هەنگاوێكی بەجێی كوردستانیانە لە برۆكسل
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
هەرمن ئەحمەد 02/12/2021

هەنگاوێكی بەجێی كوردستانیانە لە برۆكسل

زۆر جار و لە زۆر شوێن و بۆنەدا، باسی گرنگیی بوونی ستراتیژیه‌تێكی كوردانە و كوردستانیانە بۆ كاركردن لەسەر هێزی نەرم دەكرێت، هێزی نەرم كە خۆناساندن و خۆبردنە پێشەوەی كورد و كوردستانە لەنێو كۆمەڵگەی مرۆییدا، لەڕێگەی داهێنان و چالاكیی (زانستی بە هەموو لقەكانیەوە، كولتووری بە هەموو بەشەكانیەوە، هونەری بە هەموو بوارەكانیەوە، وەرزشی بە هەموو جۆرەكانیەوە، چالاكیی مەدەنی و... هتد) نزیكترین و باشترین رێگەش بۆ ئەم ئامانجە ئەوەیە كە سوود لە توانا مرۆییەكانی كوردستانیانی دەرەوە و ناوەوەی كوردستان وەربگرین، نەخاسمە كوردستانیانی تاراوگە.

گه‌ر بەراوردی دوێنێ و ئه‌مڕۆ بكه‌ین، ده‌بینین چه‌ندین گۆڕانكاریی سیاسی و ئابووری و كۆمەڵایەتی و كولتووری، هەم لەسەر ئاستی جیهان و هەم لەسەر ئاستی كۆمەڵگەی كوردستانی روویان داوە، بێگومان لەنێو كوردستانیانی تاراوگەشدا ئەم گۆڕانكارییانە هەستیان پێدەكرێ، جا بەشێكیان پەیوەندیی بەو قۆناغە جیاوازانەوە هەیە كە كوردستانیان تیایدا روویان لە ئەورووپا و تاراوگە بەگشتی كردووە. ناشاردرێتەوە كە زۆرینەی ئەو كوردستانیانەی له‌ ده‌ره‌وه‌ی هه‌رێمی كوردستان ده‌ژین، هه‌میشه‌ چاو و فۆكس و هه‌ستیان له‌ناو كوردستانه، به‌وانه‌شی كه‌ ئه‌نتی حزبه‌كانی نێو حكوومەتی هەرێمی كوردستانن، یان دژ‌به‌ر خۆیان ناساندووه‌، كەواتە كاركردن لەسەر توانا مرۆییەكانیان پێویستیەكی حەتمیە.

مۆدیلی بیركردنه‌وه‌ و لایف ستایلی ڕه‌وه‌ندی كورد و كوردستانیان له‌ ئه‌ورووپا تا رادەیەك جیاوازە، هه‌ر بۆیه‌ وا پێویست ده‌كات له‌گه‌ڵ ئەو هێزه‌ نه‌رمەی كە لەنێو كوردستانیانی تاراوگەدا هەیە، به‌ میتۆد و به ‌ڕێگایه‌كی جیاواز، زه‌مینه‌سازی له‌ چواچێوه‌ی فه‌زایه‌كی گشتی و كراوە نەك بەرتەسك، كاریان له‌گه‌ڵدا بكرێ، نوێگه‌ری له‌ چالاكییه‌كان له‌ خولقاندنی گفتوگۆ و نزیكبوونه‌وه‌، باشتر كار ده‌كاته‌ سه‌ر هۆشیاری و پابەندیی نەتەوەیی و نیشتمانیی ڕه‌وه‌ندی كورد لە ئەورووپا.

زۆر جار باس له‌ دروستكردنی لۆبیی به‌هێز ده‌كرێت و ئاماژە بە چه‌ندین نموونه‌ی زیندووی میللەتان و وڵاتانی پێشكه‌وتوو ده‌كرێت له‌ دروستكردنی لۆبیدا، ‌لێ جیاوازیی ئێمه‌ و ئه‌وان زۆرن، یه‌كه‌مین خاڵی جیاوازییش له‌وه‌دایه‌ كه‌ ئێمه‌ی كورد و كوردستانی یه‌كگرتوو نین، چۆن هەمیشه‌ ده‌ڵێن: ”ده‌بێ له‌ناو هه‌رێمی كوردستاندا، نێوماڵی كورد یەك بخرێت و رێك بخرێت“، بە هەمان شێوە ده‌بێ له‌ ده‌ره‌وه‌ی هه‌رێمی كوردستانیش واتە كوردستانیانی تاراوگە، نێوماڵی خۆیان یەك بخەن بە یەك ئامانج و یەك هیوا و چاو لە یەك ئاسۆ، دوای ئەم پرۆسەیە ئنجا ده‌توانرێت ده‌ست به‌ خاڵه‌كانی تر بكرێت، ئێستا پێش ئه‌وه‌ی باس له‌ بایەخی لۆبی لەسەر ئاستی نێوده‌وڵه‌تی بكه‌ین، پێویستمان به‌ دروستكردنی لۆبیه‌كی كوردستانیه لەسەر ئاستی فكری كوردستانی، گرنگە هەنگاو و كار و چالاكییه‌كانی ره‌وه‌ندی كورد به‌تایبه‌تی و كوردستانیان به‌گشتی، لە دەردی په‌رته‌وازه‌یی و په‌رتوبڵاوی رزگار بكرێت. ‌

