كەركووك.. نزیكەی 15 هەزار خێزانی كەسوكاری داعش لە شارەكە نیشتەجێبوونە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

كەركووك.. نزیكەی 15 هەزار خێزانی كەسوكاری داعش لە شارەكە نیشتەجێبوونە

خێزانێكی زۆری چەكدارانی داعشی خەڵكی ناوچە جیاجیاكان عێراق و بەتایبەت خەڵكی حەویجە و دەوروبەری بە كارئاسانی ئیدارەی سەپێندراوی كەركووك لە شاری كەركووك نیشتەجێ بوونە، فەرماندەیەكی پۆلیسی كەركووك ئاشكرا دەكات، نزیكەی 15 هەزار خێزانی كەسوكاری داعش لە كەركووك نیشتەجێ بوونە.

لە سەردانێكی مەیدانی (باسنیوز) بۆ گەڕەكەكانی وەحدە و حوڕەییە و قادسییەی شاری كەركووك و لە نزیكەوە دواندنی چەند هاووڵاتییەكی ئەو گەڕەكانە بۆ (باسنیوز) ئاشكرایان كرد، خێزانێكی زۆری كەسوكاری چەكدارانی داعش لە گەڕەكەكانیان نیشتەجێ بوونە و ئەو خێزانانە بەشی بەرچاویان كەسیان لەناو داعشدا كوژراون و هەروەها ئێستاش كەسیان هەیە لەناو ریزەكانی ئەو رێكخراوە ترۆریستییەن و خەڵك بە گشتی لە هاتنی ئەو خێزانانە نیگەرانە، بەڵام ئەوان لەلایەن ئیدارەی كەركووكەوە رێگەیان پێ دەدرێت نیشتەجێ بن.

هەر لەو سەردانە مەیدانییەدا پەیامنێری (باسنیوز) لە یەكێك لە كۆڵانەكانی گەڕەكی حوڕییەی كەركووك لە نزیكەوە خێزانێكی كەسوكاری داعشی دواند كە خێزانەكە پێكهاتبوون لە دایكێكی تەمەن 50 ساڵ و چوار منداڵی هەبوو كە دوو لە منداڵەكانیان تەمەنیان لە نێوان 23 ساڵ بۆ 25 ساڵ بوو و دایكەكەیان ئەوەی گوت كە مێردەكەی لە زیندانی تاجی لە بەغدا 15 ساڵ بەتومەتی پەیوەندی بە داعشەوە سزا دراوە و نزیكەی سێ ساڵە لە زیندانە و حەزیان لە حەویجە نەماوە و هاتونە لە كەركووك نیشتەجێ بوونە، یەكێك لە هاوسێكانیشیان ئاشكرای كرد كە كوڕە گەورەكەشی چەكداری داعش بووە و هەر لە سنووری حەویجە كوژراوە، نمونەی سەدان خێزانی هاوشێوە كە ئێستا لە كەركووك نیشتەجێبوونە هەیە.

لە بارەی بوونی خێزانێكی زۆری داعش لە كەركووك، ئەمڕۆ چوارشەممە 1/12/2021، عەقید یووسف ساڵح، ئەفسەری پۆلیسی كەركووك، بە (باسنیوز)ی ڕاگەیاند: "نزیكەی 15 هەزار خێزانی كەسوكاری چەكدارانی داعش لە كەركووك نیشتەجێ بوونە و ئەو خێزانانە زیاتر خەڵكی حەویجە و دەوروبەری و هەروەها پارێزگاكانی سەڵاحەدین، نەینەوا و ئەنبارن و شوێن و ناوچەی تریشن".

ئاشكراشی كرد، ئەو خێزانانە پێشتر لەژێر دەسەڵاتی داعش بوونە تیایاندا هەیە كوڕیان كوژراوە كە چەكداری داعش بونە و هەروەها تیایاندا هەیە كەسوكاریان دەستگیركراون هەر بەتومەتی پەیوەندی بە داعش و ئێستا لە زیندانەكانن و هەیە مێرد و كوڕی كوژراوە، واتا ئیتر هەمەجۆرە تەنیا لە سنووری بنكەی پۆلیسی دۆمیز 420 خێزانی كەسوكاری داعش هەن".

لەو چوارچێوەیەدا، ئەمڕۆ چوارشەممە 1/12/2021، ڕەسووڵ ڕەئووف، بەرپرسی مەڵبەندی كەركووكی حزبی سۆشیالیست، بە (باسنیوز)ی ڕاگەیاند: "ئاسانكاری بۆ هاتنی ئەو عەرەبانە بۆ ناو شاری كەركووك بە بەرنامەیە، ئەوەش بە بەرنامەیەكی درێژخایەن دەكرێ، كاریگەری خراپی بۆ ئێستا ئەوەیە كە ئەو خێزانانە كەسوكاریان چەكداری داعشن و هەمیشە لەبەرەی دژی هێزەكانی پێشمەرگەی كوردستان و شاری كەركووكدان و دەبێتە ڕێخۆشكەرێك بۆ ئەو گرووپانە بتوانن بە ئاسانی دەستیان بگاتە ناو شاری كەركووك و هەرچەندە دەبێ كەركووك وابێ كە نابێ ڕێگە بدرێ خەڵك لە پارێزگاكانی ترەوە ڕوو لە كەركووك بكەن بۆ نیشتەجێبوون، بەڵام ئێستا ئەو دەسەڵاتە خۆجێیەی كەركووك بەهەر بیانوویەك بێ ڕێی خۆشكردووە بۆ ئەوەی ئەو عەرەبانە دەهێننە كەركووك".

هاوكات ئەو بەرپرسەی سۆشیالیست ئەوەی خستە ڕوو، بۆ داهاتووش گەورەترین كێشە دروست دەبێ لەبەر ئەوەی ئەو خێزانانە نەوە دەخەنەوە و منداڵیان دەبێ و ولادەیان دەبێتە كەركووك، ئەوكاتە زۆر بە ئاسانی دەتوانن كۆمەڵگێك گرفت بۆ كەركووك و دەوروبەری دروست بكەن، ئەو خێزانە عەرەبانەی كە هێندراون بۆ كەركووك نیشتەجێ كراون دەتوانین بڵێن لە % 80 یان بە ئامانج دێنە كەركووك بۆ ئەوەی دەستیان بگاتە دامودزگاكان و ئیدارەكان ئەم شارە و پێم وایە مەترسییەكی گەورەن، بەڵام بەداخەوە ئیدارە خۆجێی كەركووك نەك هەر رێگر لێ ناكات بەڵكوو ئاسانكاریشیان بۆ دەكات.

پێشتر بەشی زۆری ئەو خێزانانە لە كەمپەكانی سنووری كەركووك نیشتەجێ كرابوون، بەڵام دوای داخستنی كەمپەكان، ئێستا تێكڕا ئەو خێزانە هاتونە ناو شاری كەركووك نیشتەجێبوونە.