لەبارەی خەرجکردنی پارەی کارمەندانی ڕۆژی هەڵبژاردن ڕوونکردنەوە دەدرێ
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لەبارەی خەرجکردنی پارەی کارمەندانی ڕۆژی هەڵبژاردن ڕوونکردنەوە دەدرێ

بەرپرسێکی كۆمیسیۆنی هەڵبژاردنەكانی عێراق ئاشکرای کرد، کۆمسیۆن خەریکی وردبینیی ناوی ئەو کەسانەیە کە ڕۆژی هەڵبژاردن کارمەندی کۆمسیۆن بوون.

ئامانج عەزیز، بەڕێوەبەری ئۆفیسی هەڵبژاردنەكانی سلێمانی، بە (باسنیوز)ی ڕاگەیاند: "زانیاری و ناوی ئەو مامۆستا و فەرمانبەر و دەرچووانەی زانكۆ و پەیمانگاكان كە لە ڕۆژی هەڵبژاردنی پەرلەمانی عێراقدا (10/10/2021) وەك كارمەندی كۆمسیۆن لە هەموو پارێزگاکانی هەرێمی کوردستان بەشدارییان كرد بە لیست دراوەتەوە کۆمسیۆن و ئیدارە و دارایی کۆمسیۆن خەریکی وردبینی و ڕێکخستنی ناوەکانن".

لەبارەی ئەو زانیارییەی کە بڵاو کراوەتەوە و گوایە کۆمسیۆنی هەڵبژاردنەکان دوای سێ مانگ لە ڕۆژی 10/1/2022 پاداشتی کارمەندانی ڕۆژی دەنگدان دابەش دەکات، ئامانج عەزیز گوتی: "بەفەرمی هیچ شتێکمان لە کۆمسیۆن بۆ نەهاتووە، چونکە لە عێراق زیاتر لە 300 هەزار کارمەندی کۆمسیۆن بۆ ڕۆژی دەنگدان هەبوو کە فەرمانبەری دەوڵەت و کەسانی دانەمەزراویشی تێدایه، بۆیه پڕۆسەی وردبینی لە کۆمسیۆن کاتی پێویستە و ئێمە چاوەڕوانی کۆمسیۆن دەکەین، بڕیاری خەرجکردن بدات''

ئەو كارمەندانەی بۆ ڕۆژی هەڵبژاردن لەگەڵ كۆمیسیۆن كاریان كرد، بەشێكیان ئەوانە بوون كە فەرمانبەری حكوومەتن و بەشێكیشیان ئەوانە بوون كە كارمەندی حكومەت نین و لە هیچ شوێنێك دانەمەزراون.

بەرپرسەکەی كۆمیسیۆنی باڵای سەربەخۆی هەڵبژاردنەكانی عێراق گوتیشی: "ئەو كارمەندانەی كە فەرمانبەری حكوومەت نەبوون، 250 هەزار دینار وەردەگرن و ئەوانەشی كە فەرمانبەری حكوومەت بوون بڕی 150 هەزار دینار وەردەگرن، لەگەڵ پێدانی ڕێز و سوپاسێك لەلایەن حكوومەتی عیراقەوە".