ئه‌و چالاكوانە كوردستانیانەی لە هەر چوارچێوەیەكدا خۆیان ته‌رخان كردووه‌ تا كار و چالاكییه‌كانیان له‌ ناوه‌ندی ئه‌ورووپادا رێك بخه‌ن، من ئه‌م پرسیارانەیان لێ ده‌كه‌م: ئایا بڕواتان بە هێزی نەرم هەیە وەك هێزێكی كارا و كاریگەر؟ ئەگەر وایە چۆن سوود له‌م هێزه‌ نه‌رمه‌ وه‌رده‌گرن؟ چۆن بیرۆكە و كه‌رەسته‌ مرۆییه‌كانی هێزی نه‌رم له‌ دۆخی خامۆشییه‌وه‌ ده‌گوازنه‌وه‌ بۆ گه‌لاڵه‌بوون و بەرجەستەبوون؟ خۆ ئەمە كارێكی زۆر ئاستەم و قورس نیه، ڕێكخستن و گرینگیدان به‌و كوردستانیانەی تاراوگە كه‌ لە یەكێك لە بوارەكانی ژیانی پێشكەوتوودا، سەركەوتوو و به‌توانان و كاریان پێده‌كرێت، لە هەنگاوە گرنگ و لەپێشەكانی ئەم پرۆسەیەیە.

ڕاسته‌ دیاردەی فرەحزبی و فرەڕایی سیاسیی ئایدۆلۆژی و عەقائیدی، ئه‌ده‌بیاتی سیاسیی ئێمەی تەنیوە و هەنگاو و چالاكیەكانمان زۆرتر لەسەر ئاستی حزبیە و كەمتر لەسەر ئاستی نەتەوە و نیشتمانە، بەڵام یەك ئامانجی یان بوونی ئامانج و ئاسۆی هاوبەش، كۆمان دەكاتەوە، ئەم یەك ئامانجیەش بە داڕشتنی ستراتیژێكی تایبەت وەدی دێت و ئەو ستراتیژەش دەبێ لەڕێگەی وەگەڕخستنی هێزی نەرمەوە بێت، با واز لەو كوردانە بێنین كە لەسەر بنەمای رق و كینە دەدوێن و كار دەكەن، ئەوان خۆیان ساغ كردووەتەوە، بەڵام زۆرینەی كوردستانیانی تاراوگە وەها نین.

پێش چه‌ند ڕۆژێك، لە شاری برۆكسلی پایتەختی بەلجیكا، چالاكییەكی هاوبه‌شی كولتووری و هونەری و مێژوویی، بە هەماهەنگی و هەرەوەزیی نێوان نوێنه‌رایه‌تیی حكوومه‌تی هه‌رێمی كوردستان له‌ یەكیتیی ئەورووپا له‌گه‌ڵ ده‌زگای سه‌نگه‌ر و پێشمه‌رگه، بەڕێوە چوو، لەو پێشانگایەدا كە هەم كەسایەتیی گرنگی بەلجیكی و ئەورووپی و هەم كوردی تاراوگە ئامادە بوون تێیدا، چەندان وێنه ‌و بەڵگەنامەی گرنگ و كتێب كە گرنگترینیان كتێبی (بۆ مێژوو)ی سەرۆك بارزانی بوو بە زمانی ئینگلیزی و فەرەنسی، بۆ زیاتر ناساندنی هێزی پێشمه‌رگه و رۆڵ و مێژووی، نماییش كرا، كە بە بڕوای من و ئەوانەی لەو پێشانگایە ئامادە بوون، ئەم چالاكییە زۆر لەجێ و رێكوپێك و گرنگ بوو.

دەگوترێ: ”ئه‌و رێگایەی هه‌زار میلە، بە هەنگاوێك دەست پێدەكات“، ئەم چالاكییە لە هۆڵێكدا بوو، بەڵام زۆر بەهادار و تایبەت بوو، ئەمە یەكێكە لە هەنگاوەكانی ئەو ستراتیژەی پشت بە هێزی نەرم دەبەستێت، دەبێ كوردستانیان بیگرنە بەر، له‌وانه‌یه‌ بڵێن: ”جا خۆ بەر لە ئێستاش ئەم جۆرە چالاكییانە هەبوون و كارێكی نوێ نەبووە!“، بەڵام من بۆیە بە بایەخەوە هەڵیدەسەنگێنم، جیاوازییەكەی ئه‌وه‌یه‌ كە ئەم پێشانگایەی برۆكسل دوای دابڕانێكی زۆر لەم جۆرە چالاكییانە به‌ شێواز و ستایلێكی نوێ له‌ ناوه‌ندێكی گرنگی ئەورووپادا ساز كرا، هیوادارم كار و چالاكیی لەم شێوەیە زۆرتر و زۆرتر بێت، هەر كوردستانیەك بەو ئاراستەیە كار بكات، هەم كارێكی باش دەكات و هەم مایەی دەستخۆشییە.