میسال ئالووسی: ئەوانەی لە هەڵبژاردندا دۆڕاون بە مەبەست بۆشایی ئەمنییان لە مەخموور دروست کردووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

میسال ئالووسی: ئەوانەی لە هەڵبژاردندا دۆڕاون بە مەبەست بۆشایی ئەمنییان لە مەخموور دروست کردووە

دوێنی شەو، وەک چەندین جاری دیکە، تیرۆریستانی داعش، سوودیان لەو بۆشاییە ئەمنییانە بینی، کە لەنێوان هێزەکانی پێشمەرگە و هێزە چەکدارەکانی عێراقدا هەن و ژمارەیەک پێشمەرگە و هاووڵاتییان لە بناری قەرەچووغ لە سنووری مەخموور شەهید و بریندار کرد، سیاسەتمەدارێکی عێراقیش رای دەگەیەنێ، ئەو بۆشاییە ئەمنییانە لەلایەن هێزە دۆڕاوەکانی هەڵبژاردنی پێشوەختەی پەرلەمانی عێراق بە مەبەست و بە دەستی ئەنقەست هێشتراونەتەوە.

میسال ئالووسی، سیاسەتمەداری عەرەبی سوننە و دامەزرێنەری حزبی ئومەی عێراقی، لە هەژماری تایبەتی خۆی لە (تویتەر) پەیامێکی سەبارەت بە هێرشی شەوی رابردووی تیرۆریستانی داعش بۆ سەر گوندی خدرجیجە و شەهیدکردن و بریندارکردنی خەڵکی مەدەنی و پێشمەرگە بڵاو کردووەتەوە و نووسیویەتی: ”بۆشایی ئەمنی لەلایەن هێزە دۆڕاوەکانی هەڵبژاردن بە مەبەست و بە دەستی ئەنقەست هێشتراونەتەوە و تیرۆریستانی داعش بۆ هێرشی ترسنۆکانە قۆستوویانەتەوە و 12 کەسیان لە خەڵکی مەدەنی و پێشمەرگە قارەمانەکان لە بناری چیای قەرەچووغ شەهید کردووە“.

ئەو سیاسییە عەرەبە عێراقییە هاوخەمیی خۆیشی بۆ گەلی کورد دەربڕیوە و دەڵێ: ”سەرەخۆشیی خۆم لە گەلی کورد دەکەم و نەمریی بۆ شەهیدانی قارەمان و مردن و رووڕەشی بۆ تیرۆریستان و سەبەبکاران“.

شەوی پێنجشەممە 2/12/2021، تیرۆریستانی داعش هێرشیان کردە سەر گوندی خدرجیجە و لاوەریان لەنزیک مەخموور .

ئەمڕۆ هەینی 3ی12ی2021 وەزارەتی پێشمەرگە راگەیەندراوێکی بڵاوکردەوە و تیایدا هاتووە "بەداخەوە، کاتژمێر 22:00 شەوی 2ی کانونی یەکەمی 2021، تیرۆریستانی داعش، پەلاماری گوندی خدر جیجەی بناری چیای قەرەچوغیان دا، لەم پەلامارە دڕندانەیەدا، کوێرانە کەوتنە دەستڕێژی کردن لە خەڵکی سڤیلی گوندەکە، لە ئەنجامدا سێ هاوڵاتی شەهید بوون و ژمارەیەکیش بریندار بوون".

وەزارەتی پێشمەرگە دەشڵێ: "هێزەکانی پێشمەرگە بەزوویی بەهانای خەڵکی گوندەکەوە چوون و توانیان لەماوەیەکی کەمدا، بارودۆخەکە کۆنتڕۆڵ بکەن و تیرۆریستان راو بنێن.دواتر هێزی پێشمەرگە ئۆپەراسیۆنێکی کێوماڵکردنی بۆ ناوچەکە ئەنجامدا، لەوکاتەدا، یەکێک لە ئۆتۆمبێلەکانی پێشمەرگە کەوتە بۆسەی تیرۆریستانی داعشەوە، بەداخەوە حەوت پێشمەرگە شەهید بوون".

جەختیشی کردووەتەوە: "وێڕای راگەیاندنی پرسە و سەرەخۆشیمان بۆ کەسوکاری شەهیدانی پێشمەرگە و شەهیدانی گوندی خدر جیجە، دوپاتی دەکەینەوە، کە خوێنی شەهیدانمان بەفیڕۆ ناچێت و تیرۆریستان و ئەوانەی پاڵپشتیشیان دەکەن، دەبێ باجێکی گەورە بدەن".

لە راگەیەندراوەکەدا، وەزارەتی پێشمەرگە دووپاتی دەکاتەوە کە: "کە هەماهەنگی و هاوکاریی نێوان وەزارەتی پێشمەرگە و وەزارەتی بەرگری و هاوپەیمانان، پێویستە لە قۆناغی چەقبەستوویی بێتە دەر، زۆر بەخێرایی و بەبێ چاوەڕوانیکردن دەبێت ئۆپەراسیۆنی هاوبەش دەست پێبکەین و نابێت چیتر رێگە بدەین، تیرۆریستان مۆڵگە و شوێنی حەوانەوەکانیان وەک خۆی بمێنێ و ناوچەی پارێزراوی خۆیان هەبێت”.