سڵاو لە جاش و لە دزی جاران!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 05/12/2021

سڵاو لە جاش و لە دزی جاران!

سەردەمی رژێمی بەعس، عەرەبە بەعسییەكان بە جاشە كوردەكانیان دەگوت: (فرسان! یان فورسان)، جا وشەی (فرسان) لە زمانی عەرەبیدا كۆی (فارس)ە، فارسیش بە كوردی واتە (سوار یان سوارە) واتە سوارچاك یان ئەو كەسەی سوارەی ئەسپە، ئەمە هەمووی بۆ ئەوە بوو كە ناسناوی (جاش) لە كوردە چەكدارە جاش و خۆفرۆشەكان بكەنەوە، منیش لێرەدا ناوی (شاسوار عەبدولواحید)م وەرگێڕاوە بۆ عەرەبی و بە رێكەوت بووە بە (ملك الفرسان) بە رێنووسی كوردییش دەنووسرێ (مەلیكول فورسان) واتە بە مەفهوومی بەعس، شاجاش یان شای جاشەكان!

شوكور بۆ خوا لە سەردەمی رژێمی بەعسدا، ئەم شاسوار عەبدولواحیدی حازریە، نەبووبووە پیاوێكی كامڵ لە رووی تەمەنەوە، خوا رەحمی بە گەنجانی كوردستان كرد كە لە ساڵی ١٩٩١ەوە خۆری بەعس لەم بەشەی كوردستان ئاوا بوو، دەنا بەپێی رەفتارەكانی ئێستای بێت، ئەگەر ئەوكات لەم تەمەنەی ئێستایدا بوایە، ئەو شاسوار عەبدولواحیدە، شاجاش و سیخووڕێكی بەعسیی لێ دەردەچوو، ئاوی لێڵ نەدەكرد. ئێستا لەبری پاشناوی (سەرۆكی جووڵانەوەی نوێ) دەبوایە پێشناوی (رەفیق)ی بۆ زیاد بكرایە و بمانگوتایە: (رەفیق شاسوار).

تۆ بزانە، خەڵك جاران دەبووە جاشی دیكتاتۆرێكی وەكوو سەدام، ئەو سەدامەی بە شەڕ و شەڕانگێزی و تیرۆر و خوێنڕێژی و سەركوتكردن، شەرق و غەربی دونیای هەراسان كردبوو، ئەو سەدامەی هەر كە هاتە سەر حوكم، دەستی كرد بە شەڕ تا ئاوەو ئاویش چوو هەر لە شەڕدا بوو، جا قوربان جاشی جاران جاشێتیی بۆ پیاوێكی وەكوو سەدام دەكرد، بەڵام شاسوار عەبدولواحید و پەرلەمانتاران و خەدەم و حەشەمەكەی، ئێستا بوونەتە جاشی پیاوی وەكوو قەیس خەزعەلی و حەسەن پلاییس و ئەمسالەكانیان، بۆیە كە شاسواری (مەلیكول فورسان)مان بینی دەبێ لە جێی خۆمانەوە تەحییە بۆ جاشی جاران بكەین!

سەرنج لە شتێكی تر بدەن، جاران دز لە شەوی ئەنگوستەچاو و بە جلوبەرگی رەش و بە سەر و رووخساری دەمامكدارەوە، بە لایتێكی قەڵەمیی بچووك و جووتێ پاتەی لاستیكەوە بۆ ئەوەی دەنگی نەیەت! دەچووە دزی، جا چاوەڕێی دەكرد تا خێزانەكە لە ماڵ نەدەمان و ماڵەكە چۆڵ دەبوو، ئەوجا كاكی دز دەچوو، پارچە زێڕێك، یان تەلەڤزیۆنێك یان رادیۆیەك یان ربەیەك برنج و ساوەر، یان ئالێری تەلەڤزیۆنێكی لە سەربانی ماڵەكە دەدزی، كەچی ئێستا شاسوار عەبدولواحید، بە رۆژی رووناك و بە بەرچاوی هەموو خەڵكەوە ملیۆنان دۆلاری هەزاران خاوەن پشكی چاڤی لاندی دزیوە و یەك دیناری دزراویش بۆ خاوەنەكانی ناگێڕێتەوە، ئنجا شەو رۆژ لەسەر شاشەوە قسەی زل دەكات، لەوەش كۆمیدیتر ئەوەیە هێشتا ئەو بەو پاشەڵەوە باسی دزی دەكات! بۆیە هەر جارێك كە شاسوارمان بینی دەبێ بڵێین: دزەكانی جاران هەزار سڵاوتان لێ بێت، ئای ئێوە چەند خەڵكانێكی دەستپاك و ئەمین بوون!

