چەند كۆڵان خوار ئاور.. غەزەل لە هەناوی كێشە و کەڵکەڵەکانی مرۆڤی كورددا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

چەند كۆڵان خوار ئاور.. غەزەل لە هەناوی كێشە و کەڵکەڵەکانی مرۆڤی كورددا

 

(چەند کۆڵان خوار ئاور) ناوی کتێبێکی شیعریی رابوون رۆژهەڵاتە، کە ئێوارەی پێنشەممە، ڕێکەوتی ٢٠٢١/٣/٣١، لە هۆڵی سەنتەری ئاڵا، بە پێشوازیی نووسەران و شاعیران و ئەدەبدۆستان، غەزەلەكانی پێشکەش بە ئامادەبوان کرا و کۆڕێک بە مەبەستی ناساندنی ئەم کتێبە بەڕێوە چوو، شاعیران و شارەزایانی بواری غەزەل و ئەدەبییاتی کلاسیکیش، بیروبۆچوونی خۆیان لە قاڵبی وتاری ئەدەبییدا پێشکەش بە ئامادەبوانی کۆڕەکە کرد.

رابوون رۆژهەڵات، شاعێرێكی نێوخۆی رۆژهەڵاتی كوردستانە كە لە بەرهەمەكانیدا زیاتر باسی پێشمەرگە و خەبات و كوردایەتی و نیشتمانپەروەری دەكات. رابوون لەم کتێبەدا، هەوڵی نوێكردنەوەی غەزەلی كوردیی داوە، (چەند کۆڵان خوار ئاور) چەند ساڵێکە لەلایەن نووسەر و وەرگێڕ کامیل نەجاری، بە شێوەی پچڕپچڕ لە تۆڕە کۆمەڵایەتییەکان بڵاو دەبووەوە و سەرەنجام لەسەر دەستی نووسەر و وەرگێڕ رەسووڵی سوڵتانی کۆ کرایەوە و چاپ و بڵاو بووەوە.

لە دەستپێکی کۆڕەکەدا، نووسەر و وەرگێڕ و رۆژنامەنووس کامیل نەجاڕی، وتارێکی لەسەر رەوتی غەزەلی کلاسیک و غەزەلی نوێی کوردی پێشکەش بە دانیشتوان کرد و بەم شێوەیە هاتە ئاخافتن:
"لە رۆژهەڵاتی کوردستان، نزیکەی 20 ساڵە ڕەوتێکی غەزەلنووسی دەستی پێ کردووە کە بە غەزەلی نوێ ناودێر کراوە. تایبەتمەندی هەرەسەرەکیی ئەم رەوتە ئەوەیە، کە بەپێچەوانەی مێژووی غەزەل و ڕەوتی باوی غەزەل لە ڕابردوودا، کە تایبەت بووە بە شیعری سۆزداری و عاشقانە و عێرفانی، کە تەنیا ئاوڕی لە چەند موتیفێک داوەتەوە، لە غەزەلی نوێدا بەم شێوەیە نییە و ئاوڕ لە کێشە کۆمەڵایەتییەکان و کەڵکەڵەکانی مرۆڤی ئەم سەردەمە دەداتەوە و بە زمانێکی نوێ و جیاوازتر لەو زمانەی پێشتر غەزەلی پێ دەنووسرا، هەنگاوی ناوە.”

نەجاڕی گوتیشی: ”لەو نێوەدا، رابوون رۆژهەڵات، دەنگێکی جیاوازە لەنێو زۆربەی غەزەلنووسەکاندا. رابوون، ناوەڕۆکی شیعرەکانی تایبەتن بە جۆرێ لە گوتار کە پێی دەگوترێ ئەدەبیاتی بەرەنگاری. لەو سۆنگەیەوە، رابوون کۆڵبەر و سێدارە و خۆپیشاندان و مانگرتن و خەباتی چەکداری و راسان و شەهیدبوونی پێشمەرگە و هەر رووداوێکی سیاسی کە پەیوەندیی بە کوردەوە هەبێ، بەتایبەت کوردانی رۆژهەڵات، بۆی دەبێتە هەوێنی شیعر. ئەم ناوەڕۆکە شیعرییە لەلایەک و لەلایەکی دیكەوە، زمانێکی جیاواز کە زیاترین وێنای شیعریی تێدایە و بە رژدی کار لەسەر زمان کراوە و گەمەی زمانیی تێدایە، شاعیر وێنایەکی دیكە لە ژن و پێشمەرگە و خەبات و شار و شاخ پیشان دەدات، ئەمە یەکێک لە تایبەتمەندییەکانی شیعری رابوون رۆژهەڵاتە“.

جێ باسە، رابوون رۆژهەڵات، ناوی خوازراوی غەزەلنووسێکی نوێخوازی ناوخۆی رۆژهەڵاتە کە بەهۆی ناوەڕۆکی غەزەلەکانییەوە و نەبوونی کەشی ئازادیی سیاسی لە رۆژهەڵاتی کوردستان، هێشتا شوناسی دیار نییە، بەڵام دەکرێ بڵێین، رابوون دەشێ هەر کوردێکی خەباتکار بێ کە دڵی بۆ نیشتمان لێ دەدات و حەزی لە نووسینی غەزەلە.