ئەمڕۆ 48 ساڵ بەسەر بۆردومانی شاری هەڵەبجەدا تێپەڕ دەبێت کە زیاتر لە 150 قوربانیی لێ کەوتەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەمڕۆ 48 ساڵ بەسەر بۆردومانی شاری هەڵەبجەدا تێپەڕ دەبێت کە زیاتر لە 150 قوربانیی لێ کەوتەوە

ئەمڕۆ 48 ساڵ بەسەر بۆردومانى ساڵى 1974ی شارى هەڵەبجەدا تێپەڕ دەبێت کە بەهۆیەوە زیاتر لە 56 هاووڵاتیى هەڵەبجە شەهید و زیاتر لە 100 کەسیش بریندار بوون.

لەم بارەیەوە، غەیدان حەسەن، گوتەبێژی بەڕێوەبەرایەتیی گشتیى کاروبارى شەهیدان و ئەنفالکراوانى هەڵەبجە، بە (باسنیوز)ى ڕاگەیاند: "ڕۆژی 24/4/1974 كە ئەوكات زانكۆی سلێمانی لە شاری قەڵادزێ بوو، ڕژێمی بەعس بۆمبارانی شاری قەڵادزێی كرد و لە ئەنجامدا چەندین قوتابی و هاووڵاتیی ئەو شارە شەهید بوون، بۆیە ڕۆژی 26/4/1974 خەڵكی هەڵەبجە بۆ ئیدانەكردنی ئەو بۆردومانەی قەڵادزێ و دەربڕینی هاوخەمی بۆ قوربانیانی ئەو شارە لە هەڵەبجە خۆپێشاندانێكی هێمنانەیان کرد، بەڵام ڕژێمی بەعس بە چەکى قەدەغەکراوى ناپاڵم هێرشى کردە سەر شارى هەڵەبجە و لە ئەنجامدا زیاتر لە 56 هاووڵاتیی هەڵەبجە شەهید و زیاتر لە 100 کەسیش بریندار بوون''.

ڕوونیشى کردەوە: "شارى هەڵەبجە لانکەى شۆڕش و خەبات و قوربانیدان بووە و بەردەوام دەسەڵاتی ڕژێمی بەعسی ڕەت کردوەتەوە، بۆیە ڕژێمی بەعس بەردەوام بەدوای ھەلێکدا گەڕاوە تاکوو تۆڵە لە خەڵکی بێتاوانی هەڵەبجە بکاتەوە''.

غەیدان حەسەن گوتیشى: "وەک بەڕێوەبەرایەتیى گشتیى کاروبارى شەهیدان و ئەنفالکراوانى هەڵەبجە، ساڵانە یادى قوربانییانى ئەو بۆردومانە بەرز ڕادەگرین، ئەمساڵیش كە 48 ساڵ بەسەر ئەو بۆردومانەدا تێپەڕ دەبێت، لە ڕێوڕەسمێكدا تاجەگوڵینەی ڕێز و وەفا  لەبەردەم دیواربەندى شەهیدانى 1974ی هەڵەبجە، لەناو مۆنۆمێنتى هەڵەبجە دادەنێین و یادى قوربانییانى ئەو بۆردومانە بەرز ڕادەگرین''.