دیقەت لە شتێكی تر بدەن، جاران خەڵك بە هەزار شەرم و تكا و رجاوە، بڕێك پارەی بە قەرز لە خاوەن قەرزێك وەردەگرت و وەعدی دەدا بە خاوەن قەرزەكە ئەمما وەعدی پیاو! كە لە فڵانە رۆژ یان فڵانە مانگ قەرزەكەی دەداتەوە، ئیدی كە وادەی گێڕانەوەی قەرزەكە بهاتایە و یارۆی قەرزدار نەیتوانیایە قەرزەكە بداتەوە، نەك هەر لە شەقام و بازاڕ و بۆنەكاندا، تەنانەت ئەگەر لە تەلەڤزیۆنیشدا خاوەن قەرزەكەی ببینیاتەوە، لە شەرم و تەریقیدا حەوت كۆڵان خۆی لە دیداری خاوەن قەرز دەشاردەوە، چونكە قەرزداری جاران شەرم و حەیای هەبوو.

بەڵام ئەم شاسوار عەدولواحیدە لە زەمانی سەرۆك وەزیرانیەكەی بەرهەم ساڵحەوە، بڕی ٤٠ ملیۆن دۆلاری لە حكوومەتی هەرێمی كوردستان قەرز كردووە، نەك هەر قەرزەكە ناداتەوە، بەڵكوو هیچ شەرم و حەیا نایگرێ و دێ حزب دادەمەزرێنێ و تەلەڤزیۆنی نوێ دەكاتەوە، بەشداریی هەڵبژاردن دەكات و خۆی وەك فریادڕەس دەناسێنێ و باسی گەندەڵی و قەرزاریی خەڵكی تر دەكات، ئاخر بۆیە كاتێ شاسوارمان بینی، دەبێ قەرزدارەكانی جاران ماچباران بكەین و پێیان بڵێین: ئای قەرزدارانی جاران، ئێوە چەند خەڵكێكی بەحەیا و بەحورمەت بوون!

ئێستاش سەرنج بدەن، بزانن كام میدیای عەرەبیی شۆڤێنی و كام میدیای وڵاتی داگیركەر و كام میدیای حەشد و داعش، بە درێژایی ئەم ساڵانەی رابردوو، هێندەی میدیاكەی شاسواری مەلیكول فورسان، دژی پێشمەرگە و دژی كەسوكاری شەهیدان و دژی مافە رەواكانی خەڵكی كوردستان و دژی هەموو شتێكی باشی كوردە؟ میدیایەك كە هەمبەر خیانەتی ١٦ی ئۆكتۆبەر و تەسلیمكردن و فرۆشتنی نیوەی خاكی كوردستانی باشوور فززەی لێوە نەهات، كەچی لە شەڕی پردێ بۆ داگیركردنی هەولێر، بووبووە دەمڕاست و وتەبێژی حەشدی شەعبی و هێزە داگیركەرەكانی تر.

میدیایەك كە دەهۆڵی بۆ داگیركردنی هەولێر و كوردستان لێ دەدا، ئەو میدیایەی كە لە شەڕی دژ بە داعشدا، شەوانە رۆژ خەڵكانێك لە شاشەكانیەوە پێشمەرگەیان بە (كۆیلە) ناو دەبرد، ئێستا خاوەنی ئەو میدیایە كە شاسواری مەلیكول فورسانە كە بە هەموو تەمەنی خۆی و ماڵبات و خەدەم و حەشەم و شەللاتیەكانی دەوریەوە، یەك تەقەی خۆشییان نەكردووە و خودی خۆشی جگە لە دزی لە خەڵك و دادۆشینی سلێمانی، یەك تنۆك عارەقی بۆ كوردستان نەڕشتووە، ئێستا بەدەم باسی كێشەی خەڵكی ناوچە كوردستانیە داگیركراوەكانەوە، هەرچی قسەی ناشرینە بە هێزی پێشمەرگەی كوردستانی دەڵێت، ئەگەر داوودەزگای جێبەجێكار و یاسایی كوردستان، ئیدی لە دادگا شاسوار بە سزای یاسایی خۆی نەگەیەنن لەپای ئەو هەموو دزی و تاوانە، من بەشبەحاڵی خۆم گومانی زۆر لە هەوڵەكان بۆ سەروەربوونی یاسا دەكەم.