میدیاكاران و پەخشی راستەوخۆی پرسەی شەهیدان
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 09/12/2021

میدیاكاران و پەخشی راستەوخۆی پرسەی شەهیدان

كێشەی گەورەی رۆژنامەوانانی كورد و میدیای كوردی لە هەرێمی كوردستان بەگشتی ئەوەیە، كە هێندەی بەدوای وروژاندن و ختووكەدان و دنەدانی هەستەكانی خوێنەر و بینەر و گوێگرەوەن، نیو هێندە لە خەمی كارە راستەقینەكەی خۆیاندا نین كە بڵاوكردنەوەی هەواڵ و زانیارییە. كێشەی سەرەكیی وەرگر و خوێنەر و بینەری كورد و كوردستانیش ئەوەیە، میدیا و سۆشیال میدیای وەك سەرچاوەیەك بۆ (رۆشنبیربوون!) وەرگرتووە نەك وەك سەرچاوەیەك بۆ (زانیاری و هەواڵ)، جا وای لە حاڵی ئەو گەلەی رووی لە شاشەكان و پشتی لە كتێب و سەرچاوەكانی مەعریفە بێت، وای لەو چارەنووسە رەشەی میللەتێك كە تاكە سەرچاوەی رۆشنبیریی، میدیا و سۆشیال میدیا بێت و كتێبخانە و كتێبفرۆشەكانی هەمیشە چۆڵەوانی بن.

نووسەرێكی گەورە دەڵێ: ”ئەو گەلانەی هۆشیاریی تەواویان نیە، رۆژێك لە رۆژان دەبنە مێگەلێك و ئیتر میدیایەكی بێویژدان بە كەیفی دڵی خۆی، لێیان دەخوڕێت“. هیچ عەیب و نەنگی نیە، ئەگەر خاوەن مەعریفە نەبیت، سەرچاوە بۆ پەیداكردنی مەعریفە و فێربوون و رۆشنبیربوون زۆرە و بە ملیۆنانە، بەڵام كێشەكە لەوێوە دەست پێدەكات كە ئەو بۆشاییە فكرییەی جەهل بۆی دروست كردوویت، بەو قسە نالۆژیكییەكانە پڕ بكەیتەوە كە رۆژانە و سات لەدوای سات، لە میدیا ئاراستەكراوەكانەوە یان لەنێو سۆشیال میدیای پڕ لە عەوامەوە، دەیبیستی و دەیبینیت.

مەخابن ساڵانێكە كۆمەڵگەی ئێمە تووشی نەخۆشییەكی سەیر بووە، ئەویش ئەوەیە كە مرۆڤی كورد لەم بەشەی كوردستان، تەواوی دۆخی دەروونیی خۆی و دەوروبەری، بەند كردووە بە میدیاوە، میدیا دەتوانێ تووڕەی بكات، میدیا دەتوانێ ئارامی بكاتەوە، میدیا دەتوانێ هەڵیپەڕێنێت، میدیا دەتوانێ ئەو شاییەی لێ بكات بە شین! میدیا دەتوانێ قەیران و تەنگژەی دەروونی و كۆمەڵایەتی و ئابووریی لا دروست بكات، میدیا دەتوانێ وای لێ بكات، وڵاتی خۆی بسووتێنێت و بە ئاوازی داگیركەران و دوژمنانی خاك و نەتەوەكەی بیبزوێنێت، ئای لەم دەردە چەند مەترسیدارە.

جارێكیان د.نەوال سەعداوی، خانمە نووسەر و بیرمەندی میسر و رۆژهەڵاتی ناوەڕاست، لە بەرنامەیەكی گفتوگۆئامێزدا میوانداری كرابوو، خانمی سەعداوی بە بوێری و بۆچوون و رەخنە توند و تایبەت و یەكلاكەرەوەكانی لەسەر (سێكسناسی و دەروون و كۆمەڵگەی ئیسلامی و رۆژهەڵاتی و دیدیان بۆ ئافرەت) بەناوبانگە.

خانمی پێشكەشكاری بەرنامەكە، لە گەرمەی قسەكردندا، ویستی گفتوگۆكە بە ئاقارێكی جیاوازدا بەرێت و لە نەوال سەعداویی پرسی: ”رەئی تۆ لەسەر رێوڕەسمی حەجكردنی موسڵمانان چیە؟“، نەوال سەعداوی زۆر بە تووڕەیی وەڵامی دایەوە و گوتی: ”من هاتوومەتە ئەم بەرنامەیە تا خزمەت بە بزاڤی رۆشنگەری لەنێو كۆمەڵگەی عەرەبیدا بكەم، ئامانجی ئەوەڵ و ئاخیرم رۆشنگەرییە، رەئی خۆمم لەسەر رێوڕەسمی حەجی موسڵمانان لە چەندین كتێب و بابەتدا نووسیوە و هەموان دەیزانن، بەڵام ئەگەر تۆ دەتەوێ بەرنامەكە بە ئاراستەی وروژاندندا بەریت و من بكەیتە كەرەستەیەك بۆ جۆشدان و دەنەدانی خەڵك، ئەوە زۆر سەهوویت، من یەك چركەی تریش لەم بەرنامەیەدا دانانیشم!“.

لەو پێشەكییەوە، دەمەوێ قسەیەك لەسەر هەڵەیەكی مەترسیدار و زەق و دیار و كارەساتهێن و ماڵوێرانكەری چەند رۆژی رابردووی میدیای كوردی بەگشتی بكەم. لە رۆژانی رابردوودا، چەكدارانی تیرۆریستیی داعش، لە چەند دەڤەرێكی جیاوازی بۆشایی ئەمنیی ناوچە كوردستانیە داگیركراوەكانەوە، هێرشی (كەڕ و فەڕ)یان كردە سەر گوندە كوردستانیەكان و بەشێك لە سەنگەرەكانی پێشمەرگە، بەداخەوە لە ئەنجامی ئەو هێرشانەدا، چەند پێشمەرگەیەكی دڵسۆز و گیان لەسەردەستی كوردستان و چەند هاووڵاتیەكیش شەهید بوون. تا ئێرە ئەركی میدیایە لە سەرچاوە فەرمیەكانەوە، (زانیارییە رێگەپێدراوەكان لەڕووی ئەمنی و سەربازییەوە) پەخش بكات.

من باسی هەڵەكانی میدیاكاران ناكەم كە لە رووی ئەمنی و سەربازییەوە، راپۆرت و هەواڵ و پەخشە راستەوخۆكانیان چەند زیانی لە هێزی پێشمەرگە داوە، چونكە ئەمەیان هەم زۆر باس كراوە و هەم منیش شارەزاییەكی كەمم هەیە تیایدا، بۆیە ئەوە جێ دەهێڵم بۆ بەرپرسانی باڵای سەربازی تا قسەی لێ بكەن و چیتریش رێگە نەدەن نە میدیا هەر وا بەئاسانی پەخشی راستەوخۆی هەبێت لە مەیدانی بەرەكان و گۆڕەپانی رووداوەكانەوە، نە برایانی ئازیزی پێشمەرگە، هەریەكە و بە مۆبایلی خۆی، پەخشی راستەوخۆی دیمەناكانی شەڕ بكات! ئاخر ئەمەی دەیبینین لەنێو هیچ هێزێكی سەربازیی دونیادا نیە، جگە لە كوردستانی خۆمان.

بەڵام سەرنج بدەن بزانن میدیای كوردی و میدیاكارانی، لەو رۆژەوە لەسەر چی كار دەكەن؟ وروژاندنی هەست، كۆكردنەوەی لایك و شەیر و كۆمێنت، موعاناتی پێشمەرگە، نەبوونی چەك و تفاقی پێویست، پەخشی راستەوخۆی پرسەی پێشمەرگەكان! گریانی بەكوڵ و ویژدانهەژێنی دایك و باوك و هاوسەر و خوشك و منداڵی ئەو پێشمەرگانەی شەهید بوون! تەنانەت ئەمڕۆ زۆربەی هەرە زۆری كەناڵ و كامێرا و پەیامنێری دەزگا میدیاییەكان، لەنێو نەخۆشخانەی لەدایكبووندا بوون و راستەوخۆ، چاودێریی لەدایكبوونی منداڵی پێشمەرگەیەكیان دەكرد، كە دوو رۆژ لەمەوبەر شەهید بووە و هاوسەرە بەڕێزەكەی دووگیانە و چاوەڕێی لەدایكبوونی منداڵەكەیەتی!

من نازانم كەناڵ و دەزگاكانی راگەیاندن، كەی واز لەو نەریتە خراپە دەهێنن كە راستەوخۆ خۆیان دەكەن بە پرسەی ژنانی شەهیدێك یان هەر كەسێكی كۆچكردوودا، بەڵام میدیاكارانی كوردستان سوێند دەدەم: توو ویژدانتان، ئەو خوشكە ئازیز و بەڕێزەمان، كە هاوسەری شەهیدێكی تازەیە و دووگیانە، ئایا دۆخە دەروونی و كۆمەڵایەتی و تەندروستییەكەی هیی ئەوەیە، راستەوخۆ بۆ ملیۆنان كەس بدوێت؟ ئەرێ لایك و شەیر و كۆمێنت ئەوە دەهێنێت، تۆ ئەم كارە نائینسانیە بكەیت؟ پرسیارێكی لەوانە گرنگتر: گریمان تۆ خۆت پێشمەرگەیەكیت و لە یەكێك لەو سەنگەرانەی رووبەڕووبوونەوەی لەگەڵ داعش، ئایا كاتێ دیمەنی ئەو هاوسەرەی شەهید یان منداڵەكانی دەبینیت، هەستت چۆن دەبێت؟ وەڵامی من مەدەنەوە خۆتان بیر لەو هەستە بكەنەوە. ئەگەر ئێوەش پێتان خراپە، تكایە با هەموومان واز لەم كارە خراپە بێنین.