شاری دێرین و دیرۆكی كورد و كوردستانیان
لانكه‌ی مه‌ردایه‌تیی خەڵكی نیشتمان
سه‌یوانی فراوانی پێكهاتە جیاوازەكان
شاده‌ماری جەستەی گه‌رمیان
پایتەختی شارستانیەتەكان
كه‌ركووكی دڵی كوردستان

زه‌مه‌نێكه‌ له‌ دووره‌وه‌
هه‌ناسه سارد و كاڵه‌كانم
هەناسەكانی لە تۆ دابڕانم
له ‌سینه‌دا هه‌ڵگرتووه‌
رۆحم بەردەوام پێكی ئازار دەنۆشێ
هه‌ر یێژم ئه‌مڕۆ نا سبه‌ی
رۆژێك دێت و شادی سه‌راپای شارەكەم داده‌پۆشێ
لێ هەر ساڵە و تێدەپەڕێ و
شاری ئەسیری ئەسیرە و جلوبەرگی خەم دەپۆشێ

چه‌رخەله‌ی شازدەی ئۆكتۆبه‌ر، خه‌ونه‌كانی لەبار بردیت
ئه‌وانه‌ی كە تۆیان فرۆشت
گیرفانی خۆیان پڕ كرد و ئیدی لە حاڵیان نەپرسیت
ئەی شارەكەم من نازانم، تۆ پێم بڵێ:
ئەوانە ئێستاكێ لە كوێن!
ئەم پرسیاره‌ وەكوو زۆربەی پرسیارەكان
هەمیشە بە زینمدا دێن
بەڕاست بۆ تەنیا كڕیارەكان دیارن
ئەرێ فرۆشیارەكان لە كوێن؟

كەركووكەكەم، خاكە زەوتكراوەكەم
ئەوە كێ بوو سەردەمی زێڕین و ئازادیتی له‌گۆڕ نا؟
كێ بوو، پارەی خیانەتی لە گیرفان نا؟
كێ بوو دەستی دوژمنانی گرت و لە بینەقاقای تۆ نا؟

زه‌مه‌نێكه‌ چاوەڕوانم و بە چاوی پڕ هیوامەوە
سات له‌ دوای سات
له‌ ده‌روازەكانتەوە، چاو لە ئاسۆی روون دەڕوانم
هه‌میشه‌ چاوم لە ڕێیە و چاوەڕوانم
ناسرەوم لە ناخەوە هاوار دەكەم،
ده‌مه‌وێ ناڵە و ئاهو نزووله‌م به‌ هەر هەموو دنیا بگات
به‌ هه‌موو چیاكانی كوردستان
به‌ ده‌شت و بان و دۆڵ و چەم و رووبارەكان
به‌ گوند و شار و شارۆچكەكانی هه‌موو پارچه‌كانی نیشتمان
به‌ مزگه‌وت و بە كەنیسە و پەرستگە و ئاتەشگەكان
بە جەمخانە و تەكێ و خانەقاكان
بە كڵێسای پرۆستانت و كاسۆلیك و گشت مەزهەبەكان
دەمەوێ لە هەموویان بپرسم:
ئەرێ به‌س نیە ستەم و كوشتوبڕ و داگیركردنی خاكی كوردان؟

دەخوازم به‌م گه‌رووە نووساوەمەوە‌
ڕوو بكه‌مه‌ په‌یكه‌ری پێشمه‌رگه‌ و
سروودی ئەی رەقیبی بۆ بڵێمەوە
دەمەوێ لێی بپرسم:
كه‌ی بەنیازی ئاڵای داگیركەر فڕێ بدەیت و
وەكوو جاران، به‌یداخەكەی قازی و بارزانی بەرز بكەیتەوە
كه‌ی كوڕان و كچانی ره‌حیماوە و ئیمام قاسم و ته‌په‌ و شۆریجه‌
بەدیار باڵاتەوە، جارێكی تر گۆرانیی ئازادی بڵێنەوە

هۆ كەركووكی مێژووی كوردستان
شاری باوەگوڕگوڕ و ئاگری هەمیشەیی
هەزاران ساڵە تۆ داگیر دەكرێی
هەزاران ساڵە تۆ گڕ تێبەردەدرێی
هەزاران ساڵە تۆ كپ و بێدەنگ دەكرێی
بەڵام تۆ هەر سەرت بەرزە
هەر بە زیندوویی ماویەوە
دەنگت هەمیشە زوڵاڵە
هەمیشە هەر كوردستانییت
دایم دڵی نیشتمانیت

لەبیرم دێ، كە منداڵ بووم
ئەو شەوانەی سەری ساڵان و كریسمس
منیش دەمویست لەگەڵتا بم
بۆ بەخێرهاتنی ساڵی نوێ
ئەو دەمانەم باش لەبیر دێ
شەوە جوانەكانی كریستیانانی كەركووك
ئەو سەردەمە منی منداڵی موسڵمان
دەمویست لەگەڵ هاوڕێ كریستیانەكانم
بچمە رێوڕەسمی كەنیسەكان
دەمویست گوێم لە ئاوازەكانی نوێژیان بێ
دەمویست سرووتەكانی ئەوان ببینم
دەمویست گوێم لە زەنگی كەنیسە بێ

ئای مەخابن، ئێستا زەنگی كەنیسەكانیش خەفەیە
خانمانی پاكیزە و كاهینەكان دەنگیان نایە
ئێستا هەموویان رەشپۆشن
ئێستا لەبری شەربەتی شەوی كریسمس
تاڵاوی ئازار دەنۆشن
ئەرێ بەڕاست بێدەنگی هێمای رازیبوونە؟
ره‌شپۆشی هێمای خەمباربوونە؟
ئەم دۆخە چەقبەستووەی شارم
هێمای ملكەچی و تەسلیمبوونە؟
ئەم رۆژگارە
ئیدی مانای خۆر ئاوابوونە؟

من لێرەوە، جار بە جارێ گوێ هەڵدەخەم
گوێم لێیە، پۆستاڵ لەپێیەكی داگیركەر و پەڕۆ لەسەر
بە زمانی عەرەبی،
لە رادیۆیەكی قرخنی كۆنی شڕەوە
بۆ منداڵان و گەنجانی كەركووك، هاوار دەكات:
ئاوڕ بۆ مێژوو مەدەنەوە
ئەم شارەتان هەرگیز هەرگیز نادەینەوە
دەمانەوێ ئێوە گەشە نەكەن و بیر نەكەنەوە
دەمانەوێ بە مادەی هۆشبەر واتان لێ بكەین
خەیاڵی خۆتان بەرەو ئازادبوون نەبەنەوە
ئاخر ئێمە، ئەم شارەتان هەرگیز هەرگیز نادەینەوە
خاك و خۆڵ و نەوت و ئاوی
رادەستی ئێوە ناكەینەوە، ئەم شارەتان نادەینەوە
ئازادیی ئێوه‌ شنەبایەك بوو
ئیدی چووە مێژووەوە و بووە رابردوو
ئێستاكە ئێوە بێگەنان و ئێمە خاوەن ماڵین
ئێستاكێ ئێوە ژێردەستن و ئێمە زاڵین

لەپڕ، لەنێو ئەو ژاوەژاو و هاتوهاوارە عەرەبیەدا
گوێم لێ دەبێ،
كۆمەڵێ كچ و كوڕ و منداڵی كەركووك
بە زمانی شیرینی كوردی
لە باخچەكەی دەوری پەیكەری پێشمەرگەوە
هاوار دەكەن:
هۆ داگیركەرانی شارەكەمان
هۆ زەوتكەرانی مێژوومان
هۆ لەناوبەرانی ئێستامان
هۆ دزەكانی بن ئەرز و سەر زەویمان
قەت ناهێڵین بێخەم بنوون
تەسلیم نابین بە رادەستبوون
بەردەوام نابێ خۆر ئاوابوون
ئێمە خانەخوێی ئەم شارەین
بەڵام ئێوە هەرگیز (میوان) نەبوون
ئێمە دەم و لووت بۆ ئەو مادە هۆشبەرانە نابەین
كە بە خەیاڵی خاوتان ئازادیمان لەبیر دەباتەوە
ئێمە لەو قوتابخانانەدا ناخوێنین
كە پێتان وایە، زمانی كوردیمان لەبیر دەباتەوە
ئێمە رێز لەو ئاڵایە ناگرین
كە بە زەبری داگیركاری بە ئاسمانی شارەكەماندا دەشەكێتەوە
”كەركووك یەك كوردیشی تیا نەمێنێ، هەر كوردستانە“
هەموو تابلۆ كوردیەكانیش بكەنە عەرەبی
ئەم شارە هەر شاری ئێمەیە و زمانی دایك، زمانمانە
سەد هێندەی تر، ژەهری فیتنەگەری بڕێژن
كورد هەر گەلێكی میهرەبانە و كەركووكیش شاری پێكەوەژیانە
ئەگەر سروودی ئەی رەقیبیش قەدەغە بێت
ئەگەر سەری ساڵیش هیچ كەس گوێی لە زەنگی كەنیسە نەبێت
ئەگەر ئاگری جەژنی نەورۆزیش خەفە بكرێت
ئەگەر ئاڵای رەنگینی كوردستانیش لەم شارەدا هەڵنەدرێت
دڵنیا بن، هیچ كورد و كوردستانیەك لەم شارە بێهیوا نابێت
چونكە سروشتی كەركووكم هەمیشە هەر وەها بووە
بۆ هیچ هێزێك مل كەچ ناكا و هەرگیز هەرگیز تەسلیم نابێت
با خائینان دەستیان لە دەستی ئێوەدا بێت
بەڵام جگە لە (كوردستانیبوون)
هیچ پێناسەیەكی بێگانە، بۆ ئەم شارە جوانە نابێت

دڵنیا بن، ئەگەر ئەمساڵیش تێپەڕێت
ئەم دۆخە هەر وا ناگوزەرێت،
رۆژێك دادێ
ئیدی بانگی ئازادی دێ
دێ و لە دەرگای هەموو ماڵە كەرگووكیەكان دەدا
دێ و خۆی بە هەموو كووچە و كۆڵان و بازاڕەكاندا دەكا
دێ و بە دەستی پیرۆزی خۆی
برین و زامەكانی ئەم شارە تیمار دەكا
دێ و بانگەشەی مەرگی داگیركاری و تەعریب
بە گوێی كورد و توركمان و كریستیانەكاندا دەدا
دێ و ئاڵایەكی كوردستان
دەخاتە دەستی پەیكەری پێشمەرگەوە و
ئاڵای داگیركەر تووڕ هەڵدەدا
دێ و بە سروودی پێشمەرگە، خاكی شارەكەم ئاو دەدا
دێ و خۆی دەكا بە كەنیسەیەكدا
لە شەوی سەری ساڵی نوێدا، زەنگی ئازادی لێدەدا
دێ و خۆی دەكا بە مەزگەوتێكدا
یەكەم بانگی ئازادی دەدا
دێ و رۆحی هەموو كەركووكیەكان گوڵاوپرژێن دەكا
دێ و دەچێتە سەر قەڵات و
پڕ بە گەروو بانگمان دەكا و فێری ئەم دێڕەمان دەكا:
”كەركووكیەكان، قەت لەدەستی مەدەن هیوا“