بەوێنە.. لە سۆران بەفر ئاستەنگی بۆ هاتوچۆ دروست كردووە و تیمەكان سەرقاڵی پاككردنەوەی رێگاوبانەكانن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بەوێنە.. لە سۆران بەفر ئاستەنگی بۆ هاتوچۆ دروست كردووە و تیمەكان سەرقاڵی پاككردنەوەی رێگاوبانەكانن

 لە شەوی رابردووەوە بەفرێكی زۆر لە شار و شارۆچکە و گوند و ناوچەکانی ئیدارەی سەربەخۆی سۆران باریوە. بەڕێوەبەری چاككردنەوە و پاراستنی رێگاوبانەكانی سۆرانیش دەڵێت، ئەو شەپۆلی بەفرە ئاستەنگیی زۆری بۆ هاتوچۆ دروست کردووە و کردنەوەی رێگاکان بە چەند قۆناغێک دەبێت.

ئەندازیار، خوسرەت سادق دری، بەڕێوەبەری چاککردنەوە و پاراستنی رێگاوبانی سۆران، لە رێی (باسنیوز)ەوە شۆفێران و هاووڵاتییانی سنووری ئیدارەی سۆران ئاگادار دەكاتەوە و رایدەگەیەنێت: “ئاگاداری هاووڵاتییانی سنووری ئیدارەی سەربەخۆی سۆران دەکەینەوە، دوای هاتنی ئەو شەپۆلی بەفرەی كە هەموو ناوچەكانی گرتووەتەوە، تیمەكانی بەفرڕاماڵینی بەڕێوەبەرایەتیمان سەرلەبەیانیی زوو لە بەشێكی زۆری ڕێگاكانی سنوورەکە دەستیان كردووە بە پاككردنەوەی رێگاكان، كاری ڕاماڵینی بەفریش بەپێی بەرنامەیەكی دارێژراو، بە چوار قۆناغ ئەنجام دەدرێت:

 قۆناغی یەكەم: ڕاماڵینی بەفر لە ڕێگا سەرەكییەكان و دەوروبەر و هێڵە سەرەكییەكانی سەنتەری هەرچوار قەزاکانی (سۆران، مێرگەسۆر، چۆمان و ڕواندز) و ڕێگای سەرەكیی هامڵتۆن دەبێت.

قۆناغی دووەم: ڕاماڵینی بەفر لە ڕێگای سەرەكیی نێوان قەزاكانی ئیدارەی سەربەخۆی سۆران دەبێت.

 قۆناغی سێیەم: ڕاماڵینی بەفر لە ڕێگای نێوان قەزا و ناحیەكان و ڕێگا لاوەكییەكان دەبێت.

 قۆناغی چوارەم: ڕاماڵینی بەفر لە ڕێگای گوندەكان دەست پێ دەكات.

بەڕێوەبەری چاککردنەوە و پاراستنی رێگاوبانی سۆران ئاشکرایشی دەکات: “بەهۆی بەردەوامی و چڕیی بەفربارین و كەمیی ئامێرەكانی تایبەت بە پاككردنەوەی رێگاوبانەكانەوە، ئەگەری هەیە قۆناغەکانی راماڵینی بەفر و پاككردنەوەی رێگاكان بکەونە ڕۆژانی داهاتوو، بۆیە داوا لە شۆفێران دەكەین، هاوكاری تیمەكانمان بن، بۆ ئەوەی بتوانین بە زووترین كات و بەپێی ئەو بەرنامەی دامان ناوە، رێگاوبانەكان پاك بكەینەوە”.