دووبز.. عەرەبە هاوردەكان زیاتر لە 250 دۆنم زەوی گوندێكی دیكەی كوردان داگیر دەكەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دووبز.. عەرەبە هاوردەكان زیاتر لە 250 دۆنم زەوی گوندێكی دیكەی كوردان داگیر دەكەن

موختاری گوندەكە: كشتوكاڵی و دادگای كەركووك سەرچاوەی داگیركردنی زەویوزارەكانمانن

عەرەبە هاوردەكان هەر جارە و گێچەڵ بۆ دانیشتوانی گوندێكی قەزای دووبزی سەر بە پارێزگای كەركووك ساز دەکەن و ئەمجارەش لە سنووری گوندێكی تری دووبز، عەرەبە هاوردەكان زیاتر لە 250 دۆنم زەویی كشتوكاڵی گوندەكەیان داگیر كردووە و هەوڵی داگیركردنی زەوییەكانی تریش دەدەن.

لەم بارەوە ئەمڕۆ یەكشەممە 28/11/2021، عومەر شاسوار، موختاری گوندی چەخماخە، بە (باسنیوز)ی ڕاگەیاند: "نازانرێت عەرەبە هاوردەكان گرێبەستی زەویوزار بە پارە نوێ دەكەنەوە، یاخود تەزویرە، چونکە ئێستا گەڕاونەتەوە سەر زەویوزارەكانمان و زیاتر لە 250 دۆنم زەوییان داگیر كردووە و لە كۆی سێ هەزار دۆنم زەویوزاری گوندەكە ئێستاش عەرەبە هاوردەكان هەوڵی ئەوە دەدەن لەڕێگەی ڕاكان جبووری و دادگای كەركووكەوە زەوییەكانی دیكەش داگیر بكەن و ئەو عەرەبانە گرێبەستە كۆنەكانیان دێننەوە و عەرەبەكان نزیكەی بیست ساڵە گوندەكەیان بەجێ هێشتووە و تازە دێنەوە و گرێبەستە كۆنەكانیان بۆ نوێ دەكەنەوە، ئیتر نازانم ئەو گرێبەستانە بە پارە دەكەن یاخود تەزویر".

 ئەوەشی خستە ڕوو: "مەترسییەكی زۆر لەسەر زەوییەكانمان هەیە کە بەگشتی داگیریان بكەنەوە و پێشتر لیژنەیەكی پەرلەمانی عێراق بۆ چارەسەری كێشەی زەویوزار پێك هێندرا و لیژنەكە هاتن و بە بەڕێوەبەری كشتوكاڵی كەركووكیان گوت كە نابێ ئەو عەرەبە هاوردانە بگەڕێنەوە سەر ئەو زەوییانە، تاكوو كێشەكە چاسەر دەكرێ، بەڵام دیارە دادگاكان، هەروەها ئیدارە و كشتوكاڵی كەركووك، ئەو بڕیارەی پەرلەمان لە بەرچاو ناگرن، بۆیە ئەوەی كە هەیە كشتوكاڵی كەركووك و دادگای كەركووكە درێژە بەو تەعریبە دەدەن و گوێ نادەنە بڕیارەكانی پەرلەمان".

لەبارەی ئەو تەعریبەی كە سنووری ژمارەیەك گوندی كوردانی قەزای دووبزی گرتووەتەوە، پێشتر عەبدوڵڵا نووری، قایمقامی شەرعی قەزای دووبز، لە دیمانەیەكی (باسنیوز)دا گوتی، دیارە لە كاتی ڕژێمی بەعسدا ناوچەی دووبز، ڕووبەڕووی شاڵاوێكی فرارانی تەعریب بوەوە و تاكوو ڕووخانی رژێمی بەعس ئەو تەعریبە بەردەوام بوو و ئینجا لە دوای ڕووداوەكانی 16ی  ئۆكتۆبەری 2017ەوە دیسان ئێستا تەعریبێكی چڕ ناوچەكەی گرتووەتەوە، عەرەبە هاوردەكان هەموو كات لە هەوڵدان ناوچە كوردییەكان داگیر بكەن و تەعریبی بكەن و ئێستاش بەتایبەت لە گوندەكانی سەرگەڕانی سەرقاڵی ئەو تەعریبەن لە چەند گوندێكی دیاریكراو و جارێكی تر عەرەبەكان هاتوونەتەوە بۆ داگیركردنی ئەو شوێنانە، هەروەها هێزەكان بەڵێنامەیەكیان دروست كردبوو بۆ ئەوەی بە جووتیارانی كورد پڕی بكەنەوە تاكوو كاری كشتوكاڵی خۆیان نەكەن، بەڵام جووتیارانی كورد ڕەتیان كردبووە كەوا ئەو بەڵێنامەیە پڕ بكەنەوە".

ڕاشیگەیاند: "سنووری قەزای دووبز كە ناوەندی قەزای دووبز، هەروەها ناحییەكانی سەرگەڕان و پردێ دەگرێتەوە، لەڕووی ئابووری و كشتوكاڵییەوە شوێنێكی ستراتیژیییە و دەروازەی هەرێمی كوردستان و پایتەختی هەرێمی كوردستانە، هەروەها ناوچەكە نەوتێكی زۆری لێییە و خاوەنی غازی سروشتی و وێستگەی بەرهەمهێنانی كارەبایە و لەگەڵ ئەوەشدا خاوەنی چەندین سەرچاوەی ئاوە و ناوچەیەكی بەنرخە، بۆیە عەرەبە هاوردەكان هەوڵی داگیركردنی دەدەن".

گوندی چەخماخەش کە ئێستا عەرەبە هاوردەکان چاویان تێبڕیوە، یەكێكە لە گوندەكانی سەر بە قەزای دووبزە، کە دەكەوێتە ڕۆژهەڵاتی قەزاكەوە و 150 خانووی لێیە، بەڵام بەهۆی كردەوە تیرۆریستییەكانی پێشووی داعش و پەلاماری پار بۆ سەر گوندەکە چوار هاووڵاتیی گوندەكە شەهید بوون بەو هۆیەوە زۆرینەی دانیشتووانی گوندە، گوندەكەیان چۆڵ كرد و ئێستا تەنیا 15 خێزان لە گوندەكە ماون و خەڵكەكە بەگشتی لە ترسدا گوندەكەیان چۆڵ كردووە، چونكە دۆخی ئەمنیی ناوچە ناجێگیرە.

 

بەگشتی لە قەزای دووبز 65 گوند هەیە و زۆرینەیان گوندی كوردانن و مەترسیی تەعریبیان لەسەرە.

قەزای دووبز بە 45 كیلۆمەتر دەكەوێتە باكووری ڕۆژئاوای شاری كەركووك و سنووری پارێزگای هەولێر دەكەوێتە باكووری قەزاكەوە و نەینەوا دەكەوێتە ڕۆژئاوای قەزاكەوە و سەڵاحەدین دەكەوێتە باشووری قەزاكەوە و دووبز سەرەتا گوند بووە و پاشان كراوە بە ناحیە و ئینجا لە ساڵی 1953 كراوە بە قەزایەكی سەر بە كەركووك و 65 گوند سەر بە قەزای دووبز هەیە كە زۆرینەی گوندەكان گوندی كوردانن كە ئێستا ڕووبەڕووی تەعریب بوونەتەوە، هەروەها چەند گوندێكی عەرەبنشینیشی لێیە.