داقووق.. عەرەبی هاوردە لە داگیركردنی زەویوزاری كورد بەردەوامن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

داقووق.. عەرەبی هاوردە لە داگیركردنی زەویوزاری كورد بەردەوامن

"ئەم جارە دەیانەوێت زیاتر لە 400 دۆنم زەویی جووتیارانی كوردی ناوچەی هەفتەغار داگیر بكەن"

لە سنووری قەزای داقووقی سەر بە پارێزگای كەركووك، عەرەبە هاوردەكان لەسەر داگیركردنی زەویوزاری جووتیارانی كورد بەردەوامن و دەستیان بە کێڵانی بەشێك لەو زەوییانە كردووە.

بەپێی زانیارییەكانی (باسنیوز)، ئێستا لە بەشێك لە ناوچە جیاجیاكانی پارێزگای كەركووك، عەرەبە هاوردەكان گەڕێكی نوێی هەوڵی داگیركردنی زەویوزاری جووتیارانی كوردیان دەست پێكردووەتەوە.

ئەوەش زاندراوە، ئەو هەوڵەی ئەمساڵ و لەم كاتەدایاندا، كە وەرزی كێڵانی زەوییە، لە سنووری قەزای داقووق و بە دیاریكراوی لە گوندەكانی ناوچەی هەفتەغار، عەرەبە هاوردەكان نیازی داگیرکارییان هەیە و سكاڵاشیان لەسەر زیاتر لە 400 دۆنم زەویی جووتیارانی كوردی ئەو ناوچەیە كردووە، كە پێك دێ لە زەویوزاری پێنج گوندی كوردانی ناوچەی هەفتەغار، بۆ ئەوەی داگیریان بكەن.

بۆ ئەو مەبەستە، هێزێكی ئەمنی و لیژنەیەكی كشتوكاڵی كەركووك چوونەتە ناوچەی هەفتەغار، بۆ ئەوەی كوردەكان زەوییەكانیان چۆڵ بكەن و عەرەبە هاوردەكان بیكێڵن، جووتیارانی ناوچەكەش ئەو هەنگاوە بە ترسناك دەزانن.

لەمبارەیەوە، لوقمان عەزیز، جووتیارێكی خەڵكی ناوچەی هەفتەغار، بە (باسنیوز)ی ڕاگەیاند: "عەرەبە هاوردەكان لەسەر چەند پارچە زەوییەكی ناوچەكەمان دەستیان بە كێڵان كردووە، بێ گومان ئەوەش بە پاڵپشتیی هێزە ئەمنییەكان بووە، بەڵام ئێستا دەیانەوێت زیاتر لە 420 دۆنم زەویی دیکەی ناوچەكە داگیر بكەن، كە ئەمەیان مەترسییە".

ئەو جووتیارە گوتیشی: “ئەگەر ئەم جارە ئەم هەنگاوەی عەرەبە هاوردەكان بۆ داگیركردنی ئەو 420 دۆنم زەوییە بچێتە سەر، ئەوا ڕەنگە ئیتر هەموو زەوییەكانی دیکەیش داگیر بكەن و تەنانەت لە گوندە كاكەییەكان و شوێنەكانی دیکەیش زەویی كورد داگیر دەكەن”.

لویس فەندی، قایمقامی داقووق، بە (باسنیوز)ی ڕاگەیاند: "كێشەی زەویوزار لە سنووری قەزای داقووق هەر بە چارەسەرنەكراوی ماوەتەوە، بەڵام ئەوەی كە من بیزانم، ئێستا لەلایەن دادگای داقووقەوە گرێبەستی كشتوكاڵی نوێ ناكرێتەوە".

گوتیشی: “بەڵام ئەوەی لەم رۆژانە ڕووی دا، كەسێك فەرمانی لە دادگاوە هێناوە بۆ وەرگرتنی زەویی كشتوكاڵی لە سنووری داقووق، بەڵام ئەمە نەبووەتە شەڕی عەرەب و كورد، بەڵکوو كەسێك بووە و ویستوویەتی ئەو زەوییانە وەربگرێت”.

ئەو قایمقامە عەرەبەی داقووق، كە لەدوای خیانەتی 16ی ئۆكتۆبەری 2017ەوە قایمقامە كوردەكە لادرا و ئەم لە شوێنی داندرا، ئەوەشی گوت: “زەوییەكانی ناوچەی هەفتەغاری سەر بە داقووق، بەشێكیان هەر جووتیارانی كورد لەناو خۆیاندا كێشەیان لەسەری هەیە، ئیتر هیچی ئەوتۆ لەنێوان عەرەب و كورد نەبووە، لەوێش و لەسەر زەوییەكان بەگشتی بڕیاری كۆتایی نەدراوە”.

بەڵام، ئەمڕۆ یەكشەممە 14/11/2021، مەهدی كاكەیی، بەڕێوەبەری گشتیی شەرعیی كشتوكاڵی كەركووك، بە (باسنیوز)ی ڕاگەیاند: "گومانی تێدا نییە، هەوڵەكانی تەعریبكردن، بەتایبەت لە ناوچەی داقووق و هەروەها تێكڕای كەركووك هەر بەردەوامن، بەتایبەت ئێستا كە وەرزی چاندنە و جووتیارانی عەرەب هەوڵەكانیان زیاتر چڕ كردووەتەوە و لە ڕێگەی وەزارەتی كشتوكاڵی عێراق و هەروەها لە ڕێگەی پارێزگاری سەپێندراوی كەركووك و ئەو هێزانەی كە لە ناوچەكەدان پاڵپشتیی دەکرێن، بۆ ئەوەی لەسەر زەوییەكانی جووتیارانی كورد دەست بە كشتوكاڵ بكەن، چونكە هەندێ لە دادگاكانیش بڕیار لە بەرژەوەندیی عەرەبە هاوردەكان دەردەكەن و كار بەو گرێبەستانە دەكەن، كە كاتی خۆی رژێمی بەعس بۆ عەرەبەكان، بە مەبەستی تەعریبكردن كردوویەتی، بێ ئەوەی بگەڕێنەوە بۆ ئەوەی، كە ئەو زەوییانە پێشتر موڵكی كورد بوونە و تاپۆیان هەیە، یان پێشتر حكوومەت خۆی پێیانی داوە".

مەهدی كاكەیی، ئاماژەی بۆ ئەوەش كرد، “ئەو عەرەبانەی ئێستا هاتوونەتەوە، نیشتەجێی ئەو ناوچانە نیین، تەنانەت نفووسیشیان كەركووك نییە، بەڵام لەگەڵ ئەوەشدا، بە سیاسەتێكی داڕێژراو، ساڵانە ئەو گیروگرفتانە بۆ جووتیارانی كورد دروست دەكەن و زیاتر ئێستا لە ناوچەی هەفتەغاری داقووق چڕ بووەتەوە”.

هەروەها گوندە كاكەییەكانی داقووق، كە زەوییەكان بەشێكیان لە بنەڕەتدا تاپۆی نوێشیان هەیە، بەڵام لەگەڵ ئەوەشدا، هەوڵەكان بۆ داگیركردنی زەوی، بە مەبەستی ئەوەی ئێستاكە وەرزی چاندنی گەنمە، بۆ ئەوەی ئەو زەوییانە بكەن، یان هیچ نەبێ گیروگرفت بۆ جووتیارانی كورد دروست بكەن، بۆ ئەوەی ئەمساڵ توو نەكەن و لە دڵەڕاوكێدا بژین و ناچاریان بكەن، كە كۆچ بكەن، ئەوەش لەم كاتەدا كارێكی زۆر خراپە، كە ئێستا لە سەروبەندی ئەوەیە حكوومەتێكی نوێ لە عێراق پێكبهێنرێت.