چالاكییەكانی ژووری عەمەلیاتی یەكێتی!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 01/02/2022

چالاكییەكانی ژووری عەمەلیاتی یەكێتی!

چەند رۆژێك لەمەوبەر، پیاوێكی عاقڵ و ماقووڵ و شارەزا لە سیاسەت، بە ناوی یەكێتیی نیشتمانیی كوردستانەوە، لێدوانێكی دا و مژدەیەكی خۆشی بە بەرهەم ساڵح و هەوادارانی دا، ئەو گوتی: ”لەنێو یەكێتیدا، ژوورێكی عەمەلیاتمان دروست كردووە بۆ سەرخستنی بەرهەم ساڵح بۆ پۆستی سەركۆماری عێراق“.

هەرچەند ”گومانكردن“، لەڕووی ئایینییشەوە شتێكی باش نیە و گەلێ جار بە ”گوناح“ لەسەر مرۆڤ دێتە هژمار، بەڵام هەر لەخۆمەوە كە ئەو هەواڵەم خوێندەوە، وام بە زەیندا هات كە جەنابی دكتۆر، لە گیرفان و پارەی حەڵاڵی خۆی! چەند ملیۆن دۆلارێكی تەرخان كردووە بۆ مانۆڕی سەركەوتنەكەی بۆ سەر كورسیی سەركۆماری و، جەماعەتی میدیای یەكێتییش بۆ ئەوەی بڕێكی باش لەو چەند ملیۆنەیان بەركەوێت، پاش ڕامانێكی قووڵ، بیرۆكەی پێكهێنانی (ژوورێكی عەملیات)یان بە خەیاڵدا هاتووە، هەر زووش خەیاڵەكەیان كردووەتە واقیع!

رۆژ و سات زوو تێپەڕین و چالاكییەكانی پیاوانی عەبقەریی ئەو ژووری عەمەلیاتەی یەكێتیمان بینی، یەكەم ئیشیان ئەوە بوو كە دەستیان كرد بە وەرگێڕانی رۆژانەی ئەو راپۆرتە فارسییانەی لە سایتە ئێرانیەكاندا، دژی هۆشیار زێباری بەربژێری پارتی بڵاو دەبوونەوە و تا ئێستاش بەردەوامن، وەی بتخۆم ژووری عەمەلیات! چالاكیی دووەم: نووسینی بابەتێك بوو بە ناونیشانی: ”كاندیدەكەی یەكێتی بۆ سەرۆك كۆمار، رووسپییە!“ وەی ئەگەر وشەی (رووسپی) بۆ مەدح و سەنا بەكار بهێنرێت، هەزار جار رووتان سپی بێت ئەی پیاوە لێهاتووەكانی ژووری عەمەلیاتی یەكێتی بۆ سەرخستنی بەرهەم ساڵح!

سێیەم چالاكییان ئەوە بوو كە لە تیكتۆك و ئەنستاگرامەوە، بە عەرەبی و بە كوردی، كەوتنە هێرش بۆ سەر هۆشیار زێباری كە بەربژێری هەرە بەهێزە بۆ پۆستی سەركۆمار!

لەوە چالاكییە كۆمیدیتر كە ژووری عەمەلیاتی یەكێتی بەڕێوەی برد، رێكخستنی خۆپیشاندانە پەنجا كەسیەكەی بەغدا بوو كە بە قسەی یەكێك لەو خۆپیشاندەرانەی ساحەی تەحریری بەغدا كە لە سۆیشال میدیا قسەی دەكرد، هەر یەك لەو خۆپیشاندەرانە، بڕی (٢٠) هەزار دیناری عێراقیی چاپی سەردەمی بریمەری پێ بڕاوە، ئەو خۆپیشاندەرە كە ئاڵایەكی عێراق و وێنەیەكی هۆشیار زێباریی پێ بوو و ئیكسێكی سووری بەسەردا هێنرابوو، بە قەشمەرجاڕییەوە دانی پیا نا و گوتی: ”هەندێك لەو خۆپیشاندەرانە، بە بڕی پێنج هەزار دیناریش هێنراونەتە سەر جادە!“.

