قوڕ بەسەر ئەو میللەتەی هیوای بەم جانەوەرانەیە!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 13/01/2022

قوڕ بەسەر ئەو میللەتەی هیوای بەم جانەوەرانەیە!

كورد دەڵی: ”یەك جار بە زستان دەگوترێ ساردە“، كەچی هەر لەگەڵ بارانێك دەبارێ و سێڵاوێك لە گەڕەكێكی هەولێر هەڵدەستێ، كۆمەڵێ پەرلەمانتێر و چالاكوان و كەمپینچیی دەمدرێژی بێهەڵوێست، لە زۆنی سەوزەوە هاواریان لێهەڵدەستێ و دادەبەزنە سەر ”دەسەڵات! بە قەولی خۆیان“، هەمووشیان بە یەك ئاواز دە...ڕن! وەك ئەوەی تا ئێستا ئەمانە هیچیان لە كاسەی (دەسەڵاتی گەندەڵ!) نەخواردبێت، هیچیان بەشدار نەبووبن لە گەندەڵیدا! هیچیان دینارێكیان لە حكوومەت وەرنەگرتبێت و پرۆژە و مشەخۆریی لابەلایان نەبووبێت.

تۆ لەوە گەڕێ كە ئەو جەماعەتەی هەموو لافاوێك قسە دەكەن، پیاویان تیا نیە یەك هەڵوێستی عەمەلیی هاوسۆز و هاوخەمانەی هەبووبێت بەرامبەر یەك ماڵ یان یەك خێزان لەوانەی لە ئەنجامی لافاوەكاندا زیانیان پێدەگات، لەوەش گەڕی كە ئەوی لەو بەرەیەوە قسەی زل دەكات، ئامادە نیە بە یەك دووسەد و پەنجا دیناریی (بریمەر!) كۆمەكی هیچ قوربانیەكی ئەو رووداوانە بكات، لەوەش گەڕێ كە ئەوان بەردەوام لە ڤیلا سیاحیەكانیانەوە لە مێرگەپان حەپەیان دێ و بۆشیان چووەتە سەر، چونكە بەداخەوە خەڵكێكی زۆر هەن لە كوردستان، حەز بە بیستنی درۆ و موزایەدە و كەشوفش دەكەن. بەڵام خۆزگە ئەم هاتوهاوار و دەنگهەڵبڕینەی ئەو بەعزە پەرلەمانتێر و چالاكوان و كەمپینچییە دەمدرێژ و بێهەڵوێستانەی زۆنی سەوز، جارێ لە جاران، هەڵوێست نواندنێكی نیشتمانپەروەرانە و نەتەوەییانە بوایە.

تا ئێستا زیاتر لە پێنج جار هەر ئەم شاری هەولێری حازرییە كە پایتەختی كوردسستانە، زۆر بە ناحەق، كەوتووەتە بەر هێرشی مووشەكباران و درۆن بارانەوە، بێ شك هەمووش دەزانن ئەو مووشەك و درۆنانە لە كوێوە ئاراستەی هەولێری پایتەخت دەكرێن و پەیامی كێیە و بۆچی تەنیا لە هەولێری دەگرن! بەڵام ئەم بەعزە پەرلەمانتێر و چالاكوان و كەمپینچییە دەمدرێژ و بێهەڵوێستانەی زۆنی سەوز كە گوایە (دڵیان بە قوربانیانی لافاوەكانی هەولێر دەسووتێت!) تا ئێستا یەك جاریش فززە و نققەیان لەئاست ئەو رووداوانەدا لێوە نەهاتووە، تەنانەت بە یەك وشە یان پۆستێكی فەیسبووكیش، سەركۆنەی مووشەكباران و درۆنبارانی هەولێریان نەكردووە، كەچی بۆ باران بارین، قوڕ دەپێون!

شتێكی تریشم بیر كەوتەوە، ماوەیەك لەمەوبەر چوار پێنج كەس لە سنووری پارێزگای دهۆك، پاش ئەوەی كەیسەكانیان بە پرۆسەیەكی دادگاییدا تێپەڕی، حوكمی زینداییان بۆ دەرچوو، هەر ئەو بەعزە پەرلەمانتێر و چالاكوان و كەمپینچییە دەمدرێژ و بێهەڵوێستانەی زۆنی سەوز، كەیسەكەیان ناو نا (گیراوانی بادینان!) و تا ئێستاش رۆژانە قسەی لەسەر دەكەن گوایە دژ بە ئازادیی رادەربڕین هەڵوێستیان هەیە!

بەڵام لە رۆژهەڵاتی كوردستان، كچە كوردێكی گەنج و جوان و وێرەك و قارەمان بە ناوی (زارا محەمەدی)یەوە، تەنیا بە تۆمەتی (وانە گوتنەوەی زمانی كوردی بە منداڵانی كوردی رۆژهەڵات) لەلایەن دادگایەكی كۆماری ئیسلامیی ئێرانەوە، پێنج ساڵ حوكم دەدرێ و زارای ئازاش بە پێی خۆی دەچێت بۆ زیندان و كەیسەكەی دەبێتە كەیسی رای گشتی و هەموان قسەی لەسەر دەكەن و سەركۆنەی ئەو بڕیارە ستەمكارانەیەی دادگا دەكەن، كەچی پەرلەمانتێر و چالاكوان و كەمپینچییە دەمدرێژ و بێهەڵوێستەكانی زۆنی سەوز، كە سەری زمان و بنی زمانیان (گیراوانی بادینانە) بە یەك وشە، هەڵوێستێك دەرنابڕن دژی سزادانی كچە كوردێكی سەربەرزی وەكوو زارا محەمەدی و زیندانیكردنی بە پێنج ساڵ لەسەر زمانی كوردی.

زارا محەمەدی، بەرلەوەی بچێتە زیندان، لەنێو ئاپۆڕای دڵسۆزانی رۆژهەڵاتی كوردستاندا، دێڕێك لە شیعرە باڵا و جوانەكەی قانعی شاعیری خوێندەوە و گوتی: ”قوڕ بەسەر ئەو دوژمنەی هیوای بە بەندیخانەیە“، منیش لێرەدا لەگەڵ رێزی زۆرم بۆ قانعی مەزن و بۆ زارای خوشكی خۆشەویستی هەموومان، دەستكارییەكی ئەو دێڕە شیعرە دەكەم و دەڵێم: ”قوڕ بەسەر ئەو میللەتەی، هیوای بەم پەرلەمانتێر و چالاكوان و كەمپینچییانەیە!“.