پلانێک سەبارەت بە مۆڵەتی شۆفێری له‌ هه‌رێمی كوردستان پێشنیاز ده‌كرێ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

پلانێک سەبارەت بە مۆڵەتی شۆفێری له‌ هه‌رێمی كوردستان پێشنیاز ده‌كرێ

 "مۆڵەت بكرێتە خاڵ و بۆ ماوەیەك لە شوفێرەكە وەربگیرێتەوە"

 بەرپرسێکی هاتوچۆ ئاشکرای کرد، پلانێک هەیە مۆڵەتی شۆفێری بكرێتە خاڵ، كە لە كاتی تەواوبوونی خاڵەكانی، شوفێر لە كاتی سەرپێچیكردندا، بۆ ماوەیەك مۆڵەتەكەی لێوەربگیرێتەوە.

عه‌مید ئه‌سعه‌د مه‌لا كه‌ریم، گوته‌بێژی هاتوچۆی هه‌رێمی كوردستان بە (باسنیوز)ی ڕاگەیاند: "ئێستا تەنیا لە شاری هەولێر رێکارەکانی دەرهێنانی مۆڵەتی شۆفێری بە سیستمی وڵاتی كۆریای باشوور دەکرێت، بەڵام ئێستا ئەو سیستمە لە كۆریاش جێبەجێ ناكرێت و سیستمی تازەتر بەكار دێنن، ئێمەش خوێندنەوە بۆ گۆڕانکاریی سیستەمەکە دەکەین".

گوتیشی: “لە هەر شارێكی هەرێمی کوردستان مۆڵەتی شۆفێری بە شێوەیەكی جیاواز بە شۆفێران دەدرێت، بەڵام بە هەوڵی هەموولایەك، هاتوچۆی گشتی لەگەڵ وەزارەت و هاتوچۆی شارەكان لەبەرنامەیاندایە، لە ئایندەیەكی نزیكدا هەموو شارەكان بە یەك شێواز مۆڵەت بدەن بە شوفێران".

ئاشکراشی کرد، نۆ شوێنی تاقیكردنەوەی مۆڵەتی شۆفێری لە شار و قەزا و ناحیەكانی هەرێمی کوردستان هەیە و مۆڵەت بە شۆفێران دەدەن، "جگە لەوەش، 191 نووسینگەی فێركردنی شۆفێری بە رێنمایی وەزارەتی ناوخۆ هەیە، ئەو كەسانەی لەوێ كار دەكەن كەسانی مەدەنین، بەڵام بە سەرپەرشتیی بەڕێوەبەرایەتیی هاتوچۆی شارەكان كار دەكەن، كە هەمووشیان سەر بە كەرتی تایبەتن".

بەپێی ئامارێکی بەڕێوەبەرایەتیی گشتیی هاتوچۆ، لە هەرێمی کوردستان یەك ملیۆن و ٩٨٥ هەزار و ٧٢٧ ئۆتۆمبێل تۆمار کراون، کە بەپێی گوتەی بەرپرسێکی پۆلیسی هاتوچۆ، دەکاتە بۆ هەر سێ کەس ئۆتۆمبێلێک.

سەبارەت بە دیاریكردنی ماوەیەكی زۆر بۆ ئەو كەسانەی لە تاقیكردنەوەی شۆفێریی دەرناچن و دووبارە هەوڵ دەدەنەوە، بەڕێوەبەری پلاندانان لە بەڕێوەبەرایەتیی هاتوچۆی گشتیی هەرێمی كوردستان باسی لەوە کرد، هۆكارەكە بۆ زۆریی ژمارەی داواكاری بۆ دەرهێنانی مۆڵەتی شۆفێری دەگەڕێتەوە، كە كارمەندانی ئەو بەڕێوەبەرایەتییە پێڕاناگەن ئەو هەموو كارە رایی بكەن، هۆكارێكی دیكەیش ئەوەیە، ماوەیەكی زۆری پێ بدەین بۆ ئەوەی هەڵەكانی خۆی چاك بكاتەوە، ئەوەش بە چەند رۆژێكی كەم ناکرێت.

ئەسعەد مەلا كەریم، ئەوەشی خستە ڕوو، بەرنامەیەک هەیە مۆڵەتی شۆفێری گۆڕانکارییەکی تێدا بکرێ، گوتیشی: "نیازمانە و خوازیارین مۆڵەتی شۆفێری بكرێتە خاڵ، كە لە كاتی تەواوبوونی خاڵەكانی، شوفێرەكە هەر سەرپێچییەك بكات، بۆ ماوەیەك مۆڵەتەكەی لێ وەربگیرێتەوە، ئێستا لە هەرێمی کوردستان تەنیا سزا بۆ شوفێرەكە سزای پێبژاردنی پارەیە، كە هەندێكجار ئەگەر شۆفێرەكە مۆڵەتی نەبێت، سزاكە دەبێتە دەستگیركردن".

بەپێی ئامارێکی بەڕێوەبەرایەتیی هاتوچۆی گشتیی هەرێمی كوردستان، مۆڵەتی شۆفێری دراوەتە یەک ملیۆن و 911 هەزار و 185 كەس و لەو ژمارەیەش یەك ملیۆن و 681 هەزاریان لە رەگەزی نێر و  229 هەزاریشیان لە رەگەزی مێن.

ئێستا له‌ كوردستان، بۆ هه‌ر سێ كه‌سێك ئۆتۆمبێلێك هەیە , ساڵانە ژمارەیەكی یەكجار زۆر ئۆتۆمبێل لە كوردستان تۆمار دەكرێت، بە شێوەیەك تەنیا لە ساڵی 2021 زیاتر لە 128 هەزار ئۆتۆمبێل تۆمار كراوە.