كێ رقی لە ئاڵای كوردستانە؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 18/12/2021

كێ رقی لە ئاڵای كوردستانە؟

كێ رقی لە ئاڵای كوردستانە و بە بینینی وەكوو گای ئیسپانیی دەهری دەبێ؟ كێ جنێو بە كوردستان وەك خاك و زێد و نیشتمان، دەدات؟ كێ دامودەزگای دەوڵەت و خزمەتگوزاریی گشتی دەسووتێنێ یان لە بەرژەوەندییەتی ئەو شوێنانە بسووتێنرێن؟

وەڵام: داگیركەرانی كوردستان بە دارودەستە و پیاو و سیخووڕ و بەچەكانیانەوە، خائینان و خاكفرۆشان و میلەەتفرۆشان و ئۆكتۆبەریەكان، سەركردەكانی پەكەكە و لایەنگر و هەوادارەكانی ئەو سەركردانە، كە ئەمەیان لەنێو كۆبوونەوەكانی كوردانی ئەورووپا و لە رۆژئاوای كوردستان و لە هەرێمی كوردستانیش بە كردار سەلماندووە، ئیسلامییە توندڕەوە فكر داعشییەكان، كۆنە بەعسیەكان و نەوەكانیان ئەگەر لەسەر عەقڵی باوانیان مابن، هەندێ لەو حزبە (كوردستانیانەی!) كە هیچ سەروەری و مێژوویەكیان نیە شانازیی پێوە بكەن و هەرگیز نە سەركردەكانیان و نە هیچ ئەندامێكیان شەرەفی ئەوەیان پێ نەبڕاوە، نەك هەر دڵۆپێك خوێن بەڵكوو دڵۆپێك عارەقە بۆ خاكی كوردستان بڕێژن. دوایین گرووپیش بەشێك لەوانەن (ناڵێم هەموویان) كە لە پرۆسەی چاكسازییدا دەرگا یان پەنجەرەیەكی بچووكی گەندەڵییان بە روودا داخراوە.

ئەمانە ئەو گرووپانەن كە دەستیان تێی دەچێت ئاڵای كوردستان بسووتێنن، یاخود بە جۆرێك لە جۆرەكان سووكایەتیی پێ بكەن، یان جنێو بە داروبەرد و خاكی كوردستان بدەن یان بە شێوەیەك لە شێوەكان رقیان لە كوردستان بێت یاخود داگیركەران و خوێنڕێژان و ئەو دیكتاتۆرانەی كورد و كوردستانیان لەناو دەبەن، بە فریشتە بناسێنن! ئیتر تۆ ئەگەر كورد بیت و سووكایەتی بە ئاڵای كوردستان بكەیت و جنێو بە كوردستان وەك نیشتمان، بدەیت، دامودەزگای خزمەتگوزاریی گشتیی وڵاتەكەت ئاگر تێ بەربدەیت، لە هەر بارودۆخێكدا بیت، تووڕە بیت یان ئارام، هەژار بیت یان دەوڵەمەند، كۆچبەر بیت یان لە كوردستان بژیت، كاسبكار بیت یان فەرمانبەر، قوتابی بیت یان نەخوێندەوار، حزبی بیت یان سەربەخۆ، لە دەسەڵاتدا بیت یان ئۆپۆزسیۆن، دیندار بیت یان بێ دین، ئاو دەكەیتە ئاشی ئەو گرووپانەوە و دەبیتە یەكێك لەوان.

(سەرۆكی وڵاتەكان، حزبی دەسەڵاتدار، حزبی حوكمڕان، كابینەی حكوومەت، سەرۆكی حكوومەت و ستافی وەزیرانی هەر كابینەیەك، دەستەی سەرۆكایەتی و ئەندامانی پەرلەمان وەك كەسەكان نەك وەك دەزگا، سیاسەتمەداران، وەزیر و بەرپرسە باڵا و مامناوەند و بچووكەكان و حزبە ئۆپۆزسیۆنەكان و سەرۆكەكانیان، رێكخراوە نێوخۆیی و نێودەڵەتیەكان...هتد)، ئەمانە هەموویان بە بەردەوامی دێن و دەڕۆن، هیچیان پیرۆز نین و هیچیشیان بەدەر نین لە هەڵە و كەموكوڕی و هیچیشیان لە دەرەوەی پرۆسەی رەخنە لێگرتن نین، بەڵام بۆ خەڵكی كوردستان (كوردستانی دایك، نیشتمان و زێدی كوردستانیان، خاك و ئاڵای كوردستان)، ئەمانە دەمێننەوە، ئەمانە بۆ مرۆڤی كورد و كوردستانی لە پیرۆزییەكانن و هێڵی سوورن، لانی كەم لای زۆرینەی هەرە زۆری خەڵكی هەموو كوردستانی گەورە، ئەمانە موقەدەسن.

بۆیە كاتێ تۆ ئەگەر كورد یان كوردستانی بیت و لەژێر هەر ناو و ناونیشانێكدا و لەنێو هەر رووداوێكدا، سووكایەتی بەم پیرۆزییانە بكەیت، تۆ سەرەتا سووكایەتی بە خۆت، ئنجا بە رابردوو و ئێستا و داهاتووی وڵاتەكەت و نەتەوەكەت، ئنجا بە پیرۆزییەكانی گەورەترین نەتەوەی بێدەوڵەت و ستەملێكراوی دونیا دەكەیت، تۆ سووكایەتی بە دایك و باوكت دەكەیت، سووكایەتی بەو شەهیدانە دەكەیت كە لەپێناو بەرگریكردن لە بوونی تۆ نەتەوەكەت گیانیان بەخشیوە، سووكایەتی بەو ملیۆنان كورد و كوردستانیە دەكەیت كە ئەمانەی گوتم بە سیمبول و پیرۆز دەزانن، بۆیە نابێ ئەو مافەت پێ بدرێت، دەبێ یاسایەكی توند هەبێت رێگرییت لێ بكات.

تێبینی: ئەم وتارە دەبوایە ڕۆژی هەینی ١٧ی ١٢ی ٢٠٢١ كە ساڵڕۆژی ئاڵایە بڵاو بكرێتەوە، بەڵام وەك رێزێك بۆ قوربانییانی لافاوەكەی هەولێر، بڵاوكردنەوەی بۆ ئەمڕۆ دواخرا.