جۆرە دارێك بە قاچاغ دێتە كوردستان نرخەكەی هەشت هەزار دۆلارە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

جۆرە دارێك بە قاچاغ دێتە كوردستان نرخەكەی هەشت هەزار دۆلارە

”گرانترین دار لە كوردستان بە پێنج دەفتەر دۆلار دەفرۆشرێ و بازاڕی باشە“

جۆرە دارێك لە ئیسپانیاوە بە قاچاغ بۆ كوردستان دێت، نرخەكەی نزیكەی هەشت هەزار دۆلارە، داری جۆری زەیتوونی بۆنزاش، نرخەكە لەنێوان ٤٠ بۆ ٥٠ هەزار دۆلارە.

ئامانج مەحموود، ئەندازیاری كشتوكاڵی، ماوەی ١٩ ساڵە لە وڵاتی ئەڵمانیا سەرپەرشتیی دووەم گەورەترین نەمامگەی ئەو وڵاتەی كردووە، ئێستا سەرپەرشتیاری نەمامگەی ڤێرنایە لە هەولێر، بۆ (باسنیوز)، ئاماژە بەوە دەدات، كە جۆرە دارێك بە قاچاغ لە وڵاتی ئیسپانیاوە بڵاو بووەتەوە، یەكێكە لە گرانترین ئەو دارانەی، كە بە مەبەستی جوانكاری لە ماڵان دادەنرێت، ”ئەو دارە لەو وڵاتە بەشێوەیەك دەیسووتێنن، گوایە مردووە و فڕێ دەدرێت، ئینجا بە قاچاغ بۆ وڵاتانی دیكەی دەبەن“.

ئەو ئەندازیارە، نكۆڵی لەوە ناكات، كە لە كوردستان كەس ناوی دارەكە بەتەواوی نازانێت و هەر جارە و ناوێكی پێ دەڵێن، بەڵام نرخەكەی نزیكەی هەشت هەزار دۆلارە، خۆیشی لەگەڵ كەشوهەوای كوردستان گونجاندووە و دەڵێت: ”هەر كەسە و ناوێكی لەو دارە ناوە و هەندێك دەڵێن پاڵما، یان یۆگا ئەفریقی، بەڵام بەگشتی ئەو دارە نرخی لە جیهان زۆر بەرزە و لێرەش نرخەكەی بەرزە، خۆیشی لەگەڵ كەشوهەوای كوردستان گونجاندووە و داواكارییشی هەیە، بەڵام بەهۆی ئەوەی بە قاچاغ دێت، نرخی گرانە، لە ئیسپانیا لە دارستانەكان دەیسووتێنن، دواتر بەپێچراوی بۆ كوردستان دێت، چونكە حكوومەتی ئیسپانیا نایەوێت ئەو دارە بە وڵاتانی دیكەدا بڵاو بێتەوە“.

سەرپەرشتیارەكەی ئەو نەمامگەیە باس لەوە دەكات، زۆر دار و رووەكی دیكە هەیە، تەنیا بۆ رازاندنەوە و جوانین، بەریان نییە و نرخەكانیان زۆر بەرزە، وەك بۆنزای زەیتوون، كە نرخەكەی بۆ سەرووی پێنج دەفتەر دۆلار دەڕوات، چونكە دارێكی بەتەمەنە و سەدان ساڵ خۆی دەگرێ، جۆری ئیسپانییەكەشی لە هەمووی گرانترە، ئیتالی و توركیشی هەیە، ”ئەو دارە بۆنزایە تەمەنی زۆرە و بەری نییە، ئێستا ئەو بۆنزایە لە كوردستان لە هەموو دارەكانی دیكە گرانترە و رەواجی هەیە، زۆربەی ئەوانەیشی دەیكڕن، كۆمپانیا گەورەكانن و لەبەردەم باڵەخانەكانیان دەیڕوێنن، زۆر دەوڵەمەندیش هەیە كڕیویەتی، بەردەوامیش داواكاری بۆ كڕینی هەیە“.