ی دووباره‌ شه‌ڕ و تێهه‌ڵچوون له‌ نێوان په‌که‌که‌ و سوپای عێراق دروست نه‌بێته‌وه‌.

ئه‌مڕۆ دووشه‌ممه‌ 16/5/2022، نایف سه‌یدۆ به‌ (باسنیوز)ی راگه‌یاند: ئێستا دۆخی شنگال له‌ دوای شه‌ڕی سه‌ره‌تای ئه‌م مانگه‌، كه‌مێك ئارام بووه‌ته‌وه‌، به‌ڵام گره‌نتی ئه‌وه‌ نییه‌ دووباره‌ شه‌ڕ له‌ نێوان په‌که‌که‌ و سوپای عێراق له‌ شنگال سه‌ر هه‌ڵنه‌ده‌داته‌وه‌.

ئاماژه‌ی به‌وه‌ش كرد: ماوه‌یه‌ک پێش ئیستا، سوپای عێراق هاتووه‌ته‌ سنووری شنگال و سووریا به‌ مه‌به‌ستی کۆنتڕۆڵکردنی ناوچه‌که‌ و ئیستا سوپای عێراق هاتوون، گوایه‌ رێککه‌وتنی هه‌ولێر و به‌غدا جێبه‌جێ بکه‌ن، به‌ڵام تائێستا یه‌ک خاڵی ئه‌و رێککه‌وتنه‌ جێبه‌جێ نه‌کراوه‌، ئیستاش به‌پێی قسه‌ی خه‌ڵکی شنگال له‌ ناوچه‌ی بارا له‌ سنوونێ، چه‌کداری په‌که‌که‌ به‌رده‌وام له‌ سووریاوه‌ دێنه‌ شنگال.

گوتیشی: جیا له‌ پرسی په‌که‌که،‌ له‌ شنگال به‌شێکی یه‌کجار زۆری كوردانی ئێزدی ئاواره‌ی ده‌ره‌وه‌ی وڵات بوون، تا په‌که‌که‌ش له‌و سنووره‌ بێت، خه‌ڵک ناگه‌ڕێته‌وه‌ شنگال و په‌که‌که‌ ده‌بێت ‌شنگال چۆڵ بکات، کاریان له‌وێ نییه‌ و‌ ئه‌وان خه‌باتیان له‌ باكووری كوردستان و تورکیایه‌، به‌ پێچه‌وانه‌وه‌ ره‌نگه‌ په‌که‌که‌ کاره‌ساتی گه‌وره‌ به‌سه‌ر ‌شنگالدا بهێنێت.