جا من لێرەدا، هەر لە روانگەی ئەو (گومانە خراپەی) خۆمەوە، كە دڵنیام لەودنیا بە (گوناح) بۆم نانووسرێت، خاترێكی ژووری عەمەلیاتی یەكێتی دەگرم و هەم گریمانەی ئەوە دەكەم ئەو (٥٠ خۆپیشاندەرە)، پەنجا كەس نەبن و سەد كەس بن، هەمیش هەر خۆپیشاندەرێك و بڕی ٢٠ هەزار دیناریان بۆ حساب دەكەم و چاو لە خۆپیشاندەرە پێنج هەزار دینارییەكان! دەپۆشم، كەواتە ئەو رۆژە، ژووری عەمەلیاتی یەكێتی، بڕی دوو ملیۆن دیناری عێراقیی بە هەر هەموو خۆپیشاندەرەكان داوە، ئەوە لە حاڵێكدا ئەگەر ١٠٠ كەس بووبن و هەریەكەیان ٢٠ هەزار دیناری وەرگرتبێت! خۆش بە حاڵی ئەندامانی ژووری عەمەلیاتی یەكێتی، هێشتا ملیۆنان دۆلارەكەی دكتۆر تەرخانی كردووە، زۆری لە حەوزدا ماوە! ئەوە ئەگەر ژمارەی خۆپیشاندەرانیان لەسەر دكتۆر زیاتر حساب نەكردبێت!

چالاكییەكی جەهەنەمییانەی تری ژووری عەمەلیاتی یەكێتی بۆ سەرخستنی بەرهەم ساڵح، ئەمە بوو: نازانم كام عاقڵەیان! پێشنیاری ئەوەی بۆ كاك بافڵ تاڵەبانی كردبوو، لە دانوستانەكاندا لەگەڵ لایەنە عێراقیەكان، ئاڵا تاڵەبانی ببوورن (ئەسەدی) لەگەڵ خۆیدا بەرێت! وەڵا ئافەرین بۆ ژووری عەمەلیاتی یەكێتی، تۆ سەیری ئەو خوتەیە! ئاڵا تاڵەبانیەك كە لە دوایین هەڵبژارندا، دوای ئەوەی یەكێتی دەریكرد، پاش ئەو هەموو مەرایی و ماستاوەی بۆ لایەنە وەلائیەكانی كرد، بە كورد و عەرەب و توركمان و مەسیحی و سوننە و شیعەی كەركووكەوە، بایی ئەوەندە دەنگیان پێنەدابێت تا دەربچێت، تۆ بچیت بیكەیتە شاندی دانوستانكار بۆ پۆستی سەركۆمار! ئاخر كە من دەڵێم ژووری عەمەلیاتی یەكێتی عەبقەرین، ئەنگۆ فشەتان پێدێ!

لە هەموو ئەوانە عەنتیكەتر و خۆشتر، ئێستا تۆپ لە گۆڕەپانی ئەندامانی پەرلەمانی عێراق و حزب و فراكسیۆن و لایەنەكانی نێو پەرلەمانە، بڕیاری كۆتاییش بۆ هەڵبژارنی سەركۆماری داهاتووی عێراق لای ئەوانە، واتە لە دەرەوەی هۆڵی كۆبوونەوە و دانوستانی حزب و لایەنەكان و هۆڵی پەرلەمانی عێراق، هیچ قسەیەك لەوبارەیەوە توورێكی قوڕاوی ناهێنێت، دەوڵەتانی ئیقلیمی و زلهێزانی دونیا، هەمووی هەر خەریكن تا ئەم دۆخە سیاسییە چەقبەستووەی عێراق، لایەكی بە لایەكدا بكەوێت، كەچی ژووری عەمەلیاتی یەكێتی، بەتەمایە بە تیكتۆك و راپۆرتی فارسی و ئاڵا تاڵەبانی و بەیاننامەی كۆمەڵی دادگەری و خۆپیشاندەری پێنج هەزار دیناری، بەرهەم ساڵح سەر بخات!