ئەمڕۆ زانیم پەكەكە بە فەرمی بووە بە حەشدی شەعبی
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
جەمال عەبدوڵا 08/12/2021

ئەمڕۆ زانیم پەكەكە بە فەرمی بووە بە حەشدی شەعبی

پاشنیوەڕۆی سێشەممە 7-12-2021، فڕۆکە جەنگییەکانی تورکیا، ئۆتۆمبێلێکی پەکەکەیان لە ناوچەی خانەسۆر لە سنووری شنگال بۆردومان کرد، لە ئەنجامی ئەو بۆردومانەدا، سەرکردەیەکی یەکینەکانی پاراستنی شنگال (یەبەشە)ی سەر بە پەکەکە، بە ناوی مەڕوان بەدەل ناسراو بە (دژوار) کوژرا، دوای ئەو رووداوەكەش، شانەی راگەیاندنی ئەمنیی عێراق بەیاننامەیەکی دەرکردووە و تێیدا مەڕوان بەدەلی بە چەکدارێکی حەشدی شەعبی ناساندووە و سەرکۆنەی کوشتنەکەشی کردووە.

پەكەكە لە ساڵی 1978 دامەزراوە، لە مانگی 11ی ئەمساڵدا 43 ساڵ بەسەر دامەزراندنیدا تێپەڕی، ساڵانە و لە یادی دامەزراندنیاندا، پەكەكە بەتایبەتی سەركردەكانیان، خورشید و خاوەرێك بۆ پەكەكە دەھۆننەوە ھەر مەپرسە! ئەوان بە شێوەیەك مێژووی پەكەكە باس دەكەن كە ھیچ كەس پێش ساڵی 1978 و لە ھیچ بەشێكی كوردستاندا كورد نەبووە و بە قسەی ئەوان كوردایەتی لە ساڵی 1978وە دەستی پێكردووە كە پەكەكەی تیا دامەزراوە، چونكە ئەوان وای دەبینن كە ھەموو حزبە كوردی و كوردستانیەكانی ھەموو بەشەكانی كوردستان، یان نۆكەر و بەكرێگیراوی ئیمپریالیزمی جیھانی بوون! یان بەكرێگیراوی داگیركەرانی كوردستان بوون! یان نوێنەری دەرەبەگایەتی و بۆرژوازییان لە كوردستان كردووە!

كەچی دەرچوو مەڕوان بەدەل ناسراو بە (دژوار) كە یەكێك بوو لە بەرپرسانی پەكەكە لە شنگال حەشدی شەعبیە، ئەوەشی كە دەڵێت مەڕوان بەدەل چەكداری حەشدی شەعبیە، شانەی ڕاگەیاندنی ئەمنیی عێراقە كە لەخۆیەوە زانیاریی لەو جۆرە نادركێنێت، چونكە ئەو لایەنە ئەمنیەی عێراق زۆر باش دەزانێت كێ لە شنگال چیە! جا كە دژواری پەكەكە حەشدی شەعبی بێت كەواتە ناوی لەناو لیستی ناوەكانی حەشدی شەعبیدایە و بەفەرمی لەسەر میلاكی حەشدی شەعبیە، كەواتە مانگانە مووچەی لە حەشدی شەعبی وەرگرتووە، ئنجا ئەو بەرپرسارێتییشی ھەبووە، كەواتە ئەگەر بەرپرسی پەكەكە حەشدی شەعبی بێت، ئیتر بێ یەك و دوو ئەو چەكدارانەی تر كە دژوار بەرپرسیان بووە، ئەوانیش چەكداری حەشدی شەعبیین.

باشە ئەگەر پێشتر پەكەكە بە حزبەكانی تری كوردستانی دەگوت (نۆكەر و بەكرێگیراوی بێگانە و داگیركەرانی كوردستان!)، ئەی ئێستا ئێمەمانان دوای ئەو ڕاگەیاندراوەی شانەی ڕاگەیاندنی ئەمنیی عێراق كە دەڵێت مەڕوان بەدەلی پەكەكە، حەشدی شەعبی بووە، چی بە پەكەكە بڵێین و بە پەكەكە بڵێین نۆكەر و بەكرێگیراوی كێیە؟