گەندەڵێكی چاكسازیخواز و ئاییندارێكی خوانەناس!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
هەرمن ئەحمەد 18/12/2021

گەندەڵێكی چاكسازیخواز و ئاییندارێكی خوانەناس!

كێشەی ئەمڕۆی گۆڕەپانی سیاسی و ئابووری و ئیداری و میدیایی و فەرهەنگیی هەرێمی كوردستان لەوەدایە، زۆربەی ئەوانەی باسی بوونی گەندەڵی دەكەن خۆیان گەندەڵی گەورەن، زۆربەی ئەوانەی باسی گرنگیی بوونی ریفۆرم و چاكسازی دەكەن لە یەكێك لە بوارەكان یان زیاتردا، خۆیان پاشكەوتووخواز و گەندەڵ و لەمپەری گەورەن لەبەردەم چاكسازییدا، زۆبەی ئەوانەی بە بانگەشە دژایەتیی حوكمی تاكڕەوی و دیكتاتۆری دەكەن، خۆیان لەنێو گرووپ و حزب و رێكخراوەكانی خۆیاندا، گەورەترین دیكتاتۆر و تاكڕەون، زۆربەی ئەوانەی باسی سەربەخۆیی و بێلایەنیی میدیا دەكەن، خۆیان ئالەتی ئیرهابی فیكریین و لە هەموو لایەك پارە وەردەگرن، زۆربەی ئەوانەی لە كارەساتە سروشتی و مرۆییەكاندا فرمێسكی تیمساحی بۆ خەڵكی لێقەوماو دەڕێژن، خۆیان ئامادە نین بە یەك دۆلار یان یەك بەتانی، هاوكاریی ماڵێكی لێقەوماو بكەن، زۆربەی ئەوانەی بانگەشە بۆ بەرگری لە ئایین و خودای گەورە و پەیامە پیرۆزەكانی دەكەن، خۆیان خوانەناسترین كەسن لە رەفتارەكانیاندا.

ساڵانێكە لە هەرێمی كوردستان، لە میدیای فەرمی و سۆشیال میدیاشدا، بەردەوام لە زار و لە گوتار و دروشمی ئەم و ئەوەوە، گوێمان لە وشەی ”گەندەڵی“ دەبێ، هەر لەپەنا ناوهێنانی ”گەندەڵی“یشدا، دەبیستین و دەبینین كە داوای ”ریفۆرم و چاكسازی و بەگژداچوونەوەی گەندەڵی“ دەكرێت، بەڵام كاتێ كابینەی نۆیەمی حكوومەتی هەرێم دێت و بە جدی بڕیاری چاكسازی و رووبەڕووبوونەوەی گەندەڵی دەدات، پۆپۆلیستەكان و دەمگەرمەكانی میدیا و (قارەمانانی دژەگەندەڵی!)، لە سەد لاوە پەلاماری حكوومەت دەدەن، تا زۆرترین لەمپەر لەبەردەم چاكسازییدا دروست بكەن، بێ شك حكوومەت لەسەروو رەخنەوە نیە، بۆیە من مەبەستم هەموو ئەوانە نیە كە رەخنەی لێدەگرن، من باسی پۆپۆلیست و موزایەدەچیەكان دەكەم و لای خەڵك ناسراون و خۆشیان خۆیان باش دەناسن.

دەزانین بەگژاچوونەوەی گەندەڵییەكی فراوان كە تەمەنی زیاتر لە چارەكە سەدەیەك بێت لە هەرێمێكدا و زۆربەی هەرە زۆری سێكتەرە كاریگەرەكانی ژیانی گرتبێتەوە، كات و بەرنامە و پلان و ستراتیج و یاسای دەوێ و بە ساڵ و دوو ساڵ بنبڕ ناكرێت، بەڵام كاتێ سەرۆك وەزیرانێكی وەك مەسرور بارزانی، دێت و بە رژدی پێداگری لەسەر پرۆسەی چاكسازی دەكات و هەنگاوی عەمەلیی بۆ دەنێت و بڕیاری گونجاوی لێ دەدات، ئەو فس فس پاڵەوانانەی هەمیشە لە میدیاكانەوە بانگەشەی چاكسازییان دەكرد و دەنگی خەڵكی بەشمەینەتیان بۆ خۆیان پێ كۆ دەكردەوە، ئەوانە لاقی حكوومەت دەگرن و گومانی ئەوە لای خەڵك دروست دەكەن گوایە چاكسازی ناكرێت و بانگەشەی چاكسازی بێ بنەمایە!

بەداخەوە تەنگژە و قەیرانەكان و گۆڕانكارییە خێراكان لە تەكنۆلۆژیادا، میدیای نامەسئوول و سۆشیال میدیای ئازادی بێ سنوور، هەروەها ئاستی نزمی هۆشیاری لای زۆرینە، جێ و رێی بۆ موزایەدەچی و پۆپۆلیست و درۆزن و دەستبڕەكانی سیاسەت خۆش كردووه‌ تا دەنگیان زاڵ بێت و پەیامە پڕ درۆ و موزایەدەكانیان بە زۆرترین خەڵكی عەوام و سەواد بگەیەنن، ئەوانە رێزیان بۆ هیچ شتێكی پیرۆزی كوردستان نەهێشتووەتەوە، ئەوانە فەزایەكیان بۆ خۆشەویستی لەنێو نەوەكانی كوردستاندا نەهیشتووە، ئەوانە دەیانەوێ رەشبینی لە ناخی مرۆڤی كورددا بچێنن، ئەوانە هەوڵی كۆكردنەوەی كورسی و سامان بۆ خۆیان دەدەن و خەڵكێكیش پێیوایە خەمخۆری خەڵكن، ئەوانە لە تەنگژەكاندا هیچیان ئامادە نین بچووكترین بەرپرسیاری لەئەستۆ بگرن، ئەمەشمان لە هەموو كێشە و قەیرانێكدا لێ بینیون.

به‌رپرسێكی باڵای حزبێكی ناسراوی كوردستان دەناسم، هەمیشە له‌ واڵه‌كه‌ی خۆی له‌ فه‌یسبووك، وته‌ی ”جوان و باق و بریق!“ ده‌نووسێ، هه‌موو نووسینێكیشی به ”نابێت یان ده‌بێت“ ده‌ست پێده‌كات! بەڵام ئەگەر بچین بۆ تاپۆی سلێمانی و پرسیار بكه‌ین، دەبینین لایه‌كی سلێمانیی له‌سه‌ر ناوی خۆی و كەسە نزیكەكانی تۆمار كردووه، ئیتر باسی گەندەڵیی چیم بۆ دەكەیت عەزیزم؟ من بەشبەحاڵی خۆم، ئەو قسە زلانەی ئەو كەسانە، بە بڵقی ئاو دەزانم، زۆریشم پەلە نیە، چونكە ئایندە و مێژوو دەیسەلمێنن كە كێ بەجدی چاكسازیی كرد و دژی گەندەڵی هەنگاوی هاویشت و كاری باشی بۆ كوردستان كرد.