وردەكاریی كاركردن له‌ قۆناغی دووه‌مى شەقامی 150 مەتریی هەولێر
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

وردەكاریی كاركردن له‌ قۆناغی دووه‌مى شەقامی 150 مەتریی هەولێر

سەرۆكی شارەوانی: 95 ملیۆن دۆلار بۆ قۆناغی دووەم تەرخان كراوە و 900 كرێكاری خۆماڵییش كاری تێدا دەكەن

كابینەی نۆیەمی حكوومەتی هەرێمی كوردستان بایەخێكی بەرچاوی بە ئاوەدانی و رێگاوبان و شەقام داوە. یەكێك لە پڕۆژە گرنگ و ستراتیژییەكان، كە كاریگەریی گەورەی لەسەر جووڵەی هاتوچۆ و جموجۆڵی بازرگانیدا هەیە، شەقامی 150 مەترییە لە شاری هەولێر. سەرۆكی شارەوانیی هەولێر وردەكاریی شەقامەكە و قۆناغەكانی جێبەجێكردنی دەخاتەڕوو.

درێژیی شه‌قامی بازنه‌یی 150 مه‌تریی شاری هه‌ولێر 70 كیلۆمەترە و بە هەردوو قۆناغی یه‌كه‌م و دووەم، نزیكەی 18 كیلۆمەتری ته‌واو ده‌بێت.

به‌شی یه‌كه‌می قۆناغی یه‌كه‌م كاره‌كانی ته‌واو بووە و به‌ ڕووی شوفێراندا كراوەته‌وه‌، کە ڕێگه‌ی شه‌قڵاوه‌ تا ڕێگه‌ی به‌حركەیە‌، به‌درێژیی 10 کیلۆمەتر، ئێستاش كاركردن له‌ قۆناغی دووه‌می شەقامەکە ده‌ستی پێ كردووه‌.

عه‌بدولواحید ئه‌حمه‌د، سه‌رۆكی شاره‌وانیی هه‌ولێر، بە (باسنیوز)ی راگەیاند: "پڕۆژەی 150مەتریی شاری هەولێر، یەكێكە لە پڕۆژە ستراتیژییەكانی حكوومەتی هەرێمی كوردستان و بە یەكێك لە پڕۆژە گرنگەكانی ناو شاری هەولێر هەژمار دەكرێت، چونكە بەتەواوبوونی، قەرەباڵغیی هاتوچۆ لە هەولێر کەمدەبێتەوە، چونکە پڕۆژەی 150مەتری گشت خاڵە گرنگەكانی هاتوچۆی ناو شاری هەولێر و شەقامە سەرەكییەكانی بەحركە و شەقڵاوە و كەسنەزان بەیەكەوە دەبەستێتەوە".

زیاتر گوتیشی: "لە ڕووی بوژانەوەی ئابوورییشەوە، تەكانێكی گەورە بەو شوێنانە دەدات، كە شەقامەكەیان پێدا تێپەڕ دەبێت، چونكە دەبێتە هۆكارێك بۆ بەرزبوونەوەی نرخی ئەو زەوی و یەكە نیشتەجێبوون و باڵەخانانەی لەو زۆنانەدا دروست كراون وەبەرهێنەرانیش هان دەدات، بەدرێژایی ئەو شەقامە پڕۆژە و كاری وەبەرهێنان بکەن، بەتایبەتی لە ڕووی یەكەی نیشتەجێبوون و باڵەخانەی بازرگانییەوە".

قۆناغی یەكەمی ئەو شەقامە، كە شەقامی هەولێر – بەحركە، هەولێر - شەقڵاوەیە و درێژییەكەی 10 كیلۆمەترە و هەردوو شەقامەكەی چوون و هاتن- جگە لە شەقامە خزمەتگوزارییەكانی- پانییان 19مەترە، لە ساڵی ڕابردوودا تەواو بوون، ئەو بەشە چەندین بەرزەپرد و ژێرپرد، هەروەها چوارڕێیان و سێڕێیان لەخۆ دەگرێت، ئەو شەقامە سەرجەم ڕێگە یەكتربڕەكانیش، كە لە سنوورەكەیدان، بەیەكەوە دەبەستێتەوە.

عه‌بدولواحید ئه‌حمه‌د، گوتیشی: "بەشی دووەم لە شەقامی 150 مەتری، كە دەكاتە شەقامی هەولێر – شەقڵاوە و هەولێر – كەسنەزان، دەستی پێكردووە، كە درێژییەكەی حەوت كیلۆمەتر و دووسەد مەترە و پانی و شێوەی هەردوو شەقامی هاتوچۆیەكە و هەردوو شەقامە خزمەتگوزارییەكە، بە هەمان شێوەی بەشی یەكەمی شەقامەكەیە و ئەو بەشەی شەقامەكەش بەپێی ئەو گرێبەستە و ماوەی كاركردنەی بۆی دانراوە، دەبێ لە مانگی 12ی ساڵی 2022 تەواو بكرێت، بەتەواوبوونیشی، درێژیی ئەو دوو بەشەی شەقامی 150مەتری بە گشتی دەكاتە 17كیلۆمەتر و دوو سەد مەتر".

به‌شی دووه‌می ئه‌م شه‌قامه‌، كه‌ له‌ ڕێگه‌ی شه‌قڵاوه‌ تا ڕێگه‌ی كۆیه‌ كاری تێدا ده‌كرێت، له‌ ڕێكه‌وتی 31/8/2021 ده‌ستی پێ كردووه.

سەرۆكی شارەوانی روونی كردەوە، ئەو بەشەی ئێستا لە 150 مەتری كاری تێدا دەكرێت، چوار بەرزەپرد و چەند یوتێرنێك لەخۆ دەگرێت، كە لە شێوەی بەرزەپرددان، "واتە سووڕانەوەیە لە ئاراستەی شەقامێك بۆ ئاراستەیەكی دیكەوە، هەروەها یەكتربڕێكی تەواویش لە چوارڕیێانی كەسنەزان دەبێت، كە لەگەڵ شەقامی كەسنەزان یەكتر دەگرێتەوە، بەدرێژایی ئەو شەقامانەی 150 مەتری تۆڕی ئاوەڕۆ بە پێوانەی جیاجیا بە هەموو پێداویستییەكەوە، بە سیستمێكی زۆر هاوچەرخ و زانستی دروست كراوە، شەقامەكەش بە هەموو جۆرە نیشانەی هاتوچۆ و هێڵكاری و جوانكاری و پەرژین و بەربەستی لەسەر شۆڵدەرەكانی بۆ دادەنرێت، هەموو ئەمانە بۆ سەلامەتیی شوفێران و هاووڵاتییانە، خاوەنی پڕۆژەكەش حكوومەتی هەرێمی كوردستانە، بەتایبەتی وەزارەتی شارەوانی و سەرۆكایەتیی شارەوانیی هەولێر، بەڵام لەلایەن هێمن گرووپەوە جێبەجێ دەكرێت، كە كۆمپانیایەكی خۆماڵیی كوردستانییە".

ئاشكراشی كرد، ئەو بەشەی ئێستای 150 مەتری زیاتر لە 95 ملیۆن دۆلاری بۆ تەرخان كراوە و پڕۆژەكە هەلێكی زۆری كاركردنی بۆ خەڵكی ناوخۆ تێدا دەستەبەر كراوە، گوتیشی: "ئەمەش داوایەكی سەرۆكی حكوومەتە لە كابینەی نۆیەمی حكوومەتی كوردستان لە كۆمپانیاكان، كە هەلی كار بە ڕێژەیەكی زۆر، یان هەر هەمووی بە خەڵك و گەنجانی ناوخۆ بدەن. هەر بۆیە دەبینین، ئێستا لەو بەشەی شەقامی 150 مەتری، 900 كرێكاری خۆماڵی و ژمارەیەكی زۆر ئامێر تێیدا كار دەكەن".

ڕۆژانه‌ 400 ئامێری جۆراوجۆر به‌ به‌رده‌وامی و بۆ ماوه‌ی 12 بۆ 14 كاتژمێر كاری تێدا ده‌كه‌ن.

سەرۆكی شارەوانیی هەولێر باسی لەوەش كرد، بەشە بازنەییەکەی شەقامی 150مەتری، كە بریتییە لە هەولێر – كەسنەزان و هەولێر – شەقڵاوە، ئاسانكارییەكی زۆر بۆ هاتوچۆ دەستەبەر دەكات، بەتایبەتی بۆ ئۆتۆمبێلی گەورە و بارهەڵگر، كە وادەكات بەكەمترین ماوە بچنە ئەو ڕێگا و ئاراستە بازرگانییانەی دەیانەوێت، ئەمەش دووبارە دەبێتە هۆكارێك بۆ بوژاندنەوەی ئابووری، بەتایبەتی بۆ كەرتی بازرگانیی نێوان هەولێر و دەروازە و خاڵە سنوورییەكان و شارەكانی دیكەی هەرێمی كوردستان.

جەختیشی كردەوە: "هەموو كەرستە و چینەکانی قیرتاوكردن و پێداویستییەكانی بەرزەپرد و ژێرپرد و شەقامەكە، بەپێی مواسەفاتی تاقیگەی بیناسازی و بەپێی هەردوو مەرجی كاروباری ئەندازیاریی شارستانی و بەڵێندەرایەتیی بەشی یەكەم و دووەم، جێبەجێ دەكرێت، تاوەكو بتوانرێت لە دەرەنجامدا پڕۆژەكە پوخت و ڕێكوپێك و بە ستانداردێكی هاوچەرخ بێت، ئەو پەرژینانەی لە شەقامەكەش بەكار دێن، بە شێوەیەكی وان، كە بتوانێت بەرگری لە هەر پێداكێشان و ڕووداوێكی هاتوچۆدا بكات".

ئه‌و ماددانه‌ی وەک قیر و به‌ردی شكاو و كۆنكرێت کە لە دروستكرنی ئه‌و پڕۆژە‌یه‌دا به‌كار هاتوون، هه‌ر هه‌مووی به‌رهه‌می ناوخۆی هه‌رێمی كوردستانن.

ئه‌و به‌شه‌ی ئێستا كاری تێدا ده‌كرێت، پێکدێت لە شه‌قامێكی سه‌ره‌كی به‌ دوو ئاراسته، كه‌ پانیی هه‌ر یه‌كێكیان 20 مه‌ترە و نێوانی هەردوو سایدەکەش (دوورگه‌ی ناوه‌ندی)‌ 20 مه‌تره‌، له‌ هه‌ردوو لای ڕاست و چه‌پی شه‌قامه‌كه‌‌ش شه‌قامی خزمه‌تگوزاریی هه‌یه‌، كه‌ پانیی هه‌ر شه‌قامێكیان 23 مه‌تره‌ و دوو سایدیشه